ರಾಮುಲು ವಿರುದ್ಧ ನಾನೇ ಸ್ಪರ್ಧಿಸುವೆ

ನಗರದ ಕಮ್ಮಾ ಭವನದಲ್ಲಿ ಆಯೋಜಿಸಿದ್ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು. ಸಿಎಂ ಡಿ.ಕೆ.ಶಿವಕುಮಾರ್ ಸೇರಿದಂತೆ ಪಕ್ಷದ ಯಾವ ನಾಯಕರೂ ನನ್ನ ರಾಜೀನಾಮೆ ಕೇಳಿರಲಿಲ್ಲ. ಹತ್ತು ದಿನಗಳ ಮುಂಚೆಯೇ ನಾನು ರಾಜೀನಾಮೆ ನೀಡಿದ್ದೆ. ಪಕ್ಷಕ್ಕೆ ಮುಜುಗರವಾಗಬಾರದು ಎಂಬ ಒಂದೇ ಕಾರಣಕ್ಕೆ ಈ ತ್ಯಾಗ ಮಾಡಿದ್ದೇನೆ. ಆದರೆ, ನನ್ನ ದೌರ್ಬಲ್ಯವೆಂದು ತಿಳಿಯಬೇಡಿ ಎಂದರು. ಜಿಲ್ಲೆಯಲ್ಲಿ ಶಾಸಕ ಜಿ.ಜನಾರ್ದನ ರೆಡ್ಡಿ, ಮಾಜಿ ಸಚಿವ ಬಿ.ಶ್ರೀರಾಮುಲು ಚಲಾವಣೆ ಇಲ್ಲದ ನಾಣ್ಯಗಳು ಮತ್ತು ರಿಜೆಕ್ಟ್ ಪೀಸ್‌ಗಳು. ನನ್ನ ಕಣ್ಣೀರಿನ ಬಗ್ಗೆ ಹೀಯಾಳಿಸುವ ಇಬ್ಬರೂ ಭ್ರಷ್ಟಾಚಾರದ ಪಾದಯಾತ್ರೆ ನಡೆಸುತ್ತಿದ್ದಾರೆ ಎಂದು ಅಕ್ರೋಶ ಹೊರಹಾಕಿದರು.

ಜನಾರ್ದನರೆಡ್ಡಿ ಗಣಿಧಣಿನೋ ಅಥವಾ ‘ಲೂಟಿ ಅಣ್ಣ’ನೋ ಗೊತ್ತಿಲ್ಲ. ಬಳ್ಳಾರಿಗೆ ನಾನೇ ಮನೆಯ ಮಗ. ನಮ್ಮದು ಸಂಸ್ಕಾರವಂತ ಕುಟುಂಬ. ಸುಳ್ಳುಗಳನ್ನು ಹೇಳಿಕೊಂಡು ಪಾದಯಾತ್ರೆ ಮಾಡುತ್ತಿರುವ ಭೂತದ ಬಾಯಲ್ಲಿ ಭಗವದ್ಗೀತೆ ಬಂದಂತಿದೆ. ನಿಮ್ಮ ಜಾತಕ ಮತ್ತು ಬಂಡವಾಳ ನನ್ನ ಕೈಯಲ್ಲಿದೆ. ನಾನು ಕೇವಲ ಆರೋಪಿ. ಆದರೆ, ನೀವು ಈಗಾಗಲೇ ಶಿಕ್ಷೆ ಅನುಭವಿಸಿದ ಅಪರಾಧಿ. ಮನುಸ್ಮೃತಿ ಹಾಗೂ ಶಂಭೂಕನ ವಿಷಯದಲ್ಲಿ ಜ್ಞಾನವಿಲ್ಲದ ರೆಡ್ಡಿ, ಧೈರ್ಯವಿದ್ದರೆ ಮಾಧ್ಯಮಗಳ ಎದುರು ಬಹಿರಂಗ ಚರ್ಚೆಗೆ ಬರಲಿ ಎಂದು ಸವಾಲು ಹಾಕಿದರು.

ಸಂಸದ ಈ.ತುಕಾರಾಮ್ ಮಾತನಾಡಿ, ಶಾಸಕ ಜಿ.ಜನಾರ್ದನ ರೆಡ್ಡಿ ಅವರಿಗೆ ನಿಜಕ್ಕೂ ಧೈರ್ಯವಿದ್ದರೆ ಗಂಗಾವತಿ ಕ್ಷೇತ್ರಕ್ಕೆ ರಾಜೀನಾಮೆ ನೀಡಿ, ಮತ್ತೆ ಸ್ಪರ್ಧಿಸಿ ಗೆದ್ದು ತೋರಿಸಲಿ. ರೆಡ್ಡಿ ಬಳ್ಳಾರಿ ಕ್ಷೇತ್ರದಲ್ಲಿರುವಾಗಲೇ ಲೋಕಸಭಾ ಚುನಾವಣೆಯಲ್ಲಿ ಬಹಳ ಅಂತರದಿಂದ ಗೆಲುವು ಸಾಧಿಸಿದ್ದೇನೆ. ಮಾಜಿ ಸಿಎಂ ಬಿ.ಎಸ್.ಯಡಿಯೂರಪ್ಪ ಅವರು ಕಣ್ಣೀರು ಹಾಕುವಂತೆ ಮಾಡಿದ್ದು ಇದೇ ರೆಡ್ಡಿ ಎಂಬುದು ಯಾರೂ ಮರೆಯಬಾರದು. ಬಿಜೆಪಿ ಮಾಡುತ್ತಿರುವ ಈ ಪಾದಯಾತ್ರೆಯಿಂದ ಕಾಂಗ್ರೆಸ್ ಸರ್ಕಾರಕ್ಕೆ ಯಾವುದೇ ಧಕ್ಕೆಯಿಲ್ಲ ಎಂದರು.

ರಾಜ್ಯಸಭಾ ಸದಸ್ಯ ನಾಸೀರ್ ಹುಸೇನ್ ಮಾತನಾಡಿ, ಜಿಲ್ಲೆಯಲ್ಲಿ ಬಿಜೆಪಿ ನಾಯಕರು ’ರಿಜೆಕ್ಟ್ ಪೀಸ್’ಗಳಾಗಿದ್ದಾರೆ. ವಾಲ್ಮೀಕಿ ನಿಗಮದ ವಿಚಾರವಾಗಿ ಚರ್ಚೆಗೆ ಆಹ್ವಾನಿಸಿದರೂ ಬಿಜೆಪಿ ನಾಯಕರು ಬರಲಿಲ್ಲ. ಏಕೆಂದರೆ ಅವರ ಬಳಿ ಯಾವುದೇ ಸೂಕ್ತ ದಾಖಲೆಗಳಿಲ್ಲ. ಮುಂಬರುವ ದಿನಗಳಲ್ಲಿ ಮತ್ತೊಮ್ಮೆ ಅಧಿವೇಶನ ನಡೆಸಲಿದ್ದು, ಧೈರ್ಯವಿದ್ದರೆ ಚರ್ಚೆಗೆ ಬರಲಿ, ಜನರ ಬಳಿಯೇ ಸತ್ಯ ತಿಳಿಸೋಣ ಎಂದು ಸವಾಲು ಎಸೆದರು. ಶಾಸಕರಾದ ಜೆ.ಎನ್.ಗಣೇಶ್, ಅನ್ನಪೂರ್ಣ, ಕಾಂಗ್ರೆಸ್ ಜಿಲ್ಲಾಧ್ಯಕ್ಷ ಅಲ್ಲಂ ಪ್ರಶಾಂತ್, ಮೇಯರ್ ಪಿ.ಗಾದೆಪ್ಪ, ಲಿಡ್ಕರ್ ಅಧ್ಯಕ್ಷ ಮುಂಡರಗಿ ನಾಗರಾಜ, ಮುಖಂಡರಾದ ವೆಂಕಟೇಶ್ ಹೆಗಡೆ, ಎಚ್.ತಿಮ್ಮನಗೌಡ, ಪಿ.ಜಗನ್ನಾಥ್ ಇದ್ದರು.