ಮಳೆ ಚುರುಕು ಬಿತ್ತನೆ ಮಂದಗತಿ

ಜಿಲ್ಲೆಯ ಕೃಷಿ ಚಟುವಟಿಕೆಗಳು ಬಹುಪಾಲು ನೀರಾವರಿ ಆಧಾರಿತವಾಗಿವೆ. ಜಿಲ್ಲೆಯ ಗ್ರಾಮೀಣ, ಕಂಪ್ಲಿ, ಕುರುಗೋಡು, ಸಿರಗುಪ್ಪ ಸೇರಿ ತಾಲೂಕುಗಳು ವ್ಯಾಪಕ ನೀರಾವರಿ ಪ್ರದೇಶವನ್ನು ಹೊಂದಿದ್ದು, ಭತ್ತ ಇಲ್ಲಿನ ಪ್ರಮುಖ ಬೆಳೆಯಾಗಿದೆ. ಸಂಡೂರು ತಾಲೂಕು ಮಾತ್ರ ಮಳೆಯಾಶ್ರೀತ ಪ್ರದೇಶವಾಗಿದೆ. ಈ ತಾಲೂಕುಗಳಿಗೆ ಕೃಷಿ ಭೂಮಿಗೆ ಎಲ್‌ಎಲ್‌ಸಿ (ಕೆಳಮಟ್ಟದ ಕಾಲುವೆ) ಹಾಗೂ ಎಚ್‌ಎಲ್‌ಸಿ (ಮೇಲ್ಮಟ್ಟದ ಕಾಲುವೆಗಳು) ಮುಖ್ಯ ಆಸರೆಯಾಗಿವೆ.

ಪ್ರಸ್ತುತ ಮಳೆಯಾಗುತ್ತಿದ್ದರೂ, ತುಂಗಭದ್ರಾ ಜಲಾಶಯ ಸಂಪೂರ್ಣವಾಗಿ ಭರ್ತಿಯಾಗಿ ಕಾಲುವೆಗಳಿಗೆ ನೀರು ಹರಿಸಿದ ಬಳಿಕವಷ್ಟೇ ಜಿಲ್ಲೆಯ ಬಿತ್ತನೆ ಕಾರ್ಯ ಚುರುಕುಕೊಳ್ಳಲಿದೆ. ಜಲಾಶಯದಿಂದ ನೀರು ಬಿಡುಗಡೆಯಾದ ನಂತರವಷ್ಟೇ ಭತ್ತದ ನಾಟಿ ಸೇರಿದಂತೆ ಒಟ್ಟಾರೆ ಬಿತ್ತನೆ ಪ್ರಗತಿಯಲ್ಲಿ ಗಣನೀಯ ಚೇತರಿಕೆ ಕಂಡುಬರುವ ಸಾಧ್ಯತೆಯಿದೆ. ಜೂ.1ರಿಂದ 20ರವರೆಗೆ 123 ಮಿ.ಮೀ. ಪೈಕಿ 132.8 ಮಿ.ಮೀ. ಮಳೆಯಾದ್ದು, ಶೇ.8ರಷ್ಟು ಹೆಚ್ಚಿದೆ. ನಗರ ಹಾಗೂ ಗ್ರಾಮೀಣ ಪ್ರದೇಶದಲ್ಲಿ ಕಳೆದ ವಾರದಲ್ಲೇ ಎರಡು ದಿನಗಳ ನಿರಂತರ ಮಳೆಯಾಗಿದ್ದು, ಭೂಮಿ ತಂಪಾಗಿದೆ. ಸದ್ಯ ಮಳೆಯಾಶ್ರೀತ ಪ್ರದೇಶದಲ್ಲಿ ಹತ್ತಿ, ತೊಗರಿ, ಜೋಳ ಹಾಗೂ ಮುಸುಕಿನ ಜೋಳ ಬಿತ್ತನೆಯಾಗಿದೆ.

ಜಿಲ್ಲೆಯ ಒಟ್ಟು 1.59 ಲಕ್ಷ ಹೆಕ್ಟೇರ್ ಬೆಳೆ ವಿಸ್ತೀರ್ಣ ಗುರಿಯಲ್ಲಿ ಈಗ ಕೇವಲ ನೀರಾವರಿ ಹಾಗೂ ಮಳೆಯಾಶ್ರೀತ ಪ್ರದೇಶ ಸೇರಿ ಒಟ್ಟು 11,184 ಹೆಕ್ಟೇರ್ ಮಾತ್ರ ಬಿತ್ತನೆ ಪೂರ್ಣಗೊಂಡಿದೆ. 6,122 ಹೆಕ್ಟೇರ್ ಹತ್ತಿ, 1,327 ಹೆಕ್ಟೇರ್ ಜೋಳ, 171 ಹೆಕ್ಟೇರ್ ತೊಗರಿ, 185 ಹೆಕ್ಟೇರ್ ಮುಸುಕಿನ ಜೋಳ ಬಿತ್ತನೆ ಸೇರಿ ಒಟ್ಟು ಶೇ. 7.01ರಷ್ಟು ಬಿತ್ತನೆಯಲ್ಲಿ ಪ್ರಗತಿ ಕಂಡಿದೆ. ಜಿಲ್ಲೆಯ ನೀರಾವರಿ ಪ್ರದೇಶದ ಪ್ರಮುಖ ಬೆಳೆಯಾದ ಭತ್ತ 1.18 ಲಕ್ಷ ಹೆಕ್ಟೇರ್ ಗುರಿಯಿದ್ದು, ಜುಲೈ ಮತ್ತು ಆಗಸ್ಟ್ ತಿಂಗಳಲ್ಲಿ ಈ ಪ್ರದೇಶದಲ್ಲಿ ನಾಟಿಯಾಗಲಿದೆ.

ಶೇ.8ರಷ್ಟು ಹೆಚ್ಚಳ : ಜಿಲ್ಲೆಯ ಐದು ತಾಲೂಕುಗಳಲ್ಲಿ ಸಂಡೂರು ಹೊರತುಪಡಿಸಿ ಎಲ್ಲ ತಾಲೂಕುಗಳಲ್ಲಿ ವಾಡಿಕೆಗಿಂತ ಅಧಿಕವಾಗಿದೆ. ಬಳ್ಳಾರಿ 147.1, ಸಂಡೂರು 83.5, ಸಿರಗುಪ್ಪ 181.2, ಕುರುಗೋಡು 138.6, ಕಂಪ್ಲಿ 97.3 ಸೇರಿ ಒಟ್ಟಾರೆ 132.8 ಮಿ.ಮೀ. ಮಳೆ ಸುರಿದಿದೆ. ಸಂಡೂರಿನಲ್ಲಿ ಮಾತ್ರ ವಾಡಿಕೆಗಿಂತ ಶೇ. 56ರಷ್ಟು ಮಳೆ ಕೊರತೆಯಾಗಿದೆ.

ದಾಸ್ತಾನು ಲಭ್ಯ : ಪ್ರಮುಖವಾಗಿ ಜಿಲ್ಲೆಯಲ್ಲಿ ಭತ್ತ, ಜೋಳ, ನೆಲಗಡಲೆ, ತೊಗರಿ, ರಾಗಿ, ಸಜ್ಜೆ, ಜೋಳ, ಸೂರ್ಯಕಾಂತಿ, ನವಣೆ ಹೆಸರು ಬಿತ್ತನೆ ಮಾಡಲಿದ್ದಾರೆ. ನಗರ ಹಾಗೂ ತಾಲೂಕು ಕೇಂದ್ರ ಸೇರಿ ಒಟ್ಟು 13 ರೈತ ಸಂಪರ್ಕ ಕೇಂದ್ರಗಳ ಮೂಲಕ ಬೀಜಗಳು ವಿತರಿಸಲಾಗುತ್ತಿದೆ. 3000 ಕ್ವಿಂಟಾಲ್ ಭತ್ತ, 3000 ಕ್ವಿಂಟಾಲ್ ಮೆಕ್ಕೆಜೋಳ, 2900 ಕ್ವಿಂಟಾಲ್ ನೆಲಗಡಲೆ, 1000 ಕ್ವಿಂಟಾಲ್ ತೊಗರಿ, 110 ಕ್ವಿಂಟಾಲ್ ರಾಗಿ, 100 ಕ್ವಿಂಟಾಲ್ ಸಜ್ಜೆ, 150 ಕ್ವಿಂಟಾಲ್ ಜೋಳ, 100 ಕ್ವಿಂಟಾಲ್ ಸೂರ್ಯಕಾಂತಿ, 50 ಕ್ವಿಂಟಾಲ್ ನವಣೆ ಹಾಗೂ ಐದು ಕ್ವಿಂಟಾಲ್ ಹೆಸರು ಸೇರಿ ಒಟ್ಟು 10,415 ದಾಸ್ತಾನು ಲಭ್ಯವಿದ್ದು, ಈ ಪೈಕಿ 1,033 ಕ್ವಿಂಟಾಲ್ ಬೀಜ ರೈತರಿಗೆ ವಿತರಿಸಲಾಗಿದೆ.

ಕಳೆದ ಕೆಲ ದಿನಗಳಿಂದ ಜಿಲ್ಲೆಯಲ್ಲಿ ಉತ್ತಮ ಮಳೆಯಾಗುತ್ತಿರುವುದರಿಂದ ರೈತರು ರಸಗೊಬ್ಬರ ಖರೀದಿಗಾಗಿ ಮುಗಿಬಿದ್ದರು. ಜಿಲ್ಲೆಯಲ್ಲಿ ಭತ್ತ ಪ್ರಮಾಣ ಹೆಚ್ಚಿರುವುದರಿಂದ ಹಂತ ಹಂತವಾಗಿ ರಸಗೊಬ್ಬರ ವಿತರಿಸಲು ಅಧಿಕಾರಿಗಳು ಮುಂದಾಗಿದ್ದಾರೆ. ಸದ್ಯ, ಮುಂಗಾರು ಹಂಗಾಮಿಗೆ ಒಟ್ಟು 1,03,778 ಮೆಟ್ರಿಕ್ ಟನ್ ರಸಗೊಬ್ಬರ ಬೇಡಿಕೆಯಿದೆ. ಈ ಪೈಕಿ 43991.5 ಮೆಟ್ರಿಕ್ ಟನ್ ಸರಬರಾಜು ಮಾಡಲಾಗಿದ್ದು, ಇನ್ನೂ 47983.3 ಮೆಟ್ರಿಕ್ ಟನ್ ರಸಗೊಬ್ಬರ ದಾಸ್ತಾನಿದೆ. ಭತ್ತ ನಾಟಿ ಆರಂಭವಾಗುತ್ತಿದ್ದಂತೆ ರಸಗೊಬ್ಬರಕ್ಕೆ ಬೇಡಿಕೆ ಹೆಚ್ಚಲಿದೆ.