ಪಂಚಮಸಾಲಿ ಅಧ್ಯಕ್ಷ ವಿರುದ್ಧ ಅವಿಶ್ವಾಸ ನಿರ್ಣಯ

ಸಭೆಯಲ್ಲಿ ಮಾತನಾಡಿದ ರಾಜ್ಯ ಉಪಾಧ್ಯಕ್ಷ ದೇವರಮನಿ ಶಿವಶರಣ, ರಾಜ್ಯದಲ್ಲಿ ಸಮುದಾಯವೇ ತಲೆತಗ್ಗಿಸುವಂತೆ ಸೋಮನಗೌಡ ಪಾಟೀಲ್ ವರ್ತಿಸಿದ್ದಾರೆ. ಸಮುದಾಯವನ್ನು ಟೀಕಿಸಲು ಮಾಧ್ಯಮಗಳನ್ನು ಬಳಸಿಕೊಂಡು ಸಣ್ಣತನ ಪ್ರದರ್ಶಿಸಿರುವ ಅವರು ತಮ್ಮ ನಿರ್ಣಯದ ಮೂಲಕ ಪದಾಧಿಕಾರಿಗಳನ್ನೇ ಉಚ್ಚಾಟಿಸಿರುವುದಾಗಿ ಬಿಂಬಿಸುತ್ತಿದ್ದಾರೆ ಎಂದು ತೀವ್ರವಾಗಿ ಕಿಡಿಕಾರಿದರು.

ರಾಜ್ಯ ಸಮಿತಿಯ ಕಾನೂನು ಸಲಹೆಗಾರ ಎಂ. ಸೋಮಶೇಖರ ಕೋತ್ತಂಬರಿ ಮಾತನಾಡಿ, ಸಮುದಾಯವನ್ನು ವಿರೋಧಿಸುತ್ತಿರುವ ಹಾಗೂ ಯಾವುದೇ ಸಂಘಟನೆಯಲ್ಲಿ ತೊಡಗಿಕೊಳ್ಳದೆ, ಸದಸ್ಯತ್ವವೇ ಇಲ್ಲದ ವ್ಯಕ್ತಿಯೊಬ್ಬ ಅಕ್ರಮ ಕೂಟವನ್ನು ಕಟ್ಟಿಕೊಂಡು ಸಮಾಜವನ್ನು ವಿಭಜಿಸುವ ಹುನ್ನಾರ ನಡೆಸಿದ್ದಾರೆ. ಈಗಾಗಲೇ ನಿರ್ಣಯಿಸಿದಂತೆ ಅವಿಶ್ವಾಸ ಮಂಡನೆಯ ನೋಟಿಸ್ ನೀಡಲಾಗುವುದು, ಏಳು ದಿನಗಳ ಒಳಗಾಗಿ ಉತ್ತರಿಸಬೇಕು. ತಪ್ಪಿದ್ದಲ್ಲಿ ಮುಂದಿನ ನಿರ್ಧಾರ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಿದರು.

ರಾಜ್ಯ ಮಾಜಿ ಅಧ್ಯಕ್ಷ ಬಸವರಾಜ ದಿಂಡೂರು ಮಾತನಾಡಿ, ಸಂಘದ ನಿರ್ಣಯಗಳನ್ನು ಧಿಕ್ಕರಿಸಿ, ಸಂಘವನ್ನು ಸ್ವಾರ್ಥಕ್ಕೆ ಬಳಸಿಕೊಳ್ಳುವ ವ್ಯಕ್ತಿ ಅಧ್ಯಕ್ಷರಾಗಲು ಅನರ್ಹರು. ಸಮುದಾಯದಲ್ಲಿ ಗೊಂದಲ ಸೃಷ್ಟಿಸಲು ಪಟ್ಟಭದ್ರ ಹಿತಾಸಕ್ತಿಗಳು ಹಾಗೂ ಕಾಣದ ಕೈಗಳು ಕೆಲಸ ಮಾಡುತ್ತಿವೆ. ಸಮುದಾಯದ ನೈತಿಕ ಸ್ಥೈರ್ಯ ಕುಗ್ಗಿಸಲು ಯತ್ನಿಸುತ್ತಿರುವವರಿಗೆ ಪಾಠ ಕಲಿಸಲಾಗುವುದು ಎಂದರು.

ಸಭೆಯಲ್ಲಿ ರಾಜ್ಯ ಪ್ರಧಾನ ಕಾರ್ಯದರ್ಶಿ ಪರಮೇಶ್ವರ ಪಟ್ಟಣಶೆಟ್ಟಿ, ನಿಕಟಪೂರ್ವ ಅಧ್ಯಕ್ಷ ಬಾವಿ ಬೆಟ್ಟಪ್ಪ, ಜೆ.ಪಿ. ಪಾಟೀಲ್, ನಾಗನಗೌಡ್ರು, ಪ್ರಮುಖರಾದ ಹನಸಿ ಸಿದ್ದೇಶ, ಬಿ.ಸಿ. ಉಮಾಪತಿ, ಜ್ಯೋತಿ ಪ್ರಕಾಶ, ಚಂದ್ರಶೇಖರ ಪೂಜಾರ್, ಸಿದ್ದೇಶ ಬೇಗೂರ್, ಪಿ.ಜಿ. ಶಿವಕುಮಾರ, ಚಂದ್ರಪ್ಪ ಶಿವಮೊಗ್ಗ, ಮಲ್ಲಣ್ಣ ಬೋಸನೂರು, ಸಿ.ಸಿ. ಕರಡಿಕಲ್, ಮಂಜುನಾಥ ಗೌಡ, ಅಕ್ಕಿ ಶಿವಣ್ಣ, ಶಿವಕುಮಾರಗೌಡ, ವೈ. ಮಲ್ಲಿಕಾರ್ಜುನ, ಇಟ್ಟಿಗಿ ಕಲ್ಲೇಶಪ್ಪ, ಬಾವಿ ರವೀಂದ್ರ, ಗುರುಬಸವರಾಜ ಸೊನ್ನದ್, ಎ. ಸಂತೋಷ, ಬಂಡಿಹಳ್ಳಿ ಮಂಜುನಾಥ, ಗುರುರಾಜ, ಜೋತ್ಯಪ್ಪ ಹಾಗೂ ಫೋಟೋ ವೀರೇಶ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.