ಸಾರಾಯಿ ಅಂಗಡಿಗೆ ಹಣ, ಕಾರು ಖರೀದಿ ಎಲ್ಲಿಂದ ಬಂತು?

ಹೊಸಪೇಟೆ;

ವಾಲ್ಮೀಕಿ ಅಭಿವೃದ್ಧಿ ನಿಗಮದ ಬಹುಕೋಟಿ ಹಗರಣವೇ ನಡೆದಿಲ್ಲ ಎಂದಾದರೆ ಶೇಂದಿ, ಸಾರಾಯಿ ಅಂಗಡಿಗಳಿಗೆ ಹಾಗೂ ಬಂಗಾರದ ಮಳಿಗೆಗಳಿಗೆ ಕೋಟ್ಯಂತರ ರೂಪಾಯಿ ಹಣ ಹೇಗೆ ವರ್ಗಾವಣೆಯಾಯಿತು? ಲ್ಯಾಂಬೋರ್ಗಿನಿ ಕಾರು ಖರೀದಿಸಲು ಆ ಹಣ ಎಲ್ಲಿಂದ ಬಂತು ಎಂದು ಮಾಜಿ ಸಚಿವ ಬಿ.ಶ್ರೀರಾಮುಲು ಪ್ರಶ್ನಿಸಿದರು.

ಸಚಿವ ಬಿ. ನಾಗೇಂದ್ರ ಅವರಿಗೆ ಕನಿಷ್ಠ ತಿಳಿವಳಿಕೆಯೂ ಇಲ್ಲ. ಸದನದಲ್ಲಿ ಸ್ವತಃ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರೇ 87 ಕೋಟಿ ರೂ. ಅಕ್ರಮ ನಡೆದಿರುವುದನ್ನು ಒಪ್ಪಿಕೊಂಡಿದ್ದಾರೆ, ಅವರು ನೇರ ನಿಷ್ಠುರ ವ್ಯಕ್ತಿಯಾಗಿದ್ದು ಸುಳ್ಳು ಹೇಳಲು ಸಾಧ್ಯವಿಲ್ಲ. ಈ ಬೃಹತ್ ಅಕ್ರಮದ ವಿರುದ್ಧ ತಪ್ಪಿತಸ್ಥರು ರಾಜೀನಾಮೆ ನೀಡುವವರೆಗೂ ಸದನದ ಒಳಗೂ ಮತ್ತು ಹೊರಗೂ ಬಿಜೆಪಿ ಹೋರಾಟ ಮುಂದುವರಿಸಲಿದೆ ಎಂದರು.

ಪ್ರಸ್ತುತ ರಾಜ್ಯದಲ್ಲಿ ಕಾಂಗ್ರೆಸ್ ಸರ್ಕಾರವೇ ಅಧಿಕಾರದಲ್ಲಿದೆ. ನಾನು ಸಚಿವನಾಗಿದ್ದ ಆರೋಗ್ಯ, ಸಾರಿಗೆ, ಸಮಾಜ ಕಲ್ಯಾಣ ಇಲಾಖೆಗಳು ಸೇರಿದಂತೆ ಯಾವುದೇ ಅವಧಿಯ ವ್ಯವಹಾರಗಳನ್ನಾದರೂ ತನಿಖೆಗೆ ಒಳಪಡಿಸಲಿ. ಸರ್ಕಾರದ ಯಾವುದೇ ತನಿಖೆಯನ್ನು ಎದುರಿಸಲು ನಾನು ಸಿದ್ಧವಿದ್ದು, ಅದನ್ನು ಸ್ವಾಗತಿಸುತ್ತೇನೆ ಎಂದು ಸವಾಲು ಹಾಕಿದರು.

ಕಾಂಗ್ರೆಸ್ ನಾಯಕ ಬಿ.ಕೆ. ಹರಿಪ್ರಸಾದ್ ವಿರುದ್ಧ ಕಿಡಿಕಾರಿದ ಅವರು, ಅವರು ನಿಜಕ್ಕೂ ದೇಶದ ಪರವಾಗಿದ್ದರೆ ವಂದೇ ಮಾತರಂ ಹಾಡಲಿ. ಪಕ್ಷದ ಗುಲಾಮರಾಗಿದ್ದರೆ ಖಂಡಿತ ಹಾಡುವುದಿಲ್ಲ ಎಂದರು.