ಬಿಮ್ಸ್‌ನಲ್ಲಿ 550 ಬೆಡ್ ಆಸ್ಪತ್ರೆ ನಿರ್ಮಾಣ

ಇಲ್ಲಿನ ಬಿಮ್ಸ್ ಕೇವಲ ಬಳ್ಳಾರಿಗೆ ಸೀಮಿತವಾಗಿಲ್ಲ. ವಿಜಯನಗರ, ಕೊಪ್ಪಳ, ರಾಯಚೂರು ಸೇರಿದಂತೆ ನೆರೆಯ ಆಂಧ್ರಪ್ರದೇಶದ ಗಡಿಭಾಗದ ರೋಗಿಗಳಿಗೂ ಇದು ಆಸರೆಯಾಗಿದೆ. ನಿತ್ಯ ಸರಾಸರಿ ಎರಡು ಸಾವಿರಕ್ಕೂ ಅಧಿಕ ಹೊರ ರೋಗಿಗಳು ಚಿಕಿತ್ಸೆ ಪಡೆಯುತ್ತಾರೆ. ಒಂದು ಸಾವಿರಕ್ಕೂ ಹೆಚ್ಚು ಹಾಸಿಗೆಗಳ ಸಾಮಥ್ಯವಿರುವ ಈ ಬಿಮ್ಸ್‌ಗೆ ಇನ್ನೂ 550 ಹಾಸಿಗೆಗಳ ಆಸ್ಪತ್ರೆ ನಿರ್ಮಾಣಗೊಂಡರೆ ರೋಗಿಗಳಿಗೆ ಅನುಕೂಲವಾಗಲಿದೆ.

ಸದ್ಯ ಜಿಲ್ಲೆಯಲ್ಲಿ ಉನ್ನತಮಟ್ಟದ ಚಿಕಿತ್ಸೆಗಾಗಿ ಬೆಂಗಳೂರು, ಹುಬ್ಬಳ್ಳಿ ಅಥವಾ ದಾವಣಗೆರೆಯಂತಹ ದೂರದ ನಗರಗಳಿಗೆ ಅಲೆಯುತ್ತಿದ್ದ ಗಡಿನಾಡಿನ ಜನರಿಗೆ ಕೊನೆಗೂ ದೊಡ್ಡ ಆಶಾಕಿರಣ ಮೂಡಿದೆ. ಜಿಲ್ಲೆಯ ಬಿಮ್ಸ್‌ನಲ್ಲಿ ನಿರ್ಮಿಸಲು ಕರ್ನಾಟಕ ಗಣಿಬಾಧಿತ ಪ್ರದೇಶಗಳ ಪುನಶ್ಚೇತನ ನಿಗಮವೂ (ಕೆಎಂಆರ್‌ಸಿ)ಯೂ ಎರಡು ಲಕ್ಷಕ್ಕೂ ಅಧಿಕ ಚದರ ಮೀ.ನಲ್ಲಿ 121.83 ಕೋಟಿ ರೂ. ವೆಚ್ಚದಲ್ಲಿ 550 ಹಾಸಿಗೆಗಳು ನಿರ್ಮಾಣಕ್ಕೆ ಅನುಮೋದನೆ ನೀಡಿದೆ. ಈಗಾಗಲೇ ಕಾಮಗಾರಿ ಆರಂಭಗೊಂಡು ಒಂದನೇ ಮಹಡಿಯ ನಿರ್ಮಾಣ ಪೂರ್ಣಗೊಂಡಿದೆ. ಇನ್ನೂ ಒಂದೂವರೆ ವರ್ಷದೊಳಗೆ ಕಟ್ಟಡ ಪೂರ್ಣಗೊಂಡು ವೈದ್ಯಕೀಯ ಸೌಲಭ್ಯಗಳು ದೊರೆತ ಕೂಡಲೇ ಸಾರ್ವಜನಿಕ ಸೇವೆಗೆ ಚಾಲನೆ ದೊರೆಯಲಿದೆ.

ಸದ್ಯ ಬಿಮ್ಸ್ ಸಂಸ್ಥೆಯು ಈ ಬಳ್ಳಾರಿ ಸೇರಿದಂತೆ ಕೆಲ ಜಿಲ್ಲೆಗಳ ಹಾಗೂ ಆಂಧ್ರದ ನೆರೆಯ ಜಿಲ್ಲೆಗಳಿಗೆ ಏಕೈಕ ತೃತೀಯ ಹಂತದ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಯಾಗಿದೆ. ಆದರೆ, ಹಾಸಿಗೆಗಳ ಅಭಾವ ಮತ್ತು ಮೂಲಸೌಕರ್ಯಗಳ ಕೊರತೆಯಿಂದಾಗಿ ಗಂಭೀರ ಸ್ಥಿತಿಯಲ್ಲಿರುವ ರೋಗಿಗಳನ್ನು ತಕ್ಷಣವೇ ಹುಬ್ಬಳ್ಳಿ, ಬೆಂಗಳೂರು ಅಥವಾ ದಾವಣಗೆರೆಗೆ ಸ್ಥಳಾಂತರಿಸುವುದು ಸಾಮಾನ್ಯವಾಗಿದೆ. ಪ್ರಯಾಣದ ಮಧ್ಯದಲ್ಲೇ ಹಲವು ಜೀವಗಳು ಮೃತಪಟ್ಟಿರುವ ಘಟನೆಗಳು ನಡೆದಿವೆ. ಈ ನೂತನ 550 ಹಾಸಿಗೆಗಳ ಬ್ಲಾಕ್ ನಿರ್ಮಾಣದಿಂದಾಗಿ ಜೀವ ರಕ್ಷಕ ಚಿಕಿತ್ಸೆಗಳು ಸ್ಥಳೀಯವಾಗಿಯೇ ತಕ್ಷಣಕ್ಕೆ ಸಿಗಲಿದ್ದು, ಅಲೆದಾಟ ಮತ್ತು ಅನಗತ್ಯ ವೆಚ್ಚಕ್ಕೆ ಸಂಪೂರ್ಣ ಬ್ರೇಕ್ ಬೀಳಲಿದೆ.

ವರ್ಷಗಳ ಕಾಲ ನಡೆದ ಅತಿಯಾದ ಗಣಿಗಾರಿಕೆಯಿಂದಾಗಿ ಬಳ್ಳಾರಿ ಹಾಗೂ ಸುತ್ತಮುತ್ತಲಿನ ಗ್ರಾಮೀಣ ಭಾಗದ ಜನತೆ ತೀವ್ರ ರೀತಿಯ ಶ್ವಾಸಕೋಶದ ಕಾಯಿಲೆ, ಚರ್ಮ ರೋಗ ಮತ್ತು ಇತರ ಗಂಭೀರ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದಾರೆ. ಜಿಲ್ಲಾಧಿಕಾರಿಗಳು ಸಲ್ಲಿಸಿದ್ದ ಪ್ರಸ್ತಾವನೆಗೆ ಮನ್ನಣೆ ದೊರೆತಿದೆ. ಬಿಮ್ಸ್ ಸಂಸ್ಥೆಯೂ ಇದರ ನಿರ್ಮಾಣದ ಹೊಣೆ ಹೊತ್ತಿದೆ. ಬಡ ರೋಗಿಗಳಿಗೆ ಉನ್ನತ ಮಟ್ಟದ ವೈದ್ಯಕೀಯ ನೆರವು ನೀಡುವುದು ಈ ಯೋಜನೆಯ ಮುಖ್ಯ ಉದ್ದೇಶವಾಗಿದೆ.

ಬಾಕ್ಸ್ : ಈಗಾಗಲೇ ಬಿಮ್ಸ್ ವ್ಯಾಪ್ತಿಯಲ್ಲಿ ಅಪಘಾತಗಳು ಸಂಭವಿಸಿದ ವೇಳೆ ಚಿಕಿತ್ಸೆಗಾಗಿ ಟ್ರಾಮ್ ಕೇರ್ ಸೆಂಟರ್, 200 ಕೋಟಿ ರೂ. ವೆಚ್ಚದ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಯಲ್ಲಿ ಹೊರ ರೋಗಿಗಳಿಗೆ ಚಿಕಿತ್ಸೆ ಆರಂಭಗೊಂಡಿದೆ. ಜತೆಗೆ 372 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲು ಉದ್ದೇಶಿಸಿರುವ ಕ್ಯಾನ್ಸರ್ ಆಸ್ಪತ್ರೆ, ಅವಧಿ ಮುನ್ನ ಜನಿಸುವ ಶಿಶುಗಳಿಗೆ ತಾಯಿ ಹಾಲು ದೊರಕಿಸಿಕೊಡುವ ಉದ್ದೇಶದಿಂದ ಹೆರಿಗೆ ಮತ್ತು ಮಕ್ಕಳ ಆಸ್ಪತ್ರೆಯಲ್ಲೇ ಹ್ಯೂಮನ್ ಮಿಲ್ಕ್ ಬ್ಯಾಂಕ್ ಘಟಕ ಆರಂಭಿಸಿದೆ. ಇದಲ್ಲದೇ, ಬಿಮ್ಸ್ ಸಂಸ್ಥೆಯಲ್ಲಿ ಕಳೆದ ಸಾಲಿನಿಂದ ಬ್ಯಾಚುಲರ್ ಆಫ್ ಫಿಜಿಯೋಥೆರಪಿ(ಬಿಪಿಟಿ) ಕೋರ್ಸ್ ಕೂಡ ಆರಂಭಿಸಿದೆ. ಇನ್ನೂ ಜಿಂದಾಲ್ ಸಂಸ್ಥೆಯಿಂದ ತಾಯಿ ಹಾಗೂ ಮಕ್ಕಳ ಆಸ್ಪತ್ರೆ ಕಟ್ಟಡಕ್ಕೆ ಚಾಲನೆ ದೊರೆತಿದೆ. ಒಟ್ಟಾರೆ, ರಾಜ್ಯದ ನಾಲ್ಕು ಜಿಲ್ಲೆಗಳಿಗೆ ಸೇರಿದಂತೆ ನೆರೆಯ ಆಂಧ್ರದ ಕೆಲ ಜಿಲ್ಲೆಗಳಿಗೆ ಆರೋಗ್ಯ ಸಂಜೀವಿನಿಯಾಗಿರುವ ಬಳ್ಳಾರಿ ಬಿಮ್ಸ್‌ನಲ್ಲಿ ಸೂಕ್ತ ಸೌಲಭ್ಯಗಳ ಜತೆಗೆ ಪ್ರಾಧ್ಯಾಪಕರ ನೇಮಕ, ವೈದ್ಯರ ಹಾಗೂ ಸಿಬ್ಬಂದಿಯನ್ನು ಕಾಲ ಕಾಲಕ್ಕೆ ನೇಮಿಸಿಕೊಳ್ಳಲು ಸರ್ಕಾರ ಅನುವು ಮಾಡಿಕೊಟ್ಟರೆ ಸ್ಥಳೀಯ ಖಾಸಗಿ ಆಸ್ಪತ್ರೆಗಳಿಗೆ ಪೈಪೋಟಿ ನೀಡಲಿದೆ.

"