ವಿದೇಶಿ ಪೈಲ್ವಾನ್‌ಗಳ ಕಾದಾಟಕ್ಕೆ ಪ್ರೇಕ್ಷಕರು ಫಿದಾ

ಪಂದ್ಯಾವಳಿಗೆ ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯಮಟ್ಟದ ಪಟುಗಳನ್ನು ಆಹ್ವಾನಿಸಿದ್ದರಿಂದ ಕುಸ್ತಿ ಕಣ ರಂಗೇರಿತ್ತು. ಅಪಾರ ಸಂಖ್ಯೆಯಲ್ಲಿ ಸೇರಿದ್ದ ಕುಸ್ತಿ ಪ್ರೇಮಿಗಳು ಮಧ್ಯಾಹ್ನದಿಂದ ರಾತ್ರಿವರೆಗೆಗೂ ಕಣ್ಣು ಮಿಟುಕಿಸದೇ ರಸವತ್ತಾದ ಕಾದಾಟ ಆಸ್ವಾದಿಸಿದರು. ಅಖಾಡದಲ್ಲಿ ಮದಗಜಗಳಂತೆ ಕಾದಾಡಿದ ದೇಶಿ-ವಿದೇಶಿ ಪೈಲ್ವಾನ್‌ಗಳನ್ನು ಕಂಡು ಪ್ರೇಕ್ಷಕರು ಕೇಕೆ ಹಾಕುತ್ತಾ, ಸಿಳ್ಳೆ ಹೊಡೆಯುತ್ತಾ ಹುರಿದುಂಬಿಸಿದರು. ಕುಸ್ತಿ ಪ್ರೇಮಿಗಳಿಗೆ ಈ ಅಖಾಡ ಒಂದು ರಸದೌತಣವಾಗಿತ್ತು.

ಪಂದ್ಯಾವಳಿಯಲ್ಲಿ ಎರಡು ಪಂದ್ಯಗಳು ರಾತ್ರಿಯಾದರೂ ನೋಡುಗರ ಎದೆಬಡಿತ ಹೆಚ್ಚಾಗುತ್ತಾ, ತುದಿಗಾಲಲ್ಲಿ ನಿಲ್ಲಿಸುವಂತೆ ಮಾಡಿತ್ತು. ಮಹಾರಾಷ್ಟ್ರದ ಪುಣೆಯ ಚಾಂಪಿಯನ್ ಸತೀಶ್ ಮುದ್ದೆ ಅವರು ಕಜಕಿಸ್ತಾನದ ಕಜಕಿ ಚಾಂಪಿಯನ್ ದೌಲೆಟಿಯಾರ್ ಅವರನ್ನು ಕೇವಲ 10 ನಿಮಿಷಗಳಲ್ಲಿ ಸೋಲಿಸಿದರು.

ಎರಡನೇ ಪಂದ್ಯದಲ್ಲಿ ಬ್ರೆಜಿಲ್‌ನ ಬ್ರೆಜಿಲಿಯನ್ ಚಾಂಪಿಯನ್ ಫ್ರೇಡೆಲಾ ಲೀಮಾ ಅವರು ಹರಿಯಾಣ ಕೇಸರಿ ವಿಜೇತ ಪೈಲ್ವಾನ್ ಹರ್ಷ ಕುಮಾರ್ ಚೌದ್ರಿ ಅವರನ್ನು ಮಣಿಸಿದ ರೀತಿಯೂ ಆಕರ್ಷಕವಾಗಿತ್ತು. ಕ್ಷಣಾರ್ಧದಲ್ಲೇ ಪಂದ್ಯಕ್ಕೆ ಅಂತ್ಯ ಹಾಡಿದರು. ಸೇರಿದ್ದ ಕ್ರೀಡಾಪ್ರೇಮಿಗಳ ಹರ್ಷೋದ್ಗಾರ ಮುಗಿಲುಮುಟ್ಟಿತು. ವಿದೇಶಿ ಕುಸ್ತಿ ಪೈಲ್ವಾನ್‌ಗೆ ಭಾರಿ ಬೆಂಬಲ ವ್ಯಕ್ತವಾಯಿತು.

ಇಂದೋರ್‌ನ ಆದಾಯ ತೆರಿಗೆ ಇಲಾಖೆಯ ಅಧಿಕಾರಿ ಮುದಾಶೀರ್ ಮೂಸಾ ಪಂಜಾಬ್‌ನ ಅಮಿತ್ ಶರ್ಮಾ ಅವರನ್ನು ಕೆಲ ನಿಮಿಷಗಳಲ್ಲಿ ಸೋಲಿಸಿ ನಗೆ ಬೀರಿದರು. ಇವರಿಬ್ಬರ ಕಾದಾಟ ಕುಸ್ತಿ ಪ್ರೇಮಿಗಳನ್ನು ನಿಂತಲ್ಲೇ ಕುಣಿದು ಕುಪ್ಪಳಿಸುವಂತೆ ಮಾಡಿತು. ದಾವಣಗೆರೆಯ ಗಿರೀಶ್ ಅವರು ಕೊಲ್ಲಾಪುರದ ರಾಜ್ ಪೂವಾರ್ ಅವರನ್ನು ಸುಮಾರು 15 ನಿಮಿಷಗಳ ಕಾದಾಟದಲ್ಲಿ ಗೆಲುವು ಸಾಧಿಸಿದರು. ರಾಣೆಬೆನ್ನೂರಿನ ಕಿರಣ್ ಅವರು ಪಂಜಾಬ್‌ನ ರೂಪೇಶ್ ಪಾಟೀಲ್ ಅವರನ್ನು ಸೋಲಿಸಿದರು. ಮಹಾರಾಷ್ಟ್ರದ ಸೌರಾದ್ ಹಾಗೂ ಹರಪನಹಳ್ಳಿಯ ಇರ್ಷಾದ್ ನಡುವೆ ನಡೆದ ಕದನ ಸಮಬಲದಲ್ಲಿ ಅಂತ್ಯವಾಯಿತು. ಹರಪನಹಳ್ಳಿಯ ಕೆಂಚಪ್ಪ ಕೂಡ ಗೆಲುವಿನ ನಗೆ ಬೀರಿದರು.

ನಾಣಿಕೇರಿಯ ಮುಖಂಡರಾದ ಬಾರಿಕರ ಬಾಪೂಜಿ, ಹುಳ್ಳಿ ಪ್ರಕಾಶ್, ತಿಗರಿ ಮಾರುತಿ, ಮಡಿವಾಳರ ಹುಲುಗಪ್ಪ, ಮಡಿವಾಳರ ಪ್ರಕಾಶ್, ಬಿ. ಸೋಮಣ್ಣ, ಗರಗದ ಪ್ರಕಾಶ್, ಹುಗ್ಗಿ ಹುಲುಗಪ್ಪ, ಹನುಮೇಶ್, ಕುರುಬರ ಬಸವರಾಜ, ದಾದಮ್ಮನವರ ಬಸವರಾಜ, ಬಡೆಲಡಕಿ ಕೃಷ್ಣಪ್ಪ, ಪೇಂಟರ್ ಬಾಬು, ಮುಗುಲಿ ಕನಕಪ್ಪ, ಅರಳಿಹಳ್ಳಿ ರಾಮಚಂದ್ರಪ್ಪ, ಕುರುಬರ ನಾಗಪ್ಪ ಹಾಗೂ ಮರಡಿ ಯಮುನಪ್ಪ ನಿರ್ಣಾಯಕರಾಗಿ ಕಾರ್ಯನಿರ್ವಹಿಸಿದರು.