ಬೀದಿಬದಿ ವ್ಯಾಪಾರಸ್ಥರು ಅತಂತ್ರ

ನಗರದ ರಾಯಲ್ ವೃತ್ತ, ದುರ್ಗಮ್ಮ ಗುಡಿ ವೃತ್ತ, ಸಂಗಮ್ ಸರ್ಕಲ್, ಬೆಂಗಳೂರು ರಸ್ತೆ, ತಾಳೂರು ರಸ್ತೆ, ಇನ್‌ಫ್ಯಾಂಟ್ರಿ ರಸ್ತೆ ಅಕ್ರಮಿಸಿಕೊಂಡವರಿಗೆ ಪಾಲಿಕೆ ಅಧಿಕಾರಿಗಳು ಶಿಸ್ತಿನ ಪಾಠ ಹೇಳುತ್ತಿದ್ದಾರೆ. ಜೆಸಿಬಿ ವಾಹನದ ಮುಖಾಂತರ ಪೆಟ್ಟಿಗೆ ಅಂಗಡಿ ತೆರವುಗೊಳಿಸುತ್ತಿದ್ದಾರೆ. ಫುಟಪಾತ್ ಒತ್ತುವರಿ ತೆರವು ಕಾರ್ಯಾಚರಣೆ ಈಗಷ್ಟೇ ಪ್ರಾರಂಭಿಸಿದ್ದು, ಮುಂದುವರಿಯಲಿದೆ ಎಂಬುದಾಗಿ ಪಾಲಿಕೆ ಅಧಿಕಾರಿಗಳು ಖಚಿತವಾಗಿ ನುಡಿಯುತ್ತಿದ್ದಾರೆ. ಆದರೆ, ಬೀದಿ ಬದಿ ವ್ಯಾಪಾರಿಗಳಿಗೆ ಒಂದು ಶಾಶ್ವತ ನೆಲೆ ಕಲ್ಪಿಸಲು ಮಾತ್ರ ಈವರೆಗೂ ಸಾಧ್ಯವಾಗಿಲ್ಲ.

ಬಳ್ಳಾರಿ ನಗರದ್ಯಾಂತ ಎಲ್ಲ ಕಡೆ ಫುಟ್‌ಪಾತ್ ಒತ್ತುವರಿ ಸಾಮಾನ್ಯವಾಗಿದೆ. ನಗರದಲ್ಲಿಯೇ ಅತಿ ಹೆಚ್ಚು ವಹಿವಾಟು ನಡೆಯುವ ಬೆಂಗಳೂರು ರಸ್ತೆ ಹಾಗೂ ಕೆ.ಸಿ. ಪಾದಚಾರಿ ರಸ್ತೆಗಳು ಅತಿಕ್ರಮಣವಾಗಿವೆ. ಬೆಂಗಳೂರು ರಸ್ತೆಯ ಒಂದು ಬದಿಯಲ್ಲಿ ಹೂವು, ಹಣ್ಣು ಮಾರಾಟವೂ ಜೋರಾಗಿ ನಡೆಯುತ್ತಿದೆ. ಹತ್ತಾರು ವರ್ಷಗಳಿಂದ ವ್ಯಾಪಾರ ನಡೆಸುತ್ತಿರುವರಿಗೆ ಪಾಲಿಕೆ ಅಧಿಕಾರಿಗಳು ಜಾಗ ಖಾಲಿ ಮಾಡುವಂತೆ ನೋಟಿಸ್ ನೀಡುತ್ತಿದ್ದಾರೆ. ಇದು ಅವರನ್ನು ಚಿಂತೆಗೆ ದೂಡಿದೆ.

ನಗರದಲ್ಲಿ ಸಾವಿರಕ್ಕೂ ಅಧಿಕ ಬೀದಿಬದಿ ವ್ಯಾಪಾರಿಗಳಿದ್ದಾರೆ. ತಳ್ಳುವ ಗಾಡಿ, ಪೆಟ್ಟಿಗೆ ಅಂಗಡಿಯಲ್ಲಿ ವಹಿವಾಟು ನಡೆಸುತ್ತಾ ಕುಟುಂಬ ನಿರ್ವಹಣೆ ಮಾಡುತ್ತಿದ್ದಾರೆ. ಅವರಿಗೆ ಪಾಲಿಕೆಯಿಂದ ಕೇಂದ್ರ ಸರ್ಕಾರದ ಸ್ವಯಂ ಸ್ವನಿಧಿ ಯೋಜನೆಯಡಿ ಹತ್ತು ಸಾವಿರ ರೂ. ದಿಂದ 25 ಸಾವಿರ ರೂ.ವರೆಗೆ ಸಾಲ ನೀಡಲಾಗಿದೆ. ಈಗ ಏಕಾಏಕಿ ಪುಟಪಾತ್‌ನಿಂದ ತೆರವುಗೊಳಿಸಿದರೆ ಸಾಲ ತೀರಿಸುವುದು, ಕುಟುಂಬ ಸಾಗಿಸುವುದು ಹೇಗೆ ? ಎಂದು ವ್ಯಾಪಾಸ್ಥರು ಪ್ರಶ್ನಿಸುತ್ತಿದ್ದಾರೆ.

ನಿರ್ಮಾಣವಾಗದ ಮಿನಿ ಮಾರುಕಟ್ಟೆ : ಪಾಲಿಕೆಯಿಂದ ಕಳೆದ ಕೆಲ ವರ್ಷದ ಹಿಂದಯೇ ಬೆಂಗಳೂರು ರಸ್ತೆಯಲ್ಲಿದ್ದ ಮಾಂಸದ ಮಾರುಕಟ್ಟೆಯನ್ನು ನೆಲಸಮಗೊಳಿಸಿ ಕೋಟ್ಯಾಂತರ ರೂ. ವೆಚ್ಚದಲ್ಲಿ ಮಿನಿ ಮಾರುಕಟ್ಟೆ ನಿರ್ಮಿಸುವುದಾಗಿ ಭರವಸೆ ನೀಡಲಾಗಿತ್ತು. ಮಾರುಕಟ್ಟೆ ನೆಲಸಮಗೊಳಿಸಿ ಮೂರು ವರ್ಷಕ್ಕೂ ಅಧಿಕ ಕಳೆದರೂ ಕೆಲ ತಿಂಗಳಿಂದ ಕಾಮಗಾರಿ ಮಾತ್ರ ಆರಂಭವಾಗಿದೆ. ಇನ್ನೂ ಪೂರ್ಣಗೊಳ್ಳಲು ಆರೇಳು ತಿಂಗಳು ಹಿಡಿಯಲಿದೆ. ಸದ್ಯ, ಮೀನು, ಕುರಿ ಹಾಗೂ ಕೋಳಿ ಹಸಿ ಮಾಂಸವನ್ನು ವ್ಯಾಪಾರಸ್ಥರು ನಡು ರಸ್ತೆಯಲ್ಲೇ ಮಾರಾಟ ಮಾಡುವ ಪರಿಸ್ಥಿತಿ ಬಂದಿದೆ. ಇಲ್ಲಿನ ಬಸವೇಶ್ವರ ಹಾಗೂ ಪಾವರ್ತಿ ನಗರದಲ್ಲಿ ಕೆಲ ವರ್ಷಗಳ ಹಿಂದ ನಡು ರಸ್ತೆಯಲ್ಲಿ ತರಕಾರಿ ಮಾರಾಟ ಮಾಡುತ್ತಿದ್ದರು. ನಾರಾ ಭರತರೆಡ್ಡಿ ನಗರ ಶಾಸಕರಾದ ನಂತರ ವ್ಯಾಪಾರಸ್ಥರಿಗಾಗಿಯೇ ಆ ಎರಡು ನಗರಗಳಲ್ಲಿ ಸುಸ್ಸಜ್ಜಿತ ತರಕಾರಿ ಮಾರುಕಟ್ಟೆ ನಿರ್ಮಿಸಿದ್ದಾರೆ. ಇದರಿಂದ ಗ್ರಾಹಕರಿಗೆ ಹಾಗೂ ವ್ಯಾಪಾರಸ್ಥರಿಗೆ ಅನುಕೂಲವಾಗಿದೆ. ಉಳಿದಂತೆ ನಗರದ್ಯಾಂತ ಯಾವ ಪ್ರದೇಶದಲ್ಲಿಯೂ ಸುಸ್ಸಜ್ಜಿತ ಮಾರುಕಟ್ಟೆ ಇಲ್ಲದೆ ಇರುವುದರಿಂದ ರಸ್ತೆಯಲ್ಲಿ ಮಾರಾಟ ಮಾಡುತ್ತಿದ್ದಾರೆ.

ಮಾರುಕಟ್ಟೆ ಸ್ಥಾಪಿಸಲಿ : ಬೀದಿಬದಿ ವ್ಯಾಪಾರಿಗಳಿಗೆ ಅನುಕೂಲ ಮಾಡುವ ಉದ್ದೇಶದಿಂದ ನಗರದ ನಾಲ್ಕು ಕಡೆಗಳಲ್ಲಿ ಹೊಸದಾಗಿ ಮಿನಿ ಮಾರುಕಟ್ಟೆ ನಿರ್ಮಿಸಲು ಮಹಾನಗರ ಪಾಲಿಕೆ ಯೋಜನೆ ರೂಪಿಸಬೇಕು. ಅಲ್ಲದೆ, ವಾಹನ ನಿಲುಗಡೆಗೆ ಸರಿಯಾದ ಜಾಗ ಗುರುತಿಸಬೇಕು. ಇದರಿಂದ ಸಂಚಾರ ದಟ್ಟಣೆ ಇರುವುದಿಲ್ಲ. ಪಾಲಿಕೆಯು ಬೀದಿಬದಿ ವ್ಯಾಪಾರಿಗಳಿಗೆ ಮಾರುಕಟ್ಟೆ ನಿರ್ಮಿಸಿದರೆ ಉತ್ತಮ ವಹಿವಾಟು ನಡೆದು ಲಾಭ ಪಡೆಯಬಹುದು. ಇಲ್ಲದಿದ್ದರೆ, ನಿರಂತರ ಅಧಿಕಾರಿಗಳ ದಾಳಿ ಒಂದಡೆಯಾದರೆ, ಕೆಲ ಪೊಲೀಸರಿಗೆ ಹಣ ನೀಡಿ ವ್ಯಾಪಾರ ನಡೆಸಬೇಕಾದ ಅನಿವಾರ್ಯತೆ ಎದುರಾಗಲಿದೆ ಎಂದು ಬೀದಿ ಬದಿ ತರಕಾರಿ ವ್ಯಾಪಾರಿ ಶೇಷಮ್ಮ ಹೇಳಿದರು.

ಕೋಟ್... 2022ರಲ್ಲಿ ನಗರದ ಬೀದಿಬದಿ ವ್ಯಾಪಾರಸ್ಥರ ಸರ್ವೇ ನಡೆಸಿ, ನಲ್ಮಾ ಯೋಜನೆಯಡಿ ದೊರೆಯುವ ಎಲ್ಲ ಸೌಲಭ್ಯ ಕಲ್ಪಿಸಿದೆ. ಆದರೆ, ಇತ್ತೀಚಿಗೆ ಅನಧಿಕೃತವಾಗಿ ಸಣ್ಣ ಸಣ್ಣ ಅಂಗಡಿಗಳ ತೆರೆದು ಪಾದಾಚಾರಿ ರಸ್ತೆ ಅಕ್ರಮಿಸಿದ್ದು, ಅಂತಹವರನ್ನು ತೆರವುಗೊಳಿಸಲಾಗುತ್ತಿದೆ. ಮಿನಿ ಮಾರುಕಟ್ಟೆ ನಿರ್ಮಾಣದ ಕಾಮಗಾರಿ ಆರಂಭವಾಗಿದ್ದು ಇನ್ನೂ ಕೆಲ ತಿಂಗಳಲ್ಲಿ ಪೂರ್ಣಗೊಳ್ಳಲಿದೆ.

- ಪಿ.ಎಸ್.ಮಂಜುನಾಥ, ಆಯುಕ್ತ, ಮಹಾನಗರ ಪಾಲಿಕೆ, ಬಳ್ಳಾರಿ.