ಬಜೆಟ್ ನಾನಾ ಅಭಿವೃದ್ಧಿಗೆ ಅನುದಾನ

ವಿವಿಧ ಮಹನೀಯರ ಜಯಂತಿ ಆಚರಣೆಗೆ ತಲಾ 50 ಸಾವಿರ ರೂ. ಗಳಂತೆ ಒಟ್ಟು 12 ಲಕ್ಷ ರೂ., ಮಕ್ಕಳ ಪ್ರತಿಭಾ ಕಾರಂಜಿ ಕಾರ್ಯಕ್ರಮಗಳಿಗೆ 5 ಲಕ್ಷ ರೂ., ಪಾಲಿಕೆ ಚುನಾಯಿತ ಸದಸ್ಯರ ಪ್ರದೇಶಾಭಿವೃದ್ಧಿ ನಿಧಿಯಡಿ ಕುಡಿವ ನೀರಿನ ತುರ್ತು ಸಂದರ್ಭಗಳಿಗೆ ತಲಾ ಮೂರು ಲಕ್ಷಗಳಂತೆ 1.20 ಕೋಟಿ ರೂ., ಪ್ರಸಕ್ತ ಸಾಲಿನಲ್ಲಿ ಜಿಲ್ಲೆಯಲ್ಲಿ ನಡೆಯಲಿರುವ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ 1 ಕೋಟಿ ರೂ., ಬಳ್ಳಾರಿ ಉತ್ಸವಕ್ಕೆ 2 ಕೋಟಿ ರೂ., ಪಾಲಿಕೆ ನೌಕರರ ಸಂಘದ ಭವನ ನಿರ್ಮಾಣಕ್ಕೆ 25 ಲಕ್ಷ ರೂ., ಬೀದಿ ನಾಯಿಗಳ ಆಶ್ರಯತಾಣ ನಿರ್ಮಾಣಕ್ಕೆ 1.55 ಕೋಟಿ ರೂ., ಬಿಡಾಡಿ ದನಗಳನ್ನು ಗೋಶಾಲೆಗಳಿಗೆ ಸ್ಥಳಾಂತರಿಸಲು 15 ಲಕ್ಷ ರೂ., ಗಳು ಸೇರಿದಂತೆ ಇನ್ನಿತರೆ ಅಭಿವೃದ್ಧಿ ಕಾಮಗಾರಿಗಳಿಗೆ ಅನುದಾನವನ್ನು ಕಾಯ್ದರಿಸಲಾಗಿದೆ ಎಂದು ವಿವರಿಸಿದರು.

ಆಯವ್ಯಯದಲ್ಲಿ 101.79 ಕೋಟಿ ರೂ. ಆರಂಭ ಶಿಲ್ಕು, 258.36 ಕೋಟಿ ಆದಾಯ ಸೇರಿ 264.12 ಕೋಟಿ ವೆಚ್ಚದ ಬಜೆಟ್ ಇದಾಗಿದೆ. ಪ್ರಸಕ್ತ 2026-27ನೇ ಸಾಲಿನ ರಾಜಸ್ವ ಆದಾಯಗಳಲ್ಲಿ ಪಾಲಿಕೆ ನೌಕರರ ವೇತನ 35.15 ಕೋಟಿ, ಎಸ್‌ಎಫ್‌ಸಿ ವಿದ್ಯುತ್ ಶುಲ್ಕ 32.34 ಕೊಟಿ ನೇರನೇಮಕಾತಿ ಪೌರ ಕಾರ್ಮಿಕರ ವೇತನ 8 ಕೋಟಿ, ಆಸ್ತಿ ತೆರಿಗೆ 50 ಕೋಟಿ, ನೀರಿನ ತೆರಿಗೆ 19.10 ಕೋಟಿ, ಕೊಳಚೆ ನೀರು ಸರಬರಾಜು ಶುಲ್ಕ 3.56 ಕೊಟಿ, ಕಟ್ಟಡ ನಿಯಂತ್ರಣಕ್ಕೆ ಸಂಬಂಧಿಸಿದ ಶುಲ್ಕ 2.20 ಕೋಟಿ, ಇತರೆ ಪರವಾನಿಗೆ ಶುಲ್ಕಗಳು 1 ಕೋಟಿ, ಘನತ್ಯಾಜ್ಯ ವಸ್ತು ನಿರ್ವಹಣೆ ಶುಲ್ಕ 4.20 ಕೋಟಿ ಮತ್ತು ಇತರೆ ರಾಜಸ್ವ ಆದಾಯಗಳು ಸೇರಿ ಒಟ್ಟು 176.24 ಕೋಟಿ, ವಿವಿಧ ಅನುದಾನಗಳ ಬಂಡವಾಳ ಆದಾಯಗಳು 81.97 ಕೋಟಿ ಸೇರಿ ಒಟ್ಟು 258.36 ಕೋಟಿ ರೂ.ಗಳ ಬಜೆಟ್ ಇದಾಗಿದೆ ಎಂದು ಸಭೆಯಲ್ಲಿ ಮಾಹಿತಿ ನೀಡಿದರು.

ಪಾಲಿಕೆ ಸದಸ್ಯ ಎಂ.ಪ್ರಭಂಜನ್ ಕುಮಾರ್ ಮಾತನಾಡಿ, ಕಳೆದ ಜನವರಿ ತಿಂಗಳ ವೇಳೆಗೆ ಪಾಲಿಕೆಯಲ್ಲಿ 82 ಕೋಟಿ ರೂ. ಬ್ಯಾಲೆನ್ಸ್ ಇದೆ. ಆದರೆ, ಪಾಲಿಕೆ ಅಧಿಕಾರಿಗಳೇ ನೀಡಿರುವ ಟ್ರಯಲ್ ಬ್ಯಾಲೆನ್ಸ್ ಶೀಟ್‌ನ್ನು 2020 ರಿಂದ ಗಮನಿಸಿದಾಗ 120 ಕೋಟಿ ರೂ. ಸೇರಿಸಲಾಗಿದೆ. ಎಚ್‌ಡಿಎಫ್‌ಸಿ ಬ್ಯಾಂಕ್ ಖಾತೆಯಲ್ಲಿ 75 ಕೋಟಿ ರೂ. ಹೀಗೆ ಮೂರ‌್ನಾಲ್ಕು ಕಡೆ ಸೇರಿಸಲಾಗಿದೆ. ಇವುಗಳನ್ನೆಲ್ಲ ಗಮನಿಸಿದಾಗ ಪಾಲಿಕೆ ಬಜೆಟ್‌ನಲ್ಲಿ ಕನಿಷ್ಠ 400 ಕೋಟಿ ರೂ. ವ್ಯತ್ಯಾಸ ಬರಲಿದೆ ಅಸಮಾಧಾನ ವ್ಯಕ್ತಪಡಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಪಾಲಿಕೆ ಲೆಕ್ಕಾಧಿಕಾರಿ, ಅದು ಕಣ್ತಪ್ಪಿನಿಂದಾಗಿ ಆಗಿದ್ದು, ಈ ಕುರಿತು ನಿಮಗೆ ಎಲ್ಲವೂ ವಿವರಿಸುತ್ತೇವೆ ಎಂದು ಪ್ರತಿಕ್ರಿಯಿಸಿದರು.

ಶಾಸಕ ನಾರಾ ಭರತ್‌ರೆಡ್ಡಿ ಮಾತನಾಡಿ, ನಗರದ ಅಂದ್ರಾಳ್‌ನಲ್ಲಿ ಶಾಲೆಗಾಗಿ ಮೀಸಲಿಟ್ಟಿದ್ದ 4 ಎಕರೆ ಜಮೀನಿಗೆ ನಿವೇಶನಗಳೆಂದು ಪಾಲಿಕೆ ಮಂಜೂರು ಮಾಡಲಾಗಿದೆ. ಇದಕ್ಕೆ ಲಾಗಿನ್ ನೀಡಿದ ಅಧಿಕಾರಿ ವಿರುದ್ಧ ಕ್ರಮಕೈಗೊಳ್ಳಬೇಕು. ಪಾಲಿಕೆಯಲ್ಲಿ ಅಧಿಕಾರಿಗಳು, ಮಧ್ಯವರ್ತಿಗಳದ್ದೇ ಕಾರುಬಾರು. ಜನರು ನೇರವಾಗಿ ಕೆಲಸ ಮಾಡಿಕೊಳ್ಳಲು ಬಂದರೆ ಆಗಲ್ಲ. ಮಧ್ಯವರ್ತಿಗಳಿಂದಲೇ ಕೆಲಸ ಮಾಡಿಸಿಕೊಳ್ಳಬೇಕು ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ರಾಜ್ಯಸಭಾ ಸದಸ್ಯ ಡಾ. ಸೈಯದ್ ನಾಸೀರ್ ಹುಸೇನ್ ಮಾತನಾಡಿ, ವಕ್ಫ್ ಆಸ್ತಿ ಸಂಬಂಧದ ಪ್ರಕರಣದಲ್ಲಿ ಭಾಗಿಯಾಗಿರುವ ಪಾಲಿಕೆ ಉಪ ಆಯುಕ್ತ ನಂದೀಶ್ ಅವರನ್ನು ಸಭೆಗೆ ಕರೆಸಬಾರದು. ಕೂಡಲೇ ಅವರ ವಿರುದ್ಧ ಪ್ರಕರಣ ದಾಖಲಿಸಬೇಕು ಎಂದು ತಾಕೀತು ಮಾಡಿದರು. ಆರಂಭದಲ್ಲಿ ಪಾಲಿಕೆ ಉಪ ಆಯುಕ್ತ ನಂದೀಶ್ ಅವರನ್ನು ಸಭೆಯಿಂದ ಹೊರಕಳುಹಿಸಿದ್ದರು. ಆದರೆ, ಸಭೆಯಿಂದ ಹೊರನಡೆದಿದ್ದ ನಂದೀಶ್ ಕೆಲಹೊತ್ತಿನ ಬಳಿಕ ಪುನಃ ಸಭೆಗೆ ಆಗಮಿಸಿದರು.

===