ರೈಲ್ವೆ ಯೋಜನೆ : ರೈಲ್ವೆ ಹೋರಾಟ ಸಮಿತಿಗಳ ಮುಖಂಡರ ಬೇಡಿಕೆಗಳಂತೆ ಬಳ್ಳಾರಿ, ಹೊಸಪೇಟೆಯಿಂದ ವಯಾ ಕೊಟ್ಟೂರು, ಹರಿಹರ ಮಾರ್ಗವಾಗಿ ದಕ್ಷಿಣ ಕನ್ನಡ (ಮಂಗಳೂರು) ಜಿಲ್ಲೆಗೆ ರೈಲು ಸಂಚರಿಸಿಬೇಕಿದೆ. ಇದರಿಂದ ಹಂಪಿ ಪ್ರವಾಸೋದ್ಯಮ ಅಭಿವೃದ್ಧಿಯಾಗಲಿದೆ. ಕೊಪ್ಪಳ, ಹೊಸಪೇಟೆ, ಬಳ್ಳಾರಿಯಿಂದ ವಯಾ ಗುಂತಕಲ್ ಮಾರ್ಗವಾಗಿ ವಂದೇ ಭಾರತ್ ರೈಲು ಬಿಡುವಂತೆ ಕೋರಲಾಗಿದೆ. ಜತೆಗೆ ಈ ಮೊದಲು ಇದ್ದ ಬೆಳಗಾವಿ ಮುನುಗುರು ಎಕ್ಸ್ಪ್ರೆಸ್ ರೈಲು ಪುನಃ ಆರಂಭಿಸಬೇಕಾಗಿದೆ. ಇದರಿಂದ ಕಲ್ಯಾಣ ಕರ್ನಾಟಕದ ಧಾರ್ಮಿಕ ಕ್ಷೇತ್ರ ಮಂತ್ರಾಲಯಕ್ಕೂ ಅನುಕೂಲ ಕಲ್ಪಿಸಿದಂತಾಗಲಿದೆ. ಅಲ್ಲದೆ, ಬಳ್ಳಾರಿ ನಗರದಲ್ಲಿ ಬೈಪಾಸ್ ರೈಲು ನಿಲ್ದಾಣವಾಗಬೇಕಾಗಿದೆ. ಬೆಂಗಳೂರು-ದಾವಣಗೆರೆ ರೈಲು ಸಂಚಾರ ಆರಂಭವಾದಲ್ಲಿ ಬಳ್ಳಾರಿಯಿಂದಲೂ ವಯಾ ಚಳ್ಳಕೆರೆ ಮಾರ್ಗವಾಗಿ ಬೆಂಗಳೂರು ಸಂಚರಿಸುವ ರೈಲುಗಳ ಸಂಖ್ಯೆ ಹೆಚ್ಚಲಿದೆ. ಈಗಾಗಲೇ ಕೆಲವೊಂದು ರೈಲುಗಳು ನಿಲ್ದಾಣಕ್ಕೆ ಹೋಗದೆ, ಬೈಪಾಸ್ ಮೂಲಕ ಸಂಚರಿಸುತ್ತಿದ್ದು, ರೈಲಲ್ಲಿದ್ದ ಪ್ರಯಾಣಿಕರು ಇಳಿದು, ಹತ್ತಲು ಸಮಸ್ಯೆ ಎದುರಿಸುತ್ತಿದಾರೆ. ಹೀಗಾಗಿ ಬೈಪಾಸ್ ರೈಲು ನಿಲ್ದಾಣ ನಿರ್ಮಿಸಬೇಕಾಗಿದೆ.
