ಸಂಡೂರು ಬಂದ್‌ಗೆ ಉತ್ತಮ ಪ್ರತಿಕ್ರಿಯೆ

ಪಟ್ಟಣದಲ್ಲಿ ಅಂಗಡಿ-ಮುಂಗಟ್ಟುಗಳು ಸಂಪೂರ್ಣ ಮುಚ್ಚಿದ್ದವು. ಸಾರಿಗೆ ಬಸ್‌ಗಳು ಮತ್ತು ಖಾಸಗಿ ವಾಹನಗಳ ಸಂಚಾರ ಪಟ್ಟಣದಲ್ಲಿ ಸ್ತಬ್ಧಗೊಂಡಿತ್ತು. ಕೂಡ್ಲಿಗಿ-ಬಳ್ಳಾರಿಯಿಂದ ಬರುವ ಬಸ್‌ಗಳನ್ನು ಬಳ್ಳಾರಿ ಮತ್ತು ಹೊಸಪೇಟೆ ಬೈಪಾಸ್ ರಸ್ತೆ ಮೂಲಕ ಸಂಚರಿಸಲು ಪೊಲೀಸ್ ಇಲಾಖೆ ಕ್ರಮ ಕೈಗೊಂಡಿತ್ತು. ಅದಿರು ಸಾಗಣೆ ಲಾರಿಗಳು ಎಂದಿನಂತೆ ಬೈಪಾಸ್ ರಸ್ತೆಯಲ್ಲಿ ಸಂಚರಿಸಿದವು.

ಬಂದ್‌ಗೆ ಕರೆನೀಡಿದ್ದ ಸಂಘಟನೆಗಳು ಪದಾಧಿಕಾರಿಗಳು ಪಟ್ಟಣದ ವಿಜಯ ಸರ್ಕಲ್‌ನಲ್ಲಿ ಸಭೆ ನಡೆಸಿ ಸಚಿವರಾದ ಎಚ್.ಸಿ.ಮಹದೇವಪ್ಪ, ಜಿ.ಪರಮೇಶ್ವರ್, ಪ್ರಿಯಾಂಕ್ ಖರ್ಗೆ ಅವರಿಂದಾಗಿ ಮಾದಿಗರಿಗೆ ಒಳಮೀಸಲಾತಿ ಸಿಗಲು ವಿಳಂಬವಾಗುತ್ತಿದೆ ಎಂದು ಆರೋಪಿಸಿದರು.

ದಲಿತ ಸಂಘರ್ಷ ಸಮಿತಿ ಸಂಚಾಲಕ ಹನುಮಂತರೆಡ್ಡಿ ಮಾತನಾಡಿ, ಸರ್ವೊಚ್ಚ ನ್ಯಾಯಾಲಯ 2024 ಆ.1ರಂದು ಒಳಮೀಸಲಾತಿ ಜಾರಿಗೊಳಿಸುವ ಅಧಿಕಾರ ರಾಜ್ಯ ಸರ್ಕಾರಗಳಿದೆ ಎಂದು ತಿಳಿಸಿದ್ದರೂ ಸರ್ಕಾರ ವಿಳಂಬ ಧೋರಣೆ ಅನುಸರಿಸುತ್ತಿದೆ. ಬುದ್ಧಿಜೀವಿಗಳು 35 ವರ್ಷಗಳಿಂದ ಪರಿಶಿಷ್ಟ ಜಾತಿಯಲ್ಲಿ ಒಳಮೀಸಲಾತಿಗೆ ಒತ್ತಾಯಿಸಿ ಹೋರಾಡುತ್ತಾ ಬಂದಿದ್ದಾರೆ. ಕಾಂಗ್ರೆಸ್, ಬಿಜೆಪಿ, ಜೆಡಿಎಸ್ ಪಕ್ಷಗಳು ನಮಗೆ ಮೋಸ ಮಾಡಿವೆ ಎಂದು ದೂರಿದರು.

ಮಾಜಿ ಸಂಚಾಲಕ ರಾಮಕೃಷ್ಣ ಹೆಗಡೆ ಮಾತನಾಡಿ, 1996ರಲ್ಲಿ ಹೋರಾಟಕ್ಕೆ ಚಾಲನೆ ನೀಡಲಾಯಿತು. ಪರಿಶಿಷ್ಟ ಜಾತಿಯಲ್ಲಿ 101 ಜಾತಿಗಳಿವೆ. ಆದ್ದರಿಂದ 2008ರಲ್ಲಿ ನ್ಯಾಯಮೂರ್ತಿ ಎ.ಜಿ.ಸದಾಶಿವ ಆಯೋಗ ರಚಿಸಿ, ನಂತರ ವರದಿ ಕೊಟ್ಟರೂ ವಿಳಂಬ ನೀತಿಯನ್ನು ಸರ್ಕಾರಗಳು ಅನುಸರಿಸುತ್ತಾ ಬಂದಿವೆ. ಶೇ.6ರಷ್ಟು ಮೀಸಲಾತಿ ನಮಗೆ ಕೊಟ್ಟು ಬಿಡಿ ಉಳಿದಿದ್ದನ್ನು ನೀವು ಯಾರಿಗಾದರೂ ಕೊಡಿ ಎಂದರು.

ಆದಿ ಜಾಂಬವ ಸಂಘದ ಸಂಚಾಲಕ ವಿನೋದ್ ಕುಮಾರ್ ಮಾತನಾಡಿ, ಮಾ.27ರಂದು ಒಳಮೀಸಲಾತಿ ಕೊಟ್ಟ ನಂತರವೇ 54 ಸಾವಿರ ಹುದ್ದೆಗಳನ್ನು ಭರ್ತಿ ಮಾಡಬೇಕೆಂದು ಒತ್ತಾಯಿಸಿದರು. ಆದಿಜಾಂಬವ ಸಂಘದ ಅಧ್ಯಕ್ಷ ನಿಂಗಪ್ಪ ಐಹೊಳೆ, ಅಂಬೇಡ್ಕರ್ ಸಂಘದ ಅಧ್ಯಕ್ಷ ಎಂ.ಶಿವಲಿಂಗಪ್ಪ, ಪ್ರಮುಖರಾದ ಹೊಸಳ್ಳಿ ತಾಯಪ್ಪ, ಮರಿಸ್ವಾಮಿ, ಕೊಂಡಾಪುರ ದುರುಗಮ್ಮ, ಬಸವರಾಜ ಬ್ರೂಸ್ಲಿ, ಎಲ್.ಎಚ್.ಶಿವಕುಮಾರ್, ದೇವದಾಸ್, ಕಮ್ಮತ್ತೂರು ಮಲ್ಲೇಶ್, ರಾಜು, ಸತೀಶ ಹೆಗಡೆ, ರಾಜೇಶ್ ಹೆಗಡೆ, ವೈ.ಟಿ.ಜಿ.ಮಲಿಯಪ್ಪ, ಸತೀಶ್, ಹುಲುಗಪ್ಪ ಇತರರಿದ್ದರು.