ಬತ್ತಿದ ಗಡಿಭಾಗದ ವೇದಾವತಿ ಒಡಲು

ಒಣಗಿದ ನದಿ : ತುಂಗಭದ್ರ ಜಲಾಶಯದಿಂದ ಎರಡನೇ ಬೆಳೆಗೆ ನೀರು ಹರಿಸದ ಪರಿಣಾಮ ವೇದಾವತಿ ನದಿಯಲ್ಲಿ ಹನಿ ನೀರೂ ಇಲ್ಲದೇ ಪ್ರಾಣಿ-ಪಕ್ಷಿಗಳು ಕುಡಿವ ನೀರಿಲ್ಲದೆ ತತ್ತರಿಸುತ್ತಿವೆ. ಜಾನುವಾರುಗಳಿಗೆ ನೀರು ಕುಡಿಸಲು ಹಳ್ಳ-ಕೊಳ್ಳ ಅಲೆದಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ನದಿ ಪಾತ್ರಕ್ಕೆ ಬಳ್ಳಾರಿ ಗ್ರಾಮೀಣ ಮತ್ತು ಸಿರಗುಪ್ಪ ಸೇರಿ 50ಕ್ಕೂ ಹೆಚ್ಚು ಗ್ರಾಮಗಳು ಸೇರುತ್ತಿವೆ. ಸದ್ಯ, ನೀರು ಬತ್ತಿದ ಪರಿಣಾಮ ರೈತರು ಮತ್ತು ಸಾರ್ವಜನಿಕರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಇದಲ್ಲದೇ, ನದಿ ಪಾತ್ರದ ರೈತರು ನೂರರು ಎಕರೆ ಪ್ರದೇಶದಲ್ಲಿ ಬೆಳೆದಿರುವ ಬೆಳೆಗಳು ನೀರಿನ ಅಭಾವದಿಂದ ಒಣಗುತ್ತಿದ್ದು, ರೈತರು ಸಾಲದ ಸುಳಿಗೆ ಸಿಲುಕುವಂತೆಯಾಗಿದೆ. ಹತಾಶರಾದ ರೈತರು ಬತ್ತಿದ ನದಿಯ ಒಡಲಲ್ಲಿ 20 ರಿಂದ 30 ಅಡಿಗಳಷ್ಟು ಆಳದ ಹೊಂಡ ತೋಡಿದರೂ ನೀರು ಸಿಗುತ್ತಿಲ್ಲ. ಇದು ಅಂತರ್ಜಲ ಮಟ್ಟ ಕುಸಿದಿರುವುದಕ್ಕೆ ಸಾಕ್ಷಿಯಾಗಿದೆ.

ತುಂಗಭದ್ರ ಜಲಾಶಯದಿಂದ ಎಲ್‌ಎಲ್‌ಸಿ ಕಾಲುವೆಗಳಿಗೆ ನೀರು ಹರಿಸದ ಈ ಸಮಸ್ಯೆ ಉಲ್ಬಣಿಸಿದೆ. ಈ ಕೂಡಲೇ ನದಿ ಪಾತ್ರದ ಜನರ ಹಿತದೃಷ್ಟಿಯಿಂದ ಕ್ರಮ ಕೈಗೊಳ್ಳುವಂತೆ ನದಿಪಾತ್ರದ ಗ್ರಾಮಸ್ಥರು ಒತ್ತಾಯಿಸಿದ್ದಾರೆ. ಸಿರಗುಪ್ಪ ತಾಲೂಕಿನ ಬೈರಾಪುರ ಮತ್ತು ಬಳ್ಳಾರಿ ತಾಲೂಕಿನ ಗುಡುದೂರು ಕಾಲುವೆ ಎಸ್ಕೇಪ್ ಮೂಲಕ ವೇದಾವತಿ ನದಿಗೆ ಎರಡು ದಿನಗಳವರೆಗೆ 400 ಕ್ಯೂಸೆಕ್ಸ್ ನೀರು ಹರಿಸಿ ಜಲಮೂಲಗಳನ್ನು ಭರ್ತಿ ಮಾಡಬೇಕು ಎಂದು ಸಿರಗುಪ್ಪ ರೈತರು ಹಾಗೂ ಮಾಜಿ ಶಾಸಕ ಎಂ.ಎಸ್.ಸೋಮಲಿಂಗಪ್ಪ ಜಿಲ್ಲಾಧಿಕಾರಿಗಳಿಗೆ ಪತ್ರ ಬರೆದಿದ್ದಾರೆ. ಈ ಕೂಡಲೇ ಜಿಲ್ಲಾಧಿಕಾರಿ ಮಧ್ಯಪ್ರವೇಶಿಸಿ ಎಲ್‌ಎಲ್‌ಸಿ ಕಾಲುವೆಯಿಂದ ನದಿಗೆ ನೀರು ಹರಿಸುವ ಮೂಲಕ ರೈತರ ಬೆಳೆ ಹಾಗೂ ಜಾನುವಾರುಗಳನ್ನು ರಕ್ಷಿಸಬೇಕೆಂದು ನದಿ ಪಾತ್ರದ ಜನರು ಒತ್ತಾಯಿಸಿದ್ದಾರೆ.

===