ಕೃಷ್ಣ ಜನ್ಮಾಷ್ಟಮಿ ಸಂಭ್ರಮ

ಉತ್ಸವದ ಭಾಗವಾಗಿ ಮಹಿಳೆಯರು ಶ್ರೀಕೃಷ್ಣನ ಉತ್ಸವ ಮೂರ್ತಿ ಉಯ್ಯಲೆಯಲ್ಲಿ ತೂಗಿಸಿ ಲಾಲಿ ಹಾಡುಗಳನ್ನು ಹಾಡಿದರು. ಮಕ್ಕಳು ನಾನಾ ಭಕ್ತಿಗೀತೆ ಹಾಗೂ ದಾಸರ ಕೀರ್ತನೆ ಪ್ರಸ್ತುತಪಡಿಸಿ ಗಮನ ಸೆಳೆದರು. ಬಳಿಕ ಶ್ರೀಕೃಷ್ಣನ ಉತ್ಸವ ಮೂರ್ತಿಯನ್ನು ನಗರ ಪ್ರದಕ್ಷಿಣೆಯ ಮೂಲಕ ಮನೆ ಮನೆಗೆ ಕರೆದೊಯ್ಯಲಾಯಿತು. ಮನೆ ಬಾಗಿಲಿಗೆ ಬಂದ ಮೂರ್ತಿಗೆ ಭಕ್ತರು ಹಾಲು, ಮೊಸರು ಅರ್ಪಿಸಿ ಪೂಜೆ ಸಲ್ಲಿಸಿದರು. ಇದೇ ವೇಳೆ ಮಹಿಳೆಯರು ಕೋಲಾಟ ಆಡುತ್ತಾ ಭಕ್ತಿಪರವಶರಾದರು. ದೇಗುಲದ ಮುಂಭಾಗದಲ್ಲಿ ಗಾಯಕ ಮೈಸೂರು ರಾಮಚಂದ್ರ ಆಚಾರ್‌ಅವರಿಂದ ಏರ್ಪಡಿಸಲಾಗಿದ್ದ ‘ದಾಸವಾಣಿ’ ಸಂಗೀತ ಕಾರ್ಯಕ್ರಮ ಭಕ್ತರ ಮನಸೂರೆಗೊಳಿಸಿತು.