ವಸೂಲಾತಿ ಸಂಬಂಧ ಪತ್ರ ಬರೆದ ಡಿಸಿಎಫ್

ರಾಜ್ಯದ ಗಡಿಯೊಳಗೆ 68.5 ಹೆಕ್ಟೇರ್ ಪ್ರದೇಶ ಅಕ್ರಮವಾಗಿ ಒತ್ತುವರಿ ಮಾಡಿಕೊಂಡಿರುವುದು ತಾಂತ್ರಿಕ ಸಮೀಕ್ಷೆಗಳಿಂದ ಬಹಿರಂಗಗೊಂಡಿತ್ತು. ಈ ಬಗ್ಗೆ ತಕ್ಷಣದ ಕ್ರಮವಹಿಸುವಂತೆ ಕಳೆದ ವಾರ ಕೇಂದ್ರ ಪರಿಸರ, ಅರಣ್ಯ ಮತ್ತು ಹವಾಮಾನ ವೈಪರೀತ್ಯ ಸಚಿವಾಲಯವು ಕರ್ನಾಟಕ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಗೆ ಸೂಚಿಸಿತ್ತು. ಇದಲ್ಲದೇ, ದೂರುದಾರರಾದ ಟಪಾಲ್ ಏಕಂಬರಂ ಮತ್ತು ಟಪಾಲ್ ಗಣೇಶ್ ಜಂಟಿಯಾಗಿ ವಿವರವಾದ ವರದಿ ಲಗತ್ತಿಸಿ ರಾಜ್ಯ ಸರ್ಕಾರಕ್ಕೆ ಪತ್ರ ಬರೆದಿದ್ದರು.

ಅಕ್ರಮ ಗಣಿಗಾರಿಕೆಯ ಲೂಟಿ : ಒಎಂಸಿ ಕಂಪನಿಯೂ ಆಂಧ್ರಪ್ರದೇಶದಲ್ಲಿ ಹೊಂದಿದ್ದ 68.50 ಹೆಕ್ಟೇರ್ ಗಣಿಗುತ್ತಿಗೆ ವ್ಯಾಪ್ತಿಯಲ್ಲಿ ಕೇವಲ 40,387 ಮೆಟ್ರಿಕ್ ಟನ್ ಅದಿರು ಮಾತ್ರ ಲಭ್ಯವಿತ್ತು. ಆದರೆ, ಕರ್ನಾಟಕದ ಗಡಿ ಭಾಗದ ಹಿಂದ್ ಟ್ರೇಡರ್ಸ್, ಎಂಬಿಟಿ ಕಂಪನಿಯೂ ಸಂಡೂರು ವ್ಯಾಪ್ತಿಯಲ್ಲಿ ಒಟ್ಟು 28.49 ಲಕ್ಷ ಮೆಟ್ರಿಕ್ ಟನ್‌ಗೂ ಅಧಿಕ ಅದಿರನ್ನು ಅಕ್ರಮವಾಗಿ ಗಣಿಗಾರಿಕೆ ಮಾಡಿ ಸಾಗಿಸುವ ಮೂಲಕ 884.13 ಕೋಟಿ ರೂ. ಅಕ್ರಮ ಆದಾಯ ಗಳಿಸಿದೆ ಎಂಬುದಾಗಿ ಹೈದರಾಬಾದ್ ಸಿಬಿಐ ನ್ಯಾಯಾಲಯದ ಆದೇಶದಲ್ಲಿ ಉಲ್ಲೇಖಿಸಲಾಗಿದೆ.

ಈ ದೊಡ್ಡ ಮಟ್ಟದ ಹಗರಣಕ್ಕೆ ಸಂಬಂಧಿಸಿದಂತೆ ಹೈದರಾಬಾದ್‌ನ ಸಿಬಿಐ ವಿಶೇಷ ನ್ಯಾಯಾಲಯವು 2025ರ ಮೇ6 ರಂದು ತೀರ್ಪು ನೀಡಿದೆ. ಈ ಕಾನೂನು ಪ್ರಕ್ರಿಯೆಯಲ್ಲಿ ಕರ್ನಾಟಕ ಸರ್ಕಾರವು ಭಾಗಿಯಾಗಿಲ್ಲದ ಕಾರಣ, ದೂರುದಾರರು ಕೋರಿರುವ 884 ಕೋಟಿ ರೂ. ವರೆಗಿನ ನಷ್ಟ ವಸೂಲಾತಿ ಪ್ರಕ್ರಿಯೆಗೆ ಮುಂದಾಗಲು ಸಿಬಿಐ ಮತ್ತು ಎಸಿಬಿ ಹೈದರಾಬಾದ್‌ನಿಂದ ಪೂರಕ ದಾಖಲೆಗಳನ್ನು ಪಡೆಯುವುದು ಸೂಕ್ತ ಎಂಬುದಾಗಿ ಡಿಸಿಎಫ್ ಪತ್ರದಲ್ಲಿ ತಿಳಿಸಿದ್ದಾರೆ.

ಸುಪ್ರೀಂ ಕೋರ್ಟ್ ಸಮಿತಿ ತನಿಖೆ: ಮೀಸಲು ಅರಣ್ಯ ಒತ್ತುವರಿ, ಗಡಿ ರೇಖೆಗಳ ಉಲ್ಲಂಘನೆ ಹಾಗೂ ಸಾರ್ವಜನಿಕ ಖಜಾನೆಗೆ ಆಗಿರುವ ನಷ್ಟದ ಅಂದಾಜು ಮಾಡಲು ಸುಪ್ರೀಂ ಕೋರ್ಟ್ ನಿ. ನ್ಯಾಯಾಧೀಶ ಸುಧಾಂಶು ಧುಲಿಯಾ ನೇತೃತ್ವದ ಉನ್ನತ ಮಟ್ಟದ ಸಮಿತಿಗೆ ಜವಾಬ್ದಾರಿ ನೀಡಿದೆ. ಈ ಪ್ರಕರಣದ ಮುಂದಿನ ವಿಚಾರಣೆ 2026ರ ಆ.13 ರಂದು ಸುಪ್ರೀಂ ಕೋರ್ಟ್‌ನಲ್ಲಿ ನಡೆಯುವ ಸಾಧ್ಯತೆಯಿದೆ ಎಂಬುದಾಗಿ ವರದಿಯಲ್ಲಿ ತಿಳಿಸಿದೆ.

ಸರ್ಕಾರ ನಡೆ ಕುತೂಹಲ : ಕಳೆದ ಒಂದೂವರೆ ದಶಕದಿಂದ ಗಣಿ ಅಕ್ರಮದ ಬಗ್ಗೆ ಸಮೀಕ್ಷೆ ನಡೆಸಿದ ಎಲ್ಲ ವರದಿ ಹಾಗೂ ನ್ಯಾಯಾಲಯದ ತೀರ್ಪುಗಳಲ್ಲಿ ರಾಜ್ಯದ ಗಡಿ ಒತ್ತುವರಿ ಜತೆಗೆ ಗಣಿ ಲೂಟಿಯಾಗಿದೆ ಎಂಬುದಾಗಿ ಬಹಿರಂಗಗೊಂಡಿದೆ. ಈಚೆಗೆ ವಿಜಯವಾಣಿಯೂ ‘ ಒಎಂಸಿ ವಿರುದ್ಧ ಕ್ರಮಕ್ಕೆ ಕೇಂದ್ರ ಸರ್ಕಾರ ಆದೇಶ ’ ಎಂಬ ಶೀರ್ಷಿಕೆಯಡಿ ವರದಿ ಪ್ರಕಟಿಸಿತ್ತು. ಬಳ್ಳಾರಿ ವಲಯದ ಡಿಸಿಎಫ್ ಅಧಿಕಾರಿಯೂ ಉನ್ನತ ಮಟ್ಟದ ಅಧಿಕಾರಿಗಳಿಗೆ ಪತ್ರದಲ್ಲಿ ಸಮೀಕ್ಷೆ ವರದಿಗಳನ್ನು ಲಗತ್ತಿಸಿ ಪತ್ರ ಬರೆದಿದ್ದು, ರಾಜ್ಯ ಸರ್ಕಾರದ ಉನ್ನತ ಮಟ್ಟದ ಅಧಿಕಾರಿಗಳು ಸಿಬಿಐ ಹಾಗೂ ಎಸಿಬಿಯಿಂದ ವರದಿ ತರಿಸಿಕೊಂಡು ಕಂಪನಿಯ ವಿರುದ್ಧ ಕ್ರಮವಹಿಸುತ್ತಾರೆ ಅಥವಾ ವರದಿ ಪಡೆಯುವಲ್ಲಿ ಕಾಲಹರಣ ಮಾಡುತ್ತಾರೆ ಎಂಬುದು ಕಾದು ನೋಡಬೇಕಿದೆ.