ತೋಟಗಾರಿಗೆ ಇಲಾಖೆಯ ಫಲ-ಪುಷ್ಪ ಪ್ರದರ್ಶನದಲ್ಲಿ ಕೃತಕ ಜಲಪಾತದಲ್ಲಿ ಧುಮ್ಮಿಕ್ಕುವ ನೀರು, ಕಿನಾರೆಯ ಹಸಿರು ಹೊದಿಕೆ ಹಾಗೂ ದೊಡ್ಡ ಬಸವೇಶ್ವರ ಮೂರ್ತಿ, ಆಲಯದ ಗೋಪುರ ಗಮನ ಸೆಳೆಯಿತು. ರೈತರು ಜಮೀನಿನಲ್ಲಿ ಬೆಳೆದ ಹಲವು ಬಗೆಯ ಹಣ್ಣು-ಹಂಪಲು ಪ್ರದರ್ಶಿಸಿದರು. ಕಲ್ಲಂಗಡಿ ಹಣ್ಣಿನಲ್ಲಿ ರಚಿಸಿದ ಕುವೆಂಪು, ದ.ರಾ.ಬೇಂದ್ರೆ, ಮಾಸ್ತಿ ವೆಂಕಟೇಶ ಅಯ್ಯಂಗಾರ ಹಾಗೂ ಇತರ ಸಾಹಿತಿಗಳ ಚಿತ್ರಗಳಿಗೆ ಜನರು ಮನಸೋತರು. ಪಶುಸಂಗೋಪನೆ, ಮೀನುಗಾರಿಗೆ, ಕೃಷಿ ಇಲಾಖೆಯಿಂದ ಸಿಗುವ ಸೌಲಭ್ಯ, ಸಹಾಯಧನ, ಆಧುನಿಕ ಪರಿಕರಗಳ ಬಗ್ಗೆ ಜನರು ಮಾಹಿತಿ ಪಡೆದರು.

ಕುರುಗೋಡಿನ ಐತಿಹಾಸಿಕ ಹಿನ್ನೆಲೆ ಸಾರುವ ದೇವಾಲಯ, ಕೋಟೆ, ಗುಡ್ಡಗಾಡನ್ನು ಚಿತ್ರಿಕಲಾವಿದರು ಕುಂಚದಲ್ಲಿ ಜೀವ ತುಂಬಿದ್ದು ಚಿತ್ರವೊಂದು ಭಾವ ಹಲವು ಎಂಬಂತೆ ಜನ ಮಂತ್ರಮುಗ್ಧರಾದರು. ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸೇರಿದಂತೆ ವಿವಿಧ ಇಲಾಖೆ ಯೋಜನೆ ಹಾಗೂ ಸಿರಿಧಾನ್ಯ ಕುರಿತು ಜನರಲ್ಲಿ ಜಾಗೃತಿ ಮೂಡಿಸಲಾಯಿತು.

ಗ್ರಾಮೀಣ ಭಾಗದಲ್ಲಿ ಹೆಲಿಕಾಪ್ಟರ್ ಹಾರಾಟವನ್ನು ಆಗಸದಲ್ಲಿ ದೂರದಿಂದ ಕಣ್ತುಂಬಿಕೊಂಡವರೇ ಹೆಚ್ಚು. ಆದರೆ ಕುರುಗೋಡು ಉತ್ಸವ ಹಿನ್ನೆಲೆಯಲ್ಲಿ ಬೈ ಸ್ಕೈ ಆಯೋಜಿಸಿದ್ದು, ಜನರು ಹೆಲಿಕಾಪ್ಟರ್ ನೋಡಲು ಮುಗಿಬಿದ್ದರು. ಒಬ್ಬರಿಗೆ 3600 ರೂ., ನಿಗದಿ ಮಾಡಲಾಗಿತ್ತು. ಕೂಲಿ ಕಾರ್ಮಿಕರೇ ಹೆಚ್ಚಾಗಿರುವ ತಾಲೂಕಿನಲ್ಲಿ ಜನರು ಹೆಲಿಕಾಪ್ಟರ್‌ನಲ್ಲಿ ಕುಳಿತಿದ್ದಕ್ಕಿಂತ ನಿಂತು ನೋಡಿದವರೇ ಹೆಚ್ಚಿದ್ದರು.