ಲೆಕ್ಕ ಕೊಡಿ ಅಭಿಯಾನ ಮುಂದೂಡಿಕೆ

ಪಟ್ಟಣದಲ್ಲಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಇತ್ತೀಚಿಗೆ ಹುಬ್ಬಳ್ಳಿಯಲ್ಲಿ ನಡೆದ ಸಭೆಯಲ್ಲಿ ಶಾಸಕರಾದ ಬಸವನಗೌಡ ಪಾಟೀಲ್ ಯತ್ನಾಳ್, ಅರವಿಂದ ಬೆಲ್ಲದ್, ಮಾಜಿ ಸಚಿವರಾದ ಮುರುಗೇಶ್ ನಿರಾಣಿ, ಬಿ.ಸಿ.ಪಾಟೀಲ್ ಮುಂತಾದ ಪ್ರಮುಖರ ಸಮ್ಮುಖದಲ್ಲಿ ಲೆಕ್ಕ ಕೊಡಿ ಸಮಿತಿ ಹಾಗೂ ಟ್ರಸ್ಟ್ ಮಧ್ಯ ರಾಜಿ ಮಾಡಿಸಲಾಗಿದೆ. ಶೀಘ್ರದಲ್ಲಿಯೇ ದಿನಾಂಕ ಗೊತ್ತುಪಡಿಸಿ ಲೆಕ್ಕ ನೀಡುತ್ತೇವೆ ಎಂದು ಟ್ರಸ್ಟ್ ಪದಾಧಿಕಾರಿಗಳು ತಿಳಿಸಿರುವುದರಿಂದ ಕೊಟ್ಟೂರಿನಿಂದ ಚಾಲನೆಗೊಳ್ಳಬೇಕಿದ್ದ ಅಭಿಯಾನವನ್ನು ತಾತ್ಕಾಲಿಕವಾಗಿ ಮುಂದೂಡಿದ್ದೇವೆ ಎಂದರು.

ಪಂಚಮಸಾಲಿ ಸಮುದಾಯಕ್ಕೆ ಟ್ರಸ್ಟ್ ಪದಾಧಿಕಾರಿ ಬಾವಿ ಬೆಟ್ಟಪ್ಪ ಅವರ ಕೊಡುಗೆ ಏನು ಎಂದು ಪ್ರಶ್ನಿಸಿದ ಎಚ್.ಎಸ್.ಶಿವಶಂಕರ್, ಸಮಾಜದ ಆಸ್ತಿಯನ್ನು ತಮ್ಮದಾಗಿಸಿಕೊಂಡಿರುವುದು ಅವರ ಸಾಧನೆಯಾಗಿದೆ. ಹಗರಿಬೊಮ್ಮನಹಳ್ಳಿ ಕಲ್ಯಾಣ ಮಂಟಪದ ಲೆಕ್ಕ ನೀಡಿ ಸಮುದಾಯದ ಋಣ ತೀರಿಸಲಿ ಎಂದರು.

ಬಿ.ಸಿ.ಉಮಾಪತಿ, ದಿಂಡೂರ್ ಹಾಗೂ ಬೆಟ್ಟಪ್ಪ ಅವರು ಟ್ರಸ್ಟ್ ವತಿಯಿಂದ ವರ್ಷಕ್ಕೆ 2008 ವಿದ್ಯಾರ್ಥಿಗಳನ್ನು ದತ್ತು ಪಡೆದು ಶಿಕ್ಷಣ ನೀಡುತ್ತೇವೆ ಎಂದು ಸಮಾಜದಿಂದ ದಾನ ಪಡೆದ ಹಣದಲ್ಲಿ ಐಷಾರಾಮಿ ಜೀವನ ನಡೆಸಿದ ಇವರು ಸುಳ್ಳು ಲೆಕ್ಕ ನೀಡಿದರೆ ಹೋರಾಟಕ್ಕಿಳಿಯಬೇಕಾಗುತ್ತದೆ ಎಂದು ಎಚ್ಚರಿಕೆ ಸಹ ನೀಡಿದರು.

ವಚನಾನಂದ ಸ್ವಾಮೀಜಿಯನ್ನು ಉಚ್ಛಾಟನೆಗೊಳಿಸಬೇಕೆಂಬ ಪ್ರಯತ್ನ ಈಡೇರದ ಕಾರಣ ಪೋಕ್ಸೋ ಕೇಸ್ ದಾಖಲಿಸುವ ಮೂಲಕ ನಮ್ಮ ವಿರುದ್ಧ ಷಡ್ಯಂತರ ನಡೆಸುತ್ತಿರುವ ಕೆಲವರಿಗೆ ಸಮಾಜ ತಕ್ಕ ಪಾಠ ಕಲಿಸುತ್ತದೆ ಹಾಗೂ ಅವರನ್ನು ಪೀಠದಿಂದ ಹೊರ ಹಾಕುವ ಕಾಲ ದೂರವಿಲ್ಲ ಎಂದರು. ಲೆಕ್ಕ ಕೊಡಿ ಸಮಿತಿ ಅಧ್ಯಕ್ಷ ಹೊಳೆಸಿರಿಗೆರೆ ಪರಮೇಶ್ವರಗೌಡ, ಮಾಜಿ ಶಾಸಕ ನಂದಿಹಳ್ಳಿ ಹಾಲಪ್ಪ , ಬಾದಾಮಿ ಮೃತ್ಯುಂಜಯ, ಅಂಗಡಿ ಪಂಪಾಪತಿ, ಗಡಿಮಾಕುಂಟೆ ಸಿದ್ದೇಶಣ್ಣ, ಪ್ರಕಾಶ್, ಎನ್.ಗೋಪಿ, ಮುಖೇಶ್ ಇತರರಿದ್ದರು.