ಉಡುಪಿಯಲ್ಲಿ ಮುಸ್ಲೀಮರಿಂದ ಸಂಭ್ರಮದಿಂದ ಬಕ್ರೀದ್​ ಆಚರಣೆ

ಜಿಲ್ಲಾದ್ಯಂತ ಮಸೀದಿಗಳಲ್ಲಿ ಪ್ರಾರ್ಥನೆ | ಪರಸ್ಪರ ಶುಭಾಶಯ ವಿನಿಮಯ

ಉಡುಪಿ: ಮುಸ್ಲೀಂ ಸಮುದಾಯದವರು ಜಿಲ್ಲಾದ್ಯಂತ ಈದುಲ್​ ಅಝಾ (ಬಕ್ರೀದ್​)ಹಬ್ಬವನ್ನು ಸೋಮವಾರ ಸಂಭ್ರಮ, ಸಡಗರದಿಂದ ಆಚರಿಸಿದರು.
ಉಡುಪಿ ನಗರ, ಕಾಪು, ಬ್ರಹ್ಮಾವರ, ಕುಂದಾಪುರ, ಬೈಂದೂರು, ಹೆಬ್ರಿ, ಹಾಗೂ ಕಾರ್ಕಳ ತಾಲೂಕುಗಳ ವಿವಿಧ ಮಸೀದಿಗಳಲ್ಲಿ ವಿಶೇಷ ಈದ್​ ನಮಾಜ್​ ಆಚರಿಸಿದರು.

ಮಸೀದಿಯಲ್ಲಿ ನಮಾಜ್​

ಮುಸ್ಲೀಮರು ಬೆಳಗ್ಗೆ ಹೊಸ ಬಟ್ಟೆ ಧರಿಸಿ ಮಸೀದಿಗೆ ತೆರಳಿ ಪ್ರಾರ್ಥನೆ ಸಲ್ಲಿಸಿದರು. ಕೆಲವು ಮಸೀದಿಗಳಲ್ಲಿ ಮಹಿಳೆಯರಿಗೂ ಈದ್​ ನಮಾಜ್​ ಮಾಡಲು ಪ್ರತ್ಯೇಕ ವ್ಯವಸ್ಥೆ ಕಲ್ಪಿಸಲಾಗಿತ್ತು. ನಮಾಜ್​ ಬಳಿಕ ಪರಸ್ಪರ ಹಬ್ಬದ ಶುಭಾಶಯ ವಿನಿಮಯ ಮಾಡಿಕೊಂಡರು.

ಉಡುಪಿಯ ಜಾಮೀಯ ಮಸೀದಿಯಲ್ಲಿ ಮೌಲಾನಾ ಅಬ್ದುರಶೀದ್​ ನದ್ವಿ ನೇತೃತ್ವದಲ್ಲಿ ಮತ್ತು ಉಡುಪಿಯ ಅಂಜುಮಾನ್​ ಮಸೀದಿಯಲ್ಲಿ ಮೌಲಾನಾ ಇನಾಯುತುಲ್ಲಾ ರಝ್ವಿ ನೇತೃತ್ವದಲ್ಲಿ ಈದ್​ ನಮಾಜ್​ ನಡೆಸಲಾಯಿತು.

ಸಾಮರಸ್ಯದ ಮಹತ್ವ

ಉಡುಪಿಯ ನಾಯರ್​ಕೆರೆಯ ಹಾಶಿಮಿ ಮಸೀದಿಯಲ್ಲಿ ಮೌಲಾನಾ ಒಬೈದುರ್​ ರೆಹಮಾನ್​ ನದ್ವಿ ಈದ್​ ನಮಾಜ್​ ನೇತೃತ್ವ ವಹಿಸಿ ಮಾತನಾಡಿ, ಈದ್​ ಅಲ್​ ಅದಾಹ್​ ಮಹತ್ವ ಹಾಗೂ ಸಮಾಜದಲ್ಲಿ ಪ್ರೀತಿ, ಶಾಂತಿ ಮತ್ತು ಸಾಮರಸ್ಯದ ಮಹತ್ವ ತಿಳಿಸಿದರು. ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳೆಯರೂ ಪಾಲ್ಗೊಂಡು ಈದ್​ ಶುಭಾಶಯ ವಿನಿಮಯ ಮಾಡಿದರು.

ಖುತ್ಬಾ ಪಾರಾಯಣ

ಉಡುಪಿ ಜಿಲ್ಲಾ ಸಂಯುಕ್ತ ಜಮಾತ್​ನ ಕೇಂದ್ರ ಮಸೀದಿಯಾದ ಮೂಳೂರು ಜುಮಾ ಮಸೀದಿಯಲ್ಲಿ ಖತೀಬ್​ ಹಾಫಿಲ್​ ಮುಹಮ್ಮದ್​ ಅಶ್ರಫ್​ ಸಖಾಫಿ ನೇತೃತ್ವದಲ್ಲಿ ಈದ್​ ವಿಶೇಷ ನಮಾಜ್​ ಮತ್ತು ಖುತ್ಬಾ ಪಾರಾಯಣ ನಡೆಯಿತು.

ಕುಂದಾಪುರದಲ್ಲಿ ಈದ್​ ಮೆರವಣಿಗೆ

ಕುಂದಾಪುರದಲ್ಲಿ ಜುಮಾ ಮಸೀದಿಯಿಂದ ಬೆಳಗ್ಗೆ ಈದ್​ ಮೆರವಣಿಗೆ ಹೊರಟು, ಕುಂದಾಪುರ ಈದ್ಗಾ ಮೈದಾನದಲ್ಲಿ ಧರ್ಮಗುರುಮೌಲಾನಾ ಕರಾರ್​ ಹುಸೇನ್​ನೇತೃತ್ವದಲ್ಲಿ ಈದ್​ ನಮಾಜ್​ ಆಚರಿಸಲಾಯಿತು.

ಗಂಗೊಳ್ಳಿಯ ಜುಮ್ಮಾ ಮಸೀದಿಯಲ್ಲಿ ಮೌಲಾನಾ ಮುಝಮ್ಮಿಲ್​ ನದ್ವಿ, ಮೋಹಿದೀನ್​ ಜುಮ್ಮಾ ಮಸೀದಿಯಲ್ಲಿ ಖತೀಬ್​ ಮೌಲಾನಾ ಅಬ್ದುಲ್​ ಕರೀಂ ನದ್ವಿ,ಶಾಹಿ ಜುಮ್ಮಾ ಮಸೀದಿಯಲ್ಲಿ ಮೌಲಾನಾ ರೆಹಮತುಲ್ಲಾ ಕೋಲ್ಕರ್​ ನದ್ವಿ ನೇತೃತ್ವದಲ್ಲಿ ವಿಶೇಷ ನಮಾಜ್​ ನಡೆಸಲಾಯಿತು.

ಬಕ್ರೀದ್​ ಹಬ್ಬದ ಹಿನ್ನೆಲೆಯಲ್ಲಿ ಯಾವುದೇ ಅಹಿತಕರ ಘಟನೆ ನಡೆಯದಂತೆ ಜಿಲ್ಲಾದ್ಯಂತ ಬಿಗಿ ಪೊಲೀಸ್​ ಭದ್ರತೆ ಏರ್ಪಡಿಸಲಾಗಿತ್ತು.