ವಿವಿ ಅಭಿವೃದ್ಧಿಯ ಅನುದಾನಕ್ಕೆ ಗ್ರಹಣ

42.94 ಕೋಟಿ ರೂ. ಯೋಜನೆ : ಕಲ್ಯಾಣ ಕರ್ನಾಟಕ ಪ್ರದೇಶ ಅಭಿವೃದ್ಧಿ ಮಂಡಳಿ ಕೆಕೆಆರ್‌ಡಿಬಿಯಿಂದ ವಿಶ್ವವಿದ್ಯಾಲಯದ ಸಮಗ್ರ ಅಭಿವೃದ್ಧಿಗೆ ಕಳೆದ ಒಂದು ವರ್ಷದ ಹಿಂದೆಯೇ 42.94 ಕೋಟಿ ರೂ. ಬೃಹತ್ ಅನುದಾನಕ್ಕೆ ಅನುಮೋದನೆ ನೀಡಲಾಗಿತ್ತು. ಇದರಲ್ಲಿ ವಿವಿಯ ಎಲ್ಲ ವಿಭಾಗಗಳ ತರಗತಿಗಳಲ್ಲಿ ಆಧುನಿಕ ಸ್ಪರ್ಶದ ಸ್ಮಾರ್ಟ ಕ್ಲಾಸ್ ವ್ಯವಸ್ಥೆ, ಇದರೊಂದಿಗೆ ಪರಿಸರ ಸ್ನೇಹಿ ಇಂಧನ ಬಳಕೆಗಾಗಿ ಸೋಲಾರ್ ಸಿಸ್ಟ್‌ಂ, ವಿಜ್ಞಾನ ವಿಭಾಗಕ್ಕೆ ಅತ್ಯಾಧುನಿಕ ಸಂಶೋಧನಾ ಉಪಕರಣಗಳ ಅಳವಡಿಕೆ, ವಿದ್ಯಾರ್ಥಿಗಳ ಜಾಗತಿಕ ಮಟ್ಟದ ಮಾಹಿತಿ ಲಭ್ಯತೆಗಾಗಿ ಡಿಜಿಟಿಲ್ ಗ್ರಂಥಾಲಯ ಅಳವಡಿಸಲು ಉದ್ದೇಶಿಸಲಾಗಿತ್ತು.

ಟೆಂಡರ್ ಪ್ರಕ್ರಿಯೆ ವಿಳಂಬ : ಅಚ್ಚರಿಯ ವಿಷಯವೆಂದರೆ ಕಳೆದ 2025ರ ಅಕ್ಟೋಬರ್‌ನಲ್ಲೇ ಒಟ್ಟು ಅನುದಾನದ ಶೇ. 100ರ ಪೈಕಿ ಶೇ. 40ರಷ್ಟು ಹಣ ವಿವಿ ಖಾತೆಗೆ ಜಮೆಯಾಗಿದೆ. ಆದರೆ, ತಿಂಗಳಗಳು ಕಳೆದರೂ ಟೆಂಡರ್ ಪ್ರಕ್ರಿಯೆಯನ್ನು ಪೂರ್ಣಗೊಳಿಸದೆ ವಿಳಂಬ ಧೋರಣೆ ಅನುಸರಿಸಲಾಗುತ್ತಿದೆ. ಈ ವಿಳಂಬದ ಹಿಂದೆ ವ್ಯವಸ್ಥಿತ ಸಂಚಿದೆ ಎನ್ನಲಾಗಿದೆ. ಅಲ್ಲದೇ, ಒಟ್ಟು ಅನುಮೋದಿತ ಅನುದಾನದ ಶೇ. 100ರಷ್ಟು ಪೈಕಿ ಕೇವಲ ಶೇ. 19.21ರಷ್ಟು ಹಣದಲ್ಲಿ ಮಾತ್ರ ಕೆಲಸ ಮುಗಿಸಲು ಟೆಂಡರ್ ಯೋಜನೆ ಸಿದ್ಧಪಡಿಸಲಾಗುತ್ತಿದೆ ಎಂಬ ದೂರು ಕೇಳಿಬಂದಿದೆ. ಕಳಪೆ ಮಟ್ಟದ ಕಾಮಗಾರಿ ನಡೆಸಿ, ಉಳಿದ ಬೃಹತ್ ಮೊತ್ತವನ್ನು ಕಬಳಿಸಲು ವ್ಯವಸ್ಥಿತ ಸಂಚು ರೂಪಿಸಲಾಗಿದೆ ಎಂಬುದಾಗಿ ಆರೋಪಿಸಲಾಗಿದೆ.

ಬಾಕ್ಸ್ : ಕೆಕೆಆರ್‌ಡಿಬಿ ಅನುದಾನದ 42.94 ಕೋಟಿ ರೂ. ದಲ್ಲಿ ಕಲಿಕಾ ನಿರ್ವಹಣಾ ವ್ಯವಸ್ಥೆ (ಎಲ್‌ಎಸ್‌ಎಂ) ಸಾಫ್ಟ್‌ವೇರ್ ಆ್ಯಪ್ ಆಪ್‌ಡೇಟ್‌ಗಾಗಿ 9.50 ಕೋಟಿ ರೂ., ವಿಭಾಗಗಳ ಪೀಠೋಪಕರಣಗಳ ಅಳವಡಿಕೆಗೆ 9.20 ಕೋಟಿ ರೂ., 500 ಕಿ.ವ್ಯಾ. ಸೋಲಾರ್ ಸಿಸ್ಟ್‌ಂಗೆ 5.44 ಕೋಟಿ ರೂ., ವಿಜ್ಞಾನ ವಿಭಾಗಕ್ಕೆ ಅತ್ಯಾಧುನಿಕ ಸೌಲಭ್ಯಕ್ಕೆ 9.40 ಕೋಟಿ ರೂ., ಡಿಜಿಟಿಲ್ ಗ್ರಂಥಾಲಯ ಹಾಗೂ ಬೋರ್ಡ್‌ಗಳ ಅಳವಡಿಕೆಗೆ 9.40 ಕೋಟಿ ರೂ. ಟೆಂಡರ್‌ನಲ್ಲಿ ಮೀಸಲಿಡಲು ಉದ್ದೇಶಿಸಿದೆ. ಇದರಲ್ಲಿ ಉದಾಹರಣೆಗೆ ಸಾಮಾನ್ಯವಾಗಿ ಒಂದು ಕಿಲೋ ವ್ಯಾಟ್‌ಗೆ 35 ಸಾವಿರ ರೂ. ಬೆಲೆಯಿದ್ದು, ಅದರಂತೆ 500 ಕಿ.ವ್ಯಾ.ಗೆ 1.75 ಕೋಟಿ ರೂ. ಅನುದಾನ ವ್ಯಯವಾಗಲಿದೆ. ಆದರೆ, 500 ಕಿ.ವ್ಯಾನ ಸೋಲಾರ್ ಸಿಸ್ಟ್‌ಂಗಾಗಿಯೇ 5.44 ಕೋಟಿ ರೂ. ಮೀಸಲಿಟ್ಟಿದೆ. ಸಾಫ್ಟ್‌ವೇರ್ ಎಲ್‌ಎಸ್‌ಎಂ ಆಪ್‌ಡೇಟ್ ಒಂದು ಕೋಟಿ ರೂ. ದೊರೆಯುವುದಕ್ಕೆ ಒಂಬತ್ತು ಕೋಟಿ ರೂ. ಮೀಸಲಿಡಲಾಗಿದೆ ಎನ್ನಲಾಗಿದೆ. ಇದಲ್ಲದೇ, ಹೆಚ್ಚಿನ ಬೆಲೆಯಿರುವ ಕಂಪನಿಗಳ ಮೂಲಕ ಟೆಂಡರ್ ಪ್ರಕ್ರಿಯೆ ಪೂರ್ಣಗೊಳಿಸಲು ಉದ್ದೇಶಿಸಿರುವುದರಿಂದ ಒಪನ್ ಟೆಂಡರ್ ಕರೆಯದೆ ವಿಳಂಬ ಮಾಡುತ್ತಿದ್ದಾರೆ ಎಂದು ವಿವಿಯ ಸಿಬ್ಬಂದಿ ತಿಳಿಸಿದರು.

ಒಟ್ಟಾರೆ ಕಳೆದ ಎರಡ್ಮೂರು ವರ್ಷಗಳಿಂದ ನಾನಾ ವಿವಾದಗಳಿಂದ ಸುದ್ದಿಯಾಗುತ್ತಿರುವ ವಿವಿಯು, ಈಗ ಅಭಿವೃದ್ಧಿ ಹೆಸರಿನಲ್ಲಿ ಹಣ ಲೂಟಿ ಮಾಡಲು ಮುಂದಾಗಿದೆ ಎಂಬ ಆರೋಪ ವ್ಯಕ್ತವಾಗಿದೆ. ಅತ್ಯಾಧುನಿಕ ಉಪಕರಣಗಳ ಹೆಸರಿನಲ್ಲಿ ಕಡಿಮೆ ವೆಚ್ಚದ ಸಾಧನಗಳನ್ನು ತಂದು ವಿದ್ಯಾರ್ಥಿಗಳ ಭವಿಷ್ಯದ ಜತೆ ಚೆಲ್ಲಾಟವಾಡಲಾಗುತ್ತಿದೆ. ಈ ಬಗ್ಗೆ ಉನ್ನತ ಮಟ್ಟದ ತನಿಖೆ ನಡೆದು, ವಿದ್ಯಾರ್ಥಿಗಳಿಗೆ ಗುಣಮಟ್ಟದ ಸೌಲಭ್ಯಗಳು ದೊರೆಯುವಂತಾಗಲಿ ಎನ್ನುವುದೇ ಸಾರ್ವಜನಿಕರ ಆಶಯವಾಗಿದೆ.

ಕೋಟ್... ವಿವಿ ಅಭಿವೃದ್ಧಿಗೆ ಕೆಕೆಆರ್‌ಡಿಬಿಯ ಅನುದಾನದಿಂದ ಶೇ.40 ರಷ್ಟು ವಿವಿ ಖಾತೆಗೆ ಹಣ ಜಮೆಯಾಗಿದೆ. ಟೆಂಡರ್ ಪ್ರಕ್ರಿಯೆಯಲ್ಲಿರುವುದರಿಂದ ಕಾಮಗಾರಿ ಆರಂಭವಾಗಿಲ್ಲ.

- ಪ್ರೊ.ಎಂ.ಮುನಿರಾಜು, ಕುಲಪತಿ, ವಿಎಸ್‌ಕೆ ವಿವಿ, ಬಳ್ಳಾರಿ.