ಔಷಧ ಸಕಾಲಕ್ಕೆ ಸಿಂಪಡಿಸಿ

ಕುರುಗೋಡು: ರೈತರು ಭೂಮಿಯಲ್ಲಿನ ತೇವಾಂಶ ತಡೆಗಟ್ಟುವ ಜತೆಗೆ ಸಕಾಲಕ್ಕೆ ಅಗತ್ಯ ಔಷಧ ಸಿಂಪಡಣೆ ಮಾಡುವುದರಿಂದ ಮಚ್ಚೆರೋಗ ನಿಯಂತ್ರಣ ಸಾಧ್ಯ ಎಂದು ತೋಟಗಾರಿಕೆ ಇಲಾಖೆ ಹಿರಿಯ ಸಹಾಯಕ ನಿರ್ದೇಶಕ ಜೆ.ಶಂಕರ್ ಹೇಳಿದರು.

ಕೋಳೂರು ಗ್ರಾಮದಲ್ಲಿ ಮೆಣಸಿನಕಾಯಿ ಬೆಳೆಗೆ ಮಚ್ಚೆ ರೋಗ ಕಾಣಿಸಿಕೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಕೃಷಿ ಜಮೀನಿಗೆ ಮಂಗಳವಾರ ಭೇಟಿ ನೀಡಿ ಬೆಳೆ ಪರಿಶೀಲಿಸಿ ಮಾತನಾಡಿದರು.

ಅಕಾಲಿಕ ಮಳೆ, ಮೋಡ ಕವಿದ ವಾತಾವರಣ ಹಾಗೂ ಚಳಿ ಹೆಚ್ಚಾಗಿರುವುದರಿಂದ ಕಳೆದ ಬಾರಿಗಿಂತ ರೋಗದ ಪ್ರಮಾಣ ಹೆಚ್ಚಾಗಿದೆ. ಹೀಗಾಗಿ ರೈತರು ಔಷಧ ಸಕಾಲಕ್ಕೆ ಸಿಂಪಡಿಸುವ ಮೂಲಕ ನಿಯಂತ್ರಿಸಬಹುದು ಎಂದರು.

ಹಗರಿ ಕೃಷಿ ವಿಶ್ವವಿದ್ಯಾಲಯದ ವಿಜ್ಞಾನಿ ರವಿ ಮಾತನಾಡಿ, ರೈತರು ಸಮೀಪದ ಕೃಷಿ ಕೇಂದ್ರ ಅಧಿಕಾರಿಯಿಂದ ರೋಗದ ಮಾಹಿತಿ ಪಡೆಯಬೇಕು. ಒಂದೇ ಗುಂಪಿಗೆ ಸೇರಿದ ಶಿಲೀಂಧ್ರ ನಾಶಕವನ್ನು ಮರು ಬಳಸಬಾರದು. ರೈತರು ಹನಿ ನೀರಾವರಿ ಪದ್ಧತಿ ಅಳವಡಿಕೊಂಡಾಗ ಭೂಮಿಯ ತೇವಾಂಶ ಕಡಿಮೆಯಾಗುತ್ತದೆ. ಇದರಿಂದ ರೋಗ ವಿಸ್ತರಣೆಯಾಗುವುದಿಲ್ಲ ಎಂದರು.