ಮಳೆ ಅಭಾವ ಬಿತ್ತನೆ ಕುಂಠಿತ

ಜೂನ್ ಮುಗಿದು, ಜುಲೈ ತಿಂಗಳ ಕೊನೆಯ ವಾರ ಬಂದರೂ ಭತ್ತ, ಮೆಣಸಿನಕಾಯಿ, ಮೆಕ್ಕೆಜೋಳ ನಿರೀಕ್ಷಿತ ಮಟ್ಟದಲ್ಲಿ ಸಾಧ್ಯವಾಗಿಲ್ಲ. ಈಗಾಗಲೇ ಈ ಮೂರು ಬೆಳೆಯ ಬಿತ್ತನೆ ಅವಧಿ ಮುಗಿಯುತ್ತ ಬರುತ್ತಿದ್ದು, ರೈತರು ಪರ್ಯಾಯ ಬೆಳೆಯತ್ತ ಅಕಾಶದತ್ತ ಕಣ್ಣು ನೆಟ್ಟಿದ್ದಾರೆ. ಆಗೊಮ್ಮೆ ಈಗೊಮ್ಮೆ ಬಂದು ಹೋಗುತ್ತಿರುವ ಮಳೆ ಸಾಕಾಗುತ್ತಿಲ್ಲ. ಈ ಬಾರಿಯ ಮುಂಗಾರು ಹಂಗಾಮಿನಲ್ಲಿ ಜಿಲ್ಲೆಯಲ್ಲಿ ಒಟ್ಟು 1,59,546 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಗುರಿ ಹೊಂದಲಾಗಿತ್ತು. ಈವರೆಗೆ ಕೇವಲ 61,400 ಹೆಕ್ಟೇರ್ (ಶೇ. 38.48)ರಷ್ಟು ಪ್ರದೇಶದಲ್ಲಿ ಮಾತ್ರ ಬಿತ್ತನೆ ಪೂರ್ಣಗೊಂಡಿದೆ.

ಜನವರಿಯಿಂದ ಜುಲೈರವರೆಗಿನ ಅವಧಿಯಲ್ಲಿ ಜಿಲ್ಲೆಯ ಸಾಮಾನ್ಯ ಮಳೆ 183.4 ಮಿ.ಮೀ ಆಗಬೇಕಿತ್ತು. ಆದರೆ, ಕೇವಲ 151 ಮಿ.ಮೀ ಮಳೆಯಾಗಿದ್ದು, ಶೇ.18 ರಷ್ಟು ಅಭಾವ ದಾಖಲಾಗಿದೆ. ಜುಲೈ ತಿಂಗಳಲ್ಲಿ 37.3 ಮಿ.ಮೀ ಸಾಧಾರಣ ಮಳೆಯಾಗಬೇಕಿದ್ದರೂ ಬಿದ್ದಿದ್ದು ಕೇವಲ 10.3 ಮಿ.ಮೀ ಶೇ. 72ರಷ್ಟು ಕೊರತೆಯಾಗಿದ್ದ ಬಿತ್ತನೆಗೆ ಹಿನ್ನಡೆಯಾಗಿದೆ. ಒಂದೆರಡು ದಿನ ಮಳೆ ಬಂತಾದರೂ ಅದು ಬಿತ್ತನೆಗೆ ಸಾಕಾಗುವುದಿಲ್ಲ. ಅಲ್ಲಲ್ಲಿ ಕೆಲವು ಕಡೆ ಮಳೆ ಬಂದಿರುವುದು ಬಿಟ್ಟರೆ ಜಿಲ್ಲಾದ್ಯಂತ ಚುರುಕ ಮಳೆ ಆಗಿಲ್ಲ.

ಅಲ್ಪ ಅವಧಿ ಬೆಳೆಗೆ ಸಲಹೆ : ಮಳೆ ಕೊರತೆ ಕಾರಣ ಕಡಿಮೆ ಅವಧಿಯಲ್ಲಿ ಬೆಳೆಯಬಹುದಾದ ಕೃಷ್ಣ ಪ್ರಭಾ ರುದ್ರ ತಳಿಯ ಸಸಿಗಳನ್ನು ತಯಾರಿಸಿ ಮೆಣಸಿನಕಾಯಿ ಸಸಿ ಬೆಳೆಯಲು ಕೃಷಿ ಇಲಾಖೆ ಸಲಹೆ ನೀಡಿದೆ. ಜತೆಗೆ ಅಲ್ಪಾವಧಿ ಹಾಗೂ ಮಾಧ್ಯಮಾವಧಿ ಬೆಳೆಗೆ ಒತ್ತು ನೀಡಲಾಗುತ್ತಿದೆ. ಬೇಗನೇ ಫಸಲು ಬರುವ ಭೀಮಾ ರೆಡ್ ಈರುಳ್ಳಿ , ಕೊತ್ತಂಬರಿ, ಚೌಳೆಕಾಯಿ, ಅಜ್ವಾನ, ಬೆಂಡಿಕಾಯಿ, ಬದನೆ, ಕುಂಬಳ, ಸೌತೆಕಾಯಿ ಹಾಗೂ ಚೆಂಡು ಹೂ ಬೆಳೆಯಲು ರೈತರಿಗೆ ಮನವರಿಕೆ ಮಾಡುತ್ತಿದ್ದಾರೆ. ಆದರೆ, ಕಳೆದ ಕೆಲ ವರ್ಷಗಳಿಂದ ವಾಣಿಜ್ಯ ಬೆಳೆ ಬೆಳೆದು ಫಸಲು ಕಂಡಿರುವ ರೈತರು ನಿರಾಸಕ್ತಿ ತೋರುತ್ತಿದ್ದಾರೆ.

ವಿಮೆಗೂ ನಿರಾಸಕ್ತಿ : ಜಿಲ್ಲೆಯಲ್ಲಿ ಕಳೆದ ವರ್ಷಗಳಿಂದ ವಿಮೆಗೆ ಹೆಚ್ಚಿನ ರೈತರು ನೋಂದಯಿಸಿಕೊಳ್ಳುತ್ತಿದ್ದರು. 2024-25 ಸಾಲಿನಲ್ಲಿ 15,974 ರೈತರು ನೋಂದಯಿಸಿಕೊಂಡಿದ್ದು, 5,401 ಫಲಾನುಭವಿಗಳಿಗೆ 9.11 ಕೋಟಿ ರೂ. ವಿಮೆ ಪರಿಹಾರ ಇತ್ಯರ್ಥಪಡಿಸಲಾಗಿದೆ. 2025-26 ಮುಂಗಾರಿನಲ್ಲಿ 11,710 ರೈತರು ನೋಂದಾಯಿಸಿದ್ದು, 5,017 ಫಲಾನುಭವಿಗಳಿಗೆ 6.31 ಕೋಟಿ ರೂ. ಬಿಡುಗಡೆಯಾಗಿದೆ. ಪ್ರಸ್ತಕ ಸಾಲಿನಲ್ಲಿ ಈವರೆಗೆ 2,690ರೈತರು ನೋಂದಾಯಿಸಿಕೊಂಡಿದ್ದು, ನೋಂದಣಿ ಪ್ರಕ್ರಿಯೆ ಹಂತದಲ್ಲಿದೆ. ಮೆಕ್ಕೆಜೋಳ, ಸೂರ್ಯಕಾಂತಿ, ಹತ್ತಿ ಸೇರಿದಂತೆ ಕೆಲ ಬೆಳೆಗಳಿಗೆ ಜು.31ರಂದು ನೋಂದಣಿಗೆ ಕೊನೆಯ ದಿನವಾಗಿದೆ.

ಗುಳೆಗೆ ಸಿದ್ಧತೆ : ಜಲಾಯನ ಪ್ರದೇಶದಲ್ಲಿ ನಿರೀಕ್ಷಿತ ಮಟ್ಟದಲ್ಲಿ ಮಳೆಯಾಗದೆ ಇರುವುದರಿಂದ ಈವರೆಗೆ ಜಲಾಶಯ ಭರ್ತಿಯಾಗಿಲ್ಲ. ಕಾಲುವೆ ನಂಬಿ ಜಮೀನು ಗುತ್ತಿಗೆ ಪಡೆದ ರೈತರು ಕಾಲುವೆಗೆ ನೀರು ಹರಿಸದಿದ್ದರೆ ಬೆಂಗಳೂರಿಗೆ ಗುಳೆ ಹೋಗಲು ಸಿದ್ಧತೆ ಕೈಗೊಂಡಿದ್ದಾರೆ. ಈಗಾಗಲೇ, ಸಿರಗುಪ್ಪದ ಕೆಲ ಭಾಗದಲ್ಲಿ ಮಳೆ ನಂಬಿ ಮೆಣಸಿನಕಾಯಿ ಬಿತ್ತನೆ ಮಾಡಿದ ರೈತರು ಮಳೆ ಬಾರದೆ, ಬಿತ್ತಿರುವ ಬೆಳೆ ಕೂಡ ಬೆಳೆದಿಲ್ಲ. ಇದರಿಂದ ಜಮೀನು ಹಾಗೂ ಮನೆ ಬಿಟ್ಟು ಮಹಾನಗರಗಳತ್ತ ವಲಸೆ ಹೊರಟಿದ್ದಾರೆ ಎಂದು ರೈತ ಶಿವಪ್ಪ ತಿಳಿಸಿದರು.