ಯಾರಿಗೆ ಒಲಿಯುತ್ತೆ ಸಚಿವ ಸ್ಥಾನ

ಅಭಿವೃದ್ಧಿ ವಿಚಾರದಲ್ಲಿ, ಸಚಿವ ಸ್ಥಾನ ಸಂಬಂಧ ಪದೇಪದೇ ನಿರ್ಲಕ್ಷಿಸುತ್ತಿರುವ ಹಾಗೂ ನಿರಂತರವಾಗಿ ಅನ್ಯಾಯ ಎಸಗುತ್ತಿರುವ ಬಗ್ಗೆ ಜಿಲ್ಲೆಯಲ್ಲಿ ಆಕ್ರೋಶ ಮಡುಗಟ್ಟಿದೆ. ಕಾಂಗ್ರೆಸ್ ಪಕ್ಷದ ಐವರು ಜಿಲ್ಲೆಯಲ್ಲಿ ಶಾಸಕರಾಗಿದ್ದು, ಸಚಿವ ಸಂಪುಟ ಪುನರ್ ರಚನೆಯಲ್ಲಿ ಒಬ್ಬರಿಗೂ ಮಂತ್ರಿ ಭಾಗ್ಯ ಸಿಕ್ಕಿಲ್ಲ. ಈ ಸಂಬಂಧ ಈ ಶಾಸಕರು ಪದೇಪದೇ ಬೇಸರ ಹೊರಹಾಕುತ್ತಲೇ ಇದ್ದಾರೆ.

ಸತತ ನಾಲ್ಕು ಬಾರಿ ಗೆದ್ದಿರುವ ಗ್ರಾಮೀಣ ಶಾಸಕ ಬಿ.ನಾಗೇಂದ್ರ ಅವರಿಗೆ ಸಿದ್ದರಾಮಯ್ಯ ಸಂಪುಟದಲ್ಲೇ ಯುವಜನ ಹಾಗೂ ಕ್ರೀಡಾ ಇಲಾಖೆ ಸಚಿವರಾಗಿದ್ದರು. ಆದರೆ, ವರ್ಷ ಕಳೆಯುವ ಮುನ್ನವೇ ವಾಲ್ಮೀಕಿ ಅಭಿವೃದ್ಧಿ ನಿಗಮದ ಹಗರಣದಲ್ಲಿ ಕೋಟ್ಯಾಂತರ ಹಣ ವರ್ಗಾವಣೆ ಆರೋಪ ಹಿನ್ನೆಲೆ ರಾಜೀನಾಮೆ ನೀಡಿದರು. ಈ ಡಿಕೆಶಿ ಸಂಪುಟದಲ್ಲಿ ಸಚಿವ ಸ್ಥಾನ ದೊರೆಯಲಿದೆ ಎಂಬ ಆತ್ಮ ವಿಶ್ವಾಸದಲ್ಲಿದ್ದರು. ಆದರೆ, ಈಚೆಗೆ ವಾಲ್ಮೀಕಿ ಹಗರಣದ ಚಾರ್ಜ್‌ಶೀಟ್ ಸಿಬಿಐ ಕೋರ್ಟ್‌ಗೆ ಸಲ್ಲಿಸಿದ ಪರಿಣಾಮ ಮತ್ತೊಮ್ಮೆ ಸಚಿವ ಕನಸು ಕಮರಿದೆ.

ಇನ್ನೂ ಸಂಡೂರು ಶಾಸಕಿ ಈ. ಅನ್ನಪೂರ್ಣ ಮೊದಲ ಬಾರಿಗೆ ಗೆದ್ದಿದ್ದರು. ಅವರ ಪತಿ , ಸಂಸದ ಈ. ತುಕಾರಾಮ್ ಸತತ ನಾಲ್ಕು ಬಾರಿ ಶಾಸಕರಾಗಿದ್ದರೆ. ಮಹಿಳಾ ಕೋಟಾದಲ್ಲಿ ಸಚಿವ ಸ್ಥಾನ ನೀಡಿ ಎಂಬುದಾಗಿ ನಾಯಕರ ಮುಂದೆ ಲಾಬಿ ನಡೆಸಿದ್ದರು. ಇನ್ನೂ ಕಂಪ್ಲಿ ಶಾಸಕ ಜೆ.ಎನ್.ಗಣೇಶ್, ಸಿರಗುಪ್ಪ ಶಾಸಕ ಬಿ.ಎಂ.ನಾಗರಾಜ ಎರಡನೇ ಬಾರಿಗೆ ಶಾಸಕರಾದರೂ ಬಾಹ್ಯವಾಗಿ ಎಲ್ಲಿಯೂ ಸಚಿವ ಸ್ಥಾನಕ್ಕೆ ಬೇಡಿಕೆಯಿಟ್ಟಿಲ್ಲ. ಆದರೆ, ಕೆಲ ಪ್ರಭಾವಿ ನಾಯಕರ ಮೂಲಕ ಯುವ ಶಾಸಕರಿಗೆ ಸಚಿವ ಸ್ಥಾನ ಕೋಟಾದಲ್ಲಿ ನೀಡಿ ಎಂಬುದಾಗಿ ಚರ್ಚಿಸಿದ್ದರು ಎನ್ನಲಾಗಿದೆ.

ಸಚಿವ ಪ್ರಸ್ತಾಪದ ವೇಳೆ ದಾಳಿ : ಕಳೆದ ಒಂದೂವರೆ ವರ್ಷದಲ್ಲಿ ಶಾಸಕ ಬಿ.ನಾಗೇಂದ್ರ ಅವರನ್ನು ಸಚಿವ ಸಂಪುಟಕ್ಕೆ ಸೇರಿಸುವ ಕೊಳ್ಳುವ ಪ್ರಯತ್ನದ ಸಂದರ್ಭದಲ್ಲಿಯೇ ಕೇಂದ್ರ ತನಿಖಾ ಸಂಸ್ಥೆಗಳಾದ ಅದಾಯ ತೆರಿಗೆ ಇಲಾಖೆ ( ಐಟಿ ), ಜಾರಿ ನಿರ್ದೇಶನಾಲಯ ( ಇಡಿ) ಹಾಗೂ ಸಿಬಿಐಯಿಂದ ದಾಳಿ ನಡೆಯುವುದರಿಂದ ಸಚಿವ ಸ್ಥಾನ ತಪ್ಪುತ್ತಿದೆ. ಕೇಂದ್ರದಲ್ಲಿ ಬಿಜೆಪಿ ಅಧಿಕಾರದಲ್ಲಿದ್ದು, ಮರಳಿ ನಾಗೇಂದ್ರಗೆ ಸಚಿವ ಸ್ಥಾನ ನೀಡಿದರೆ ಜಿಲ್ಲೆಯಲ್ಲಿ ಕಾಂಗ್ರೆಸ್ ಬಿಗಿ ಹಿಡಿತ ಸಾಧಿಸಲಿದೆ ಎಂಬ ಹತಾಶೆಯಿಂದ ಬಿಜೆಪಿಯ ಸ್ಥಳೀಯ ನಾಯಕರೇ ಪಿತೂರಿ ನಡೆಸುತ್ತಿದ್ದಾರೆ ಎಂದು ನಾಗೇಂದ್ರ ಅಪ್ತರೊಬ್ಬರು ಆರೋಪಿಸಿದರು.

ಸಚಿವ ಸ್ಥಾನಕ್ಕಂಟಿದ ಉಸ್ತುವಾರಿ ಶಾಪ : ಜಿಲ್ಲೆಯ ಉಸ್ತುವಾರಿ ಸಚಿವ ಸ್ಥಾನಕ್ಕೆ ರಾಜಕೀಯ ವಲಯದಲ್ಲಿ ಗಂಡಾಂತರದ ಪಟ್ಟ ಸಿಕ್ಕಂತಿದೆ. ಇಲ್ಲಿ ಉಸ್ತುವಾರಿಯಾದವರು ಅಧಿಕಾರ ಕಳೆದುಕೊಳ್ಳುತ್ತಾರೆ ಅಥವಾ ಅಪಖ್ಯಾತಿಗೆ ಈಡಾಗುತ್ತಾರೆ ಎಂಬ ಚರ್ಚೆ ತೀವ್ರಗೊಂಡಿದೆ. 2006ರಿಂದ ಈ ಕಾಕತಾಳೀಯ ಮುಂದುವರಿದಿದ್ದು, ಮಾಜಿ ಜಿಲ್ಲಾ ಉಸ್ತುವಾರಿ ಸಚಿವರಾದ ಎಂ.ಪಿ. ಪ್ರಕಾಶ್, ಸಂತೋಷ್ ಲಾಡ್ ಮತ್ತು ಬಿ.ಶ್ರೀರಾಮುಲು ಚುನಾವಣೆಯಲ್ಲಿ ಸೋಲು ಕಂಡರೆ, ಜನಾರ್ದನ ರೆಡ್ಡಿ ಹಾಗೂ ಇತ್ತೀಚೆಗೆ ಬಿ. ನಾಗೇಂದ್ರ ಹಗರಣಗಳ ಸುಳಿಗೆ ಸಿಲುಕಿ ಅಧಿಕಾರ ಕಳೆದುಕೊಂಡರು.

ಪಿ.ಟಿ. ಪರಮೇಶ್ವರ್ ನಾಯ್ಕ ಅಧಿಕಾರಿಗಳ ವಿವಾದದಿಂದ ಮುಜುಗರಕ್ಕೀಡಾದರೆ, ಆನಂದ್ ಸಿಂಗ್ ಪುತ್ರನ ಸೋಲು ಕಂಡರು. ಕಳೆದ ಎರಡು ವರ್ಷ ಉಸ್ತುವಾರಿಯಾಗಿದ್ದ ಜಮೀರ್ ಅಹ್ಮದ್ ಕೂಡ ಇದೀಗ ಸಚಿವ ಸ್ಥಾನದಿಂದ ವಂಚಿತರಾಗಿದ್ದಾರೆ. ಇನ್ನೂ ವಿಶೇಷವೆಂದರೆ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿ ಈ.ತುಕಾರಾಮ್ ಸಂಸದರಾದರೆ, 2018ರ ಸಮ್ಮಿಶ್ರ ಸರ್ಕಾರದಲ್ಲಿ ಡಿ.ಕೆ.ಶಿವಕುಮಾರ್ ಜಿಲ್ಲಾ ಉಸ್ತುವಾರಿಯಾಗಿದ್ದರು. ಸದ್ಯ ರಾಜ್ಯದ ಸಿಎಂಯಾಗಿದ್ದಾರೆ.

===