ಜಿಲ್ಲೆಗೆ ವರ್ಷದಲ್ಲೇ ನಾಲ್ಕು ಹಳಿ

ಕಳೆದ ಫೆಬ್ರವರಿ ತಿಂಗಳಲ್ಲಿ ಬಳ್ಳಾರಿ - ಹೊಸಪೇಟೆ ಮಧ್ಯೆ ಈಗಾಗಲೇ ಡಬ್ಲಿಂಗ್ ಇರುವ ರೈಲ್ವೆ ಹಳಿಗಳೊಂದಿಗೆ 2,372 ಕೋಟಿ ರೂ. ವೆಚ್ಚದಲ್ಲಿ ಮೂರು ಮತ್ತು ನಾಲ್ಕನೇ ರೈಲ್ವೆ ಹಳಿ ನಿರ್ಮಾಣಕ್ಕೆ ಅಸ್ತು ಎಂದಿತ್ತು. ಇದೀಗ ಐದು ತಿಂಗಳಲ್ಲೇ ಕರ್ನಾಟಕ, ಆಂಧ್ರ ನಡುವಿನ ರೈಲು ಸಂಪರ್ಕ ಸರಕು ಸಾಗಣೆಗೆ ವೇಗ ನೀಡುವ ನಿಟ್ಟಿನಲ್ಲಿ ಬಳ್ಳಾರಿ - ಗುಂತಕಲ್ ರೈಲು ವಿಭಾಗದಲ್ಲಿ 1264 ಕೋಟಿ ರೂ. ವೆಚ್ಚದಲ್ಲಿ 3 ಮತ್ತು 4ನೇ ಹಳಿ ನಿರ್ಮಾಣ ಕಾಮಗಾರಿ ಸೇರಿ ಒಟ್ಟು ಒಂದೇ ವರ್ಷದಲ್ಲೇ ಎರಡು ಯೋಜನೆಗಳಿಗೆ 3,636 ಕೋಟಿ ರೂ. ವೆಚ್ಚದ ಕಾಮಗಾರಿಗೆ ಅನುಮೋದನೆ ದೊರೆತಿರುವುದು ರೈಲು ಪ್ರಯಾಣಿಕರಿಗೆ ಸಂತಸ ತಂದಿದೆ.

ಈ ಯೋಜನೆಗಳಿಂದ ಎರಡು ರಾಜ್ಯಗಳ ಕೈಗಾರಿಕಾ ಹಾಗೂ ಪ್ರಯಾಣಿಕ ಸಾರಿಗೆ ಕ್ಷೇತ್ರಕ್ಕೆ ದೊಡ್ಡ ಬಲ ನೀಡಲಿದೆ.

ಬಳ್ಳಾರಿ - ಹೊಸಪೇಟೆ ಹಳಿ ಅನುಕೂಲ : ಗಣಿನಾಡು ಬಳ್ಳಾರಿ-ಹೊಸಪೇಟೆ ಮಧ್ಯೆ ನೈಸರ್ಗಿಕ ಸಂಪತ್ತು ಹೊಂದಿದ್ದು, ಅದಿರು ಗಣಿಗಾರಿಕೆ ಹೇರಳವಾಗಿ ನಡೆಯುತ್ತದೆ. ಜಿಂದಾಲ್ ಸೇರಿ ಹತ್ತಾರು ಕೈಗಾರಿಕೆಗಳು ಇಲ್ಲಿ ನಿರಂತರವಾಗಿ ಕಾರ್ಯನಿರ್ವಹಿಸುತ್ತಿವೆ. ಹೊಸಪೇಟೆಯ ತುಂಗಭದ್ರಾ ಜಲಾಶಯ, ಹಂಪಿಯ ಕಲ್ಲುಗಳಲ್ಲಿ ಅರಳಿರುವ ಸ್ಮಾರಕಗಳನ್ನು ಕಣ್ತುಂಬಿಕೊಳ್ಳಲು ಅವಳಿ ನಗರಗಳಿಗೆ ನಿತ್ಯ ಸಾವಿರಾರು ಜನರು ಭೇಟಿ ನೀಡುತ್ತಾರೆ.

ಇದರಿಂದ ನಗರಗಳ ನಡುವೆಯಿರುವ ಕೈಗಾರಿಕೆಗಳ ಉತ್ಪನ್ನಗಳನ್ನು ಸಾಗಿಸಲು ಸರಕು ಸಾಗಾಣಿಕಾ ಗೂಡ್ಸ್ ರೈಲುಗಳು ಸಂಚಾರ ದಟ್ಟಣೆ ದಿನೇದಿನೆ ಹೆಚ್ಚುತ್ತಿದ್ದು, ಪ್ರಯಾಣಿಕ ರೈಲುಗಳ ಸಂಚಾರಕ್ಕೆ ರೈಲ್ವೆ ಲೈನ್ ಸಿಗದಂತಾಗಿತ್ತು. ಸದ್ಯ, ಹಳಿ ನಿರ್ಮಾಣಗೊಂಡರೆ ಅನುಕೂಲವಾಗಲಿದೆ. ಬಳ್ಳಾರಿ - ಗುಂತಕಲ್ ಹಳಿ ನಿರ್ಮಾಣ : ಬಳ್ಳಾರಿ ಭಾಗದಲ್ಲಿ ಜಿಂದಾಲ್ ಸೇರಿದಂತೆ ಪ್ರಮುಖ ಕೈಗಾರಿಕೆಗಳ ಉತ್ಪನ್ನಗಳು ಹಾಗೂ ಕಚ್ಚಾ ವಸ್ತುಗಳ ಸಾಗಣೆಗೆ ಗೂಡ್ಸ್ ರೈಲುಗಳ ಸಂಚಾರವೇ ಹೆಚ್ಚಾಗಿತ್ತು. ಇದರಿಂದಾಗಿ ಈ ಮಾರ್ಗದಲ್ಲಿ ತೀವ್ರ ರೈಲು ದಟ್ಟಣೆ ಉಂಟಾಗಿ, ಪ್ರಯಾಣಿಕ ರೈಲುಗಳ ಸಂಚಾರಕ್ಕೆ ಮಾರ್ಗ ಸಿಗದೆ ವಿಳಂಬವಾಗುತ್ತಿತ್ತು. ಸಂಚಾರ ದಟ್ಟಣೆ ನಿಯಂತ್ರಿಸಲು ಹೆಚ್ಚುವರಿ ರೈಲು ಲೈನ್ ನಿರ್ಮಿಸಬೇಕು ಎಂಬ ಕೂಗು ವರ್ಷಗಳಿಂದ ಕೇಳಿಬರುತ್ತಿತ್ತು. ಈಗ 3 ಮತ್ತು 4ನೇ ರೈಲು ಹಳಿ ನಿರ್ಮಾಣದಿಂದ ಗೂಡ್ಸ್ ಮತ್ತು ಪ್ರಯಾಣಿಕ ರೈಲುಗಳೆರಡೂ ಸುಗಮವಾಗಿ ಸಂಚರಿಸಲು ಹಾದಿ ಸುಗಮವಾಗಲಿದ್ದು, ಉಭಯ ರಾಜ್ಯಗಳ ಕೈಗಾರಿಕಾ ಮತ್ತು ಸಾರಿಗೆ ಕ್ಷೇತ್ರಕ್ಕೆ ದೊಡ್ಡ ಬಲ ಸಿಕ್ಕಂತಾಗಿದೆ. ಒಟ್ಟಾರೆ ಎರಡು ಯೋಜನೆಗಳಿಂದ ಜಿಲ್ಲೆಯ ರೈಲ್ವೆ ಮಾರ್ಗ 111 ಕಿ.ಮೀ ವಿಸ್ತರಣೆಯಾಗಲಿದ್ದು, 2028-29ರ ವೇಳೆಗೆ ಪೂರ್ಣಗೊಳಿಸುವ ಗುರಿ ಹೊಂದಲಾಗಿದೆ.

ಬಾಕ್ಸ್ : ಬಳ್ಳಾರಿ, ಹೊಸಪೇಟೆ ಹಾಗೂ ಗುಂತಕಲ್ ನಡುವಿನ ರೈಲ್ವೆ ಹಳಿ ನಿರ್ಮಾಣವಾಗುವುದರಿಂದ ಹಂಪಿ, ತುಂಗಭದ್ರ ಜಲಾಶಯ, ಪ್ರವಾಸಿ ತಾಣಗಳ ವೀಕ್ಷಣೆಗೆ ಜನರ ಸಂಖ್ಯೆ ಹೆಚ್ಚಲಿದೆ. ಇನ್ನೂ ಆಂಧ್ರ ಹಾಗೂ ಕರ್ನಾಟಕ ನಡುವಿನ ವ್ಯಾಪಾರ, ವಹಿವಾಟು ಹೆಚ್ಚಲಿದ್ದು, ಪರೋಕ್ಷ ಹಾಗೂ ಪ್ರತ್ಯಕ್ಷವಾಗಿ ಉದ್ಯೋಗ ದೊರೆಯಲಿದೆ. ಕೈಗಾರಿಕೆಗಳ ಉತ್ಪನ್ನಗಳನ್ನು ಬೃಹತ್ ಲಾರಿ ಸೇರಿ ಇತರೆ ಲಘುವಾಹನಗಳಳಲ್ಲಿ ಸಾಗಿಸುವುದರಿಂದ ಪರಿಸರ ಮಾಲಿನ್ಯವಾಗಲಿದೆ. ಸರಕು ಸಾಗಾಣಿಕೆಯಿಂದ ಕೈಗಾರಿಕೆಗಳಿಗೆ ತಗುಲುವ ವೆಚ್ಚವೂ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಿದೆ. ಹಾಗಾಗಿ ಹೆಚ್ಚುವರಿ ರೈಲ್ವೆ ಲೈನ್ ನಿರ್ಮಾಣದಿಂದ ಹಾಗೂ ಕೈಗಾರಿಕೆಗಳ ಉತ್ಪನ್ನಗಳನ್ನು ಗೂಡ್ಸ್ ರೈಲುಗಳಿಂದಲೇ ಸಾಗಿಸುವುದರಿಂದ ಕೈಗಾರಿಕಗಳಿಗೆ ವಾರ್ಷಿಕವಾಗಿ ಕೋಟ್ಯಾಂತರ ರೂ. ಉಳಿತಾಯವಾಗಲಿದೆ.