ಮೊದಲ ಮಳೆಗೆ ನಲುಗಿದ ಗಣಿನಾಡು

ಕಡಿತಗೊಂಡ ಸಂಪರ್ಕ :ಮಳೆಯ ತೀವ್ರತೆಗೆ ನಗರದ ವಿವಿಧೆಡೆ 78 ವಿದ್ಯುತ್ ಕಂಬಗಳು ಹಾಗೂ 86 ಬೃಹತ್ ಮರಗಳು ಧರೆಗೆ ಉರುಳಿವೆ. ಪ್ರಮುಖ ರಸ್ತೆಗಳಲ್ಲಿನ ವಿದ್ಯುತ್ ಕಂಬಗಳು ಮತ್ತು ಇಂಟರ್ನೆಟ್ ಸೇವೆಯ ವೈರ್‌ಗಳ ಮೇಲೆ ಮರಗಳು ಬಿದ್ದಿದ್ದರಿಂದ ನಗರದಾದ್ಯಂತ ವಿದ್ಯುತ್ ಹಾಗೂ ಇಂಟರನೆಟ್ ಸಂಪರ್ಕ ಸಂಪೂರ್ಣವಾಗಿ ಕಡಿತಗೊಂಡಿತ್ತು. ಬುಧವಾರ ಮಧ್ಯಾಹ್ನವಾದರೂ ವಿದ್ಯುತ್ ಹಾಗೂ ನೆಟ್ ಸಂಪರ್ಕ ಮರುಸ್ಥಾಪನೆಯಾಗದ ಹಿನ್ನೆಲೆಯಲ್ಲಿ, ವಿವಿಧ ಕೆಲಸ ಕಾರ್ಯಗಳಿಗಾಗಿ ಕಚೇರಿಗಳಿಗೆ ಬಂದಿದ್ದ ಸಾರ್ವಜನಿಕರು ನಿರಾಶರಾಗಿ ವಾಪಸ್ ತೆರಳಬೇಕಾಯಿತು.

ಕಚೇರಿಗಳಲ್ಲಿ ನೆಟ್ ಇಲ್ಲದೆ, ಇತ್ತ ಫ್ಯಾನ್ ಕೂಡ ಇಲ್ಲದೆ ಬೇಸತ್ತ ಅಧಿಕಾರಿಗಳು ಕಚೇರಿಯಿಂದ ಹೊರಗಡೆ ಅಲೆದಾಡುತ್ತಿರುವುದು ಕಂಡುಬಂತು. ಇನ್ನೂ ಮಧ್ಯಾಹ್ನವಾಗುತ್ತಿದ್ದಂತೆ ಬಹುತೇಕ ಅಧಿಕಾರಿಗಳು ಮನೆಗಳತ್ತ ಮುಖ ಮಾಡಿದರು. ನಗರದ ನಾನಾ ಸರ್ಕಾರಿ ಮತ್ತು ಖಾಸಗಿ ಕಾಲೇಜುಗಳು, ಶಾಲಾ ಮೈದಾನ, ಜಿಲ್ಲಾ ಕ್ರೀಡಾಂಗಣ ಹಾಗೂ ಸರ್ಕಾರಿ ಕಚೇರಿಗಳ ಆವರಣಗಳು ಜಲಾವೃತಗೊಂಡು ಕೆರೆಗಳಂತೆ ಭಾಸವಾಗುತ್ತಿದ್ದವು.

ಗವಿಯಪ್ಪ ವೃತ್ತದಲ್ಲಿ ಟ್ರಾಫಿಕ್ ಜಾಮ್ : ನಗರದ ಜಿಲ್ಲಾ ಕ್ರೀಡಾಂಗಣ ರಸ್ತೆಯ ರೈಲ್ವೆ ಅಂಡರ್ ಪಾಸ್‌ನಲ್ಲಿ ಭಾರಿ ಪ್ರಮಾಣದ ನೀರು ನಿಂತಿದ್ದರಿಂದ ವಾಹನ ಸಂಚಾರವನ್ನು ಸಂಪೂರ್ಣವಾಗಿ ನಿರ್ಬಂಧಿಸಲಾಗಿತ್ತು. ಸಾರ್ವಜನಿಕರಿಗೆ ಪರ್ಯಾಯ ರಸ್ತೆಯಲ್ಲಿ ಸಂಚರಿಸಲು ಅವಕಾಶ ಕಲ್ಪಿಸಿದ್ದರಿಂದ, ಗವಿಯಪ್ಪ ವೃತ್ತದಲ್ಲಿ ಭಾರಿ ಪ್ರಮಾಣದ ಟ್ರಾಫಿಕ್ ಸಮಸ್ಯೆ ಉಂಟಾಗಿ ಸಾರ್ವಜನಿಕರು ಹೈರಾಣಾದರು. ರಸ್ತೆಗಳಿಗೆ ಅಡ್ಡಲಾಗಿ ಬಿದ್ದಿದ್ದ ಬೃಹತ್ ಮರಗಳು ಮತ್ತು ವಿದ್ಯುತ್ ಕಂಬಗಳನ್ನು ತೆರವುಗೊಳಿಸಿ ಸಂಚಾರ ಹಾಗೂ ವಿದ್ಯುತ್ ಸುಸ್ಥಿತಿಗೆ ತರಲು ಮಹಾನಗರ ಪಾಲಿಕೆ ಮತ್ತು ಜೆಸ್ಕಾಂ ಸಿಬ್ಬಂದಿ ಹರಸಾಹಸಪಟ್ಟರು.