ಸೊರಗುತ್ತಿದೆ ಜಾನುವಾರು ಸಂತೆ

ಹಗರಿಬೊಮ್ಮನಹಳ್ಳಿ ವಿಜಯನಗರ ಮಾರುಕಟ್ಟೆಯಲ್ಲಿರುವ ಜಾನುವಾರು ಸಂತೆ./ ಜಾನುವಾರುಗಳನ್ನು ಕಟ್ಟಿಹಾಕುವ ಕಂಬಗಳು, ರೈತರು ಕೂಡುವ ಕಲ್ಲಿನ ಸೀಟ್‌ಗಳು ಶಿಥಿಲಗೊಂಡಿರುವುದು./ ಮಾರುಕಟ್ಟೆಯಲ್ಲಿರುವ ನೀರಿನ ತೊಟ್ಟಿ

Published on:

11 Jan 2026, 12:09 pm

ಪ್ರಮುಖ ಮುಖ್ಯಾಂಶಗಳು

ಮಾರುಕಟ್ಟೆಯಲ್ಲಿ ಸೌಕರ್ಯಗಳ ಕೊರತೆ
ಹಗರಿಬೊಮ್ಮನಹಳ್ಳಿಯಲ್ಲಿ ಕುಂದಿದ ವಹಿವಾಟು

ಹಗರಿಬೊಮ್ಮನಹಳ್ಳಿ: ಪಟ್ಟಣದಲ್ಲಿ ಜಾನುವಾರು ಮಾರುಕಟ್ಟೆಯಲ್ಲಿ ಮೂಲಸೌಕರ್ಯ ಕೊರತೆಯಿದ್ದು, ಪ್ರತಿ ಬುಧವಾರ ಮತ್ತು ಗುರುವಾರ ನಡೆವ ಸಂತೆ ಸೊರಗುತ್ತಿದೆ.

ಕಳೆದ ಐದು ದಶಕಗಳಿಗೂ ಹೆಚ್ಚು ಕಾಲದಿಂದ ಪಟ್ಟಣದ ವಿಜಯನಗರ ಮಾರುಕಟ್ಟೆಯಲ್ಲಿ ತರಕಾರಿ, ದಿನಸಿ ಹಾಗೂ ಜಾನುವಾರು ಸಂತೆ ನಡೆಯುತ್ತಿದ್ದು, ಇದರಿಂದ ಸುತ್ತಲಿನ ರೈತಾಪಿ ವರ್ಗಕ್ಕೆ ಅನುಕೂಲವಾಗಿದೆ. ಬುಧವಾರ ಕುರಿ-ಕೋಳಿಗಳ ಸಂತೆ, ಗುರುವಾರ ಜಾನುವಾರು ಸಂತೆ ನಡೆಯುತ್ತಿದೆ.

ಜಾನುವಾರು ಸಂತೆಗೆ ರಾಜ್ಯದ ಹಲವೆಡೆಯಿಂದ ಜನರು ಬಂದು ವಹಿವಾಟು ನಡೆಸುತ್ತಾರೆ. ಆದರೆ, ಜಾನುವಾರು ಮರುಕಟ್ಟೆಯಲ್ಲಿ ಮೂಲಸೌಕರ್ಯ ಅಭಾವದಿಂದ ವ್ಯಾಪಾರ-ವಹಿವಾಟು ಕಡಿಮೆಯಾಗುತ್ತಿದೆ. ಗ್ರಾಪಂ ಆಡಳಿತವಿದ್ದಾಗ ಸಂತೆ ವೈಭವದಿಂದ ನಡೆಯುತ್ತಿತ್ತು. ಈಗ ತಾಲೂಕು ಕೇಂದ್ರವಾಗಿ, ಪುರಸಭೆ ಆಡಳಿತವಿದ್ದರೂ ಮಾರುಕಟ್ಟೆ ಅಭಿವೃದ್ಧಿಯಾಗಿಲ್ಲ.

ಈ ಬಗ್ಗೆ ಸ್ಥಳೀಯ ಆಡಳಿತ ಗಮನಹರಿಸಿ ಸಮರ್ಪಕ ಸೌಲಭ್ಯ ಕಲ್ಪಿಸಬೇಕೆಂಬುದು ರೈತರು ಹಾಗೂ ವ್ಯಾಪಾರಸ್ಥರ ಆಗ್ರಹವಾಗಿದೆ.

ಪುರಸಭೆ ಕಣ್ತೆರೆಯಲಿ: ಸಂತೆ ಪ್ರದೇಶ 4.5ಎಕರೆಗೂ ಹೆಚ್ಚು ವಿಸ್ತೀರ್ಣ ಹೊಂದಿತ್ತು. ಈ ಪೈಕಿ ನ್ಯಾಯಾಲಯ ಕಟ್ಟಡ ನಿರ್ಮಾಣಕ್ಕೆ 1.25ಎಕರೆ ಭೂಮಿ ಬಳಸಿಕೊಳ್ಳಲಾಯಿತು. ಇನ್ನುಳಿದ ಜಾಗದಲ್ಲಿ ಸಂತೆ ನಡೆಯುತ್ತಿದ್ದು, ವ್ಯಾಪಾರಸ್ಥರು, ರೈತರಿಗೆ ಕುಡಿವ ನೀರು, ಶೌಚಗೃಹಗಳಿಲ್ಲ. ನೂರಾರು ಸಂಖ್ಯೆಯಲ್ಲಿ ಸೇರುವ ಜಾನುವಾರುಗಳಿಗೆ ಒಂದೇ ನೀರಿನ ತೊಟ್ಟಿ ಇದ್ದು, ಕಟ್ಟಿಹಾಕುವ ಕಲ್ಲುಕಂಬಗಳು ಕಿತ್ತಿವೆ. ಹಗರಿಹಳ್ಳದ ಕಡೆಯಿಂದ ಕಾಂಪೌಂಡ್ ನಿರ್ಮಾಣದ ಅಗತ್ಯವಿದೆ. ಪ್ರತಿ ವರ್ಷ 10 ಲಕ್ಷ ರೂ.ಗೂ ಹೆಚ್ಚು ಮೊತ್ತಕ್ಕೆ ಟೆಂಡರ್ ಆಗುವ ಮಾರುಕಟ್ಟೆ ಲಾಭ ತಂದುಕೊಟ್ಟರೂ ನಿರ್ವಹಣೆಯಲ್ಲಿ ಪುರಸಭೆ ಆಡಳಿತ ಎಡವಿದೆ ಎಂದು ರೈತರು ದೂರಿದ್ದಾರೆ.

ಒಂದು ಕೋಟಿ ರೂ.ಮಂಜೂರು: ಪ್ರತಿ ಭಾನುವಾರ ನಡೆಯುವ ತರಕಾರಿ ಮತ್ತು ದಿನಸಿ ಸಂತೆಯೂ ಈ ಹಿಂದೆ ಭರ್ಜರಿಯಾಗಿ ನಡೆಯುತ್ತಿತ್ತು. ಒಣ ಮೆಣಸಿನಕಾಯಿ, ತರಕಾರಿ, ಸೊಪ್ಪುಗಳ ವಹಿವಾಟು ಚೆನ್ನಾಗಿತ್ತು. ಆದರೆ, ಸಮರ್ಪಕ ಸೌಲಭ್ಯಗಳಿಂದ ಸಂತೆ ಕಳೆ ಕುಂದಿದೆ. ಈಗ ನಗರೋತ್ಥಾನ ಯೋಜನೆಯಡಿ ತರಕಾರಿ ಮಾರುಕಟ್ಟೆ ಅಭಿವೃದ್ಧಿಗೆ ಒಂದು ಕೋಟಿ ರೂ. ಮಂಜೂರಾಗಿದ್ದು, ಮಾರುಕಟ್ಟೆ ಅಭಿವೃದ್ಧಿಗೊಳಿಸಿ ವ್ಯಾಪಾರಕ್ಕೆ ಅನುಕೂಲ ಕಲ್ಪಿಸಬೇಕಾಗಿದೆ.

ನಮ್ಮ ತಂದೆ ಕಾಲದಲ್ಲಿ ಇದ್ದ ಸಂತೆಯ ಗದ್ದಲ ಈಗ ಕಂಡುಬರುತ್ತಿಲ್ಲ. ಮಾರುಕಟ್ಟೆ ಸೌಲಭ್ಯಗಳಿಲ್ಲದೆ ಪಾಳುಬಿದ್ದ ಆವರಣವಾಗಿದೆ. ಪಟ್ಟಣದ ದೊಡ್ಡ ಮಾರುಕಟ್ಟೆಗೆ ಮೂಲಸೌಲಭ್ಯಗಳು ಅವಶ್ಯವಾಗಿವೆ.

ನಗರೋತ್ಥಾನ ಯೋಜನೆಯಡಿ ಪಟ್ಟಣದ ವಿಜಯನಗರ ಮಾರುಕಟ್ಟೆ ಅಭಿವೃದ್ಧಿಗೆ ಒಂದು ಕೋಟಿ ರೂ. ಅನುದಾನ ಮಂಜೂರು ಆಗಿದೆ. ಈ ಕಾಮಗಾರಿಯಲ್ಲಿ ಜಾನುವಾರು ಮಾರುಕಟ್ಟೆ ಸೇರಿದೆಯೇ ಎಂದು ಪರಿಶೀಲಿಸುವೆ. ಇಲ್ಲದಿದ್ದರೆ 2026-27ನೇ ಸಾಲಿನ ಎಸ್‌ಎಫ್‌ಸಿ-16 ಯೋಜನೆಯಡಿ ಜಾನುವಾರು ಮಾರುಕಟ್ಟೆ ಅಭಿವೃದ್ಧಿಗೆ ಅನುದಾನ ಕಾಯ್ದಿರಿಸಲಾಗುವುದು.

ಮಾರುಕಟ್ಟೆ