ಕಬ್ಬಿನ ಕಿಚ್ಚಿನಿಂದ ಅನ್ನದಾತರಿಗೆ ಬರೆ..!

ಈ ಹಿಂದೆಯೂ ಪ್ರತಿಭಟನೆಗಳು ವಿಕೋಪಕ್ಕೆ ತಿರುಗಿದ ಪ್ರಸಂಗಗಳು ಇವೆ. ಕಬ್ಬು ಪಲ್ಟಿ ಮಾಡುವುದು, ಒಂದೆರೆಡು ಕಡೆಗೆ ಬೆಂಕಿ ಹಚ್ಚಿ, ಬಳಿಕ ನಂದಿಸುವುದು ನಡೆದಿದ್ದಿದೆ. ಆದರೆ ಹೀಗೆ ಸಾಮೂಹಿಕವಾಗಿ ಸಾಲು ಸಾಲಾಗಿ ನಿಂತಿದ್ದ ಕಬ್ಬು ತುಂಬಿದ್ದ ಟ್ರಾೃಕ್ಟರ್‌ಗಳಿಗೆ ಬೆಂಕಿ ಹಚ್ಚಿ, ಅನ್ನದಾರರಿಗೆ ಅಪಾರ ಪ್ರಮಾಣದ ನಷ್ಟವುಂಟು ಮಾಡಿದ ಉದಾಹರಣೆ ಇರಲಿಲ್ಲ.

ಇದೀಗ ನಡೆಯಬಾರದ ಘಟನೆಯಂತೂ ಸಂಭವಿಸಿ ಹೋಗಿದೆ. ಇದರಿಂದ ನಷ್ಟಕ್ಕೆ ಸಿಲುಕಿರುವ ಅನ್ನದಾತರ ಕಣ್ಣೀರಿಗೆ ಯಾರು ಹೊಣೆ? ಸಮೀರವಾಡಿ ಸಕ್ಕರೆ ಕಾರ್ಖಾನೆ ಬಳಿ ಈ ರೀತಿ ಕಲ್ಲು ತೂರಾಟ, ಟ್ರಾೃಕ್ಟರ್‌ಗಳಿಗೆ ಬೆಂಕಿ ಹಚ್ಚಿದ ಪ್ರಕರಣದಲ್ಲಿ ಭಾಗಿ ಆಗಿರುವ ದುಷ್ಕರ್ಮಿಗಳು ಯಾರು? ಇದು ಪತ್ತೆ ಆಗಬೇಕಿದೆ.

ಅಹಿತಕರ ಘಟನೆ ಬಳಿಕ ಕಲ್ಲು ತೂರಾಟ ಹಾಗೂ ಬೆಂಕಿ ಹಚ್ಚಿದ ಪ್ರಕರಣಕ್ಕೂ ಪ್ರತಿಭಟನೆ ನಡೆಸುತ್ತಿದ್ದ ರೈತರಿಗೂ ಯಾವುದೇ ಸಂಬಂಧ ಇಲ್ಲ ಎಂದು ರೈತ ಮುಖಂಡರು ಸ್ಪಷ್ಟವಾಗಿ ಹೇಳಿದ್ದಾರೆ. ಶಾಂತವಾಗಿ ಹೋರಾಟ ನಡೆಸುವುದು ನಮ್ಮ ಉದ್ದೇಶವಾಗಿತ್ತು. ಗುಂಪಿನಲ್ಲಿ ಸೇರಿರುವ ದುಷ್ಕರ್ಮಿಗಳು ಈ ಅಶಾಂತಿ ಸೃಷ್ಟಿಗೆ ಹೊಣೆಯಾಗಿದ್ದಾರೆ ಎಂದು ಪ್ರತಿಭಟನಾಕಾರರು ಹೇಳಿದ್ದಾರೆ.

ಇದೇ ದಾಟಿಯಲ್ಲಿ ಸಕ್ಕರೆ ಸಚಿವ ಶಿವಾನಂದ ಪಾಟೀಲ ಅವರು ಮಾಧ್ಯಮಗಳ ಎದುರು ಹೇಳಿದ್ದು, ಬೆಂಕಿ ಹಚ್ಚಿದ್ದು ರೈತರಲ್ಲ, ಯಾರೋ ಕಿಡಿಗೇಡಿಗಳು ಇದರಲ್ಲಿ ಭಾಗಿ ಆಗಿದ್ದಾರೆ. ಈ ಬಗ್ಗೆ ಸರ್ಕಾರ ತನಿಖೆ ನಡೆಸುತ್ತದೆ ಎನ್ನುವ ಸುಳಿವನ್ನು ನೀಡಿದ್ದಾರೆ. ಹಾಗೆಯೇ ಜಿಲ್ಲಾ ಉಸ್ತುವಾರಿ ಸಚಿವರು, ರೈತರು ಮತ್ತು ಸಕ್ಕರೆ ಕಾರ್ಖಾನೆಗಳ ಜೊತೆ ಸಭೆ ನಡೆಸಿದ್ದೆವು. ರಿಕವರಿ ಆಧಾರಿತ ಬೆಲೆ ನಿರ್ಧಾರಕ್ಕೆ ರೈತರು ವಿರೋಧಿಸಿದ್ದರು. ಇದಕ್ಕೆ ಕಾರ್ಖಾನೆಯವರು ಒಪ್ಪಿದ್ದರು. ಈ ನಡುವೆ ಬೆಂಕಿ ಹಚ್ಚಿದ ಘಟನೆ ನಡೆದಿದೆ. ಈ ಬಗ್ಗೆ ವರದಿ ತರಿಸಿಕೊಂಡು ಮುಂದಿನ ಕ್ರಮ ತೆಗೆದುಕೊಳ್ಳುವುದಾಗಿ ಹೇಳಿದ್ದಾರೆ.

ಇದೆಲ್ಲದರ ಮಧ್ಯೆ ಬೆಂಕಿಯ ಕೆನ್ನಾಲಿಗೆ ಸಿಕ್ಕು ಬೆಂದಿದ್ದು ಮಾತ್ರ ಅನ್ನದಾತರ ಶ್ರಮದ ಫಲವಾಗಿದ್ದ ಲಕ್ಷಾಂತರ ಬೆಲೆಯ ಕಬ್ಬು ಹಾಗೂ ಕೋಟ್ಯಂತರ ರೂ. ಗಳ ಟ್ರಾೃಕ್ಟರ್‌ಗಳಿಗೆ ಆಗಿರುವ ನಷ್ಟ. ಹೀಗಾಗಿಯೇ ಅತ್ತ ಬೆಂಕಿ ಕೆನ್ನಾಲಿಗೆ ಚಾಚಿದ್ದರೆ ಮತ್ತೊಂದು ಬದಿಗೆ ನಿಂತಿದ್ದ ಅನ್ನದಾತರರು ಧಾರಾಕಾರವಾಗಿ ಕಣ್ಣೀರು ಹಾಕುತ್ತ ನಿಂತಿದ್ದರು. ನಾವು ಬೆಳೆದ ಕಬ್ಬನ್ನು ಇದ್ಯಾವ ಸ್ಥಿತಿಗೆ ದೂಡಿದರು ಎಂದು ಬೆಂಕಿ ಹಚ್ಚಿದ್ದ ಕಿಡಿಗೇಡಿಗಳಿಗೆ ಹಿಡಿಶಾಪ ಹಾಕುತ್ತಿದ್ದರು.

2018ರಲ್ಲಿ ಜಿಲ್ಲೆಯಲ್ಲಿ ಕಬ್ಬಿನ ಹೋರಾಟ ತೀವ್ರಗೊಂಡಿತ್ತು. ಭರ್ತಿ ಒಂದು ತಿಂಗಳು ಪ್ರತಿಭಟನೆಗಳು ನಡೆದಿದ್ದವು. ಕೊನೆಗೆ ಮಾತುಕತೆ ಮೂಲಕ ಸಮಸ್ಯೆ ಬಗೆಹರಿಸುವಲ್ಲಿ ಜಿಲ್ಲಾಡಳಿತ ಯಶಸ್ವಿಯಾಗಿತ್ತು. ಈ ರೀತಿ ಆಸ್ತಿ-ಪಾಸ್ತಿಗೆ ದೊಡ್ಡಮಟ್ಟದ ಹಾನಿ ಆಗಿರಲಿಲ್ಲ. ಈ ಸಲವೂ ಸಮಸ್ಯೆಯನ್ನು ಸೌಹಾರ್ದಯುತವಾಗಿ ಬಗೆಹರಿಸುವ ನಿಟ್ಟಿನಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವ ಆರ್.ಬಿ. ತಿಮ್ಮಾಪೂರ, ಜಿಲ್ಲಾಧಿಕಾರಿ ಸಂಗಪ್ಪ, ಎಸ್ಪಿ ಸಿದ್ಧಾರ್ಥ ಗೋಯಲ್, ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಪ್ರಸನ್ನ ದೇಸಾಯಿ, ಜಿಪಂ ಸಿಇಒ ಶಶಿಧರ ಕುರೇರ ಮೇಲಿಂದ ಮೇಲೆ ಸಭೆಗಳನ್ನು ನಡೆಸಿ, ಸಂಧಾನಕ್ಕೆ ನಡೆದಿದ್ದ ಪ್ರಯತ್ನ ಮಾತ್ರ ಫಲ ನೀಡಿರಲಿಲ್ಲ.

ಕಬ್ಬು ಬೆಳೆಗಾರರ ಮುಖಂಡರು ಹಾಗೂ ಸಕ್ಕರೆ ಕಾರ್ಖಾನೆ ಮಾಲೀಕರ ನಡುವಿನ ಹಗ್ಗ ಜಗ್ಗಾಟ ಕ್ಷೀಣಿಸುತ್ತಲೂ ಬಂದಿತ್ತು. ಇನ್ನೇನು, ಇಂದು, ನಾಳೆ ಇತ್ಯರ್ಥಕ್ಕೆ ಬರಬಹುದು ಎನ್ನುವ ಆಶಾಭಾವನೆ ಇರುವಾಗಲೇ ನಡೆಯಬಾರದ ಅಹಿತಕರ ಘಟನೆ ಈಗ ನಡೆದು ಹೋಗಿದೆ.

ಮುಧೋಳದಲ್ಲಿ ಗುರುವಾರ ರೈತರ ಪ್ರತಿಭಟನೆ ತೀವ್ರಗೊಂಡಿತ್ತು. ಅಂಗಡಿ ಮುಂಗಟ್ಟು ಬಂದ್ ಆಗಿದ್ದವು. ವಿದ್ಯಾರ್ಥಿಗಳು ಬೆಂಬಲ ನೀಡಿದ್ದರು. ಟ್ರಾೃಕ್ಟರ್ ರ‌್ಯಾಲಿ ನಡೆಸಿದ್ದರು. ಹೀಗಾಗಿ ಪೊಲೀಸರು ಹೆಚ್ಚಿನ ನಿಗಾವನ್ನು ಮುಧೋಳಕ್ಕೆ ಕೇಂದ್ರೀಕರಿಸಿದ್ದರು. ಮೂರು ದಿನಗಳ ಹಿಂದೆ ಬೀಳಗಿ ತಾಲೂಕಿನ ಜೆಮ್ ಕಾರ್ಖಾನೆ ಬಳಿ ದಿಢೀರನೇ ನಡೆದ ಪ್ರತಿಭಟನೆ ಗಮನದಲ್ಲಿ ಇಟ್ಟುಕೊಂಡು ಮುಧೋಳ ಭಾಗದ ಸಕ್ಕರೆ ಕಾರ್ಖಾನೆಗಳು ಹೆಚ್ಚಿನ ಎಚ್ಚರಿಕೆ ವಹಿಸಬೇಕಿತ್ತು. ಜೊತೆಗೆ ಸಮೀರವಾಡಿ ಕಾರ್ಖಾನೆ ಸೇರಿದಂತೆ ಆ ಭಾಗದ ಕಾರ್ಖಾನೆಗಳಿಗೆ ಹೆಚ್ಚಿನ ಭದ್ರತೆ ಇರಬೇಕಿತ್ತು.

ರೈತರು ಶಾಂತವಾಗಿ ಪ್ರತಿಭಟನೆ ನಡೆಸಿದರೂ ಕಿಡಿಗೇಡಿಗಳು ಪರಿಸ್ಥಿತಿಯ ಲಾಭ ಪಡೆದುಕೊಂಡು ಕಾನೂನು ಸುವ್ಯವಸ್ಥೆಗೆ ದಕ್ಕೆ ಉಂಟು ಮಾಡುವ ಸಾಧ್ಯಗಳನ್ನು ಇಂಥ ಸಂದರ್ಭದಲ್ಲಿ ಅಲ್ಲಗಳೆಯುವಂತಿಲ್ಲ. ಈ ವಿಚಾರವಾಗಿ ಜಿಲ್ಲಾಡಳಿತ ಎಡವಿತಾ? ಎನ್ನುವ ಮಾತುಗಳು ಕೇಳಿ ಬರುತ್ತಿವೆ. ಇದೆಲ್ಲದರ ಪರಿಣಾಮ ಕಬ್ಬಿನ ಕಿಚ್ಚು ಬರೆ ಎಳೆದಿದ್ದು ಮಾತ್ರ ಅದೇ ಅನ್ನದಾತರಿಗೆ ಎನ್ನುವುದು ದಿಟ.

ಸದ್ಯ ಮುಧೋಳ ಭಾಗದಲ್ಲಿ ಪರಿಸ್ಥಿತಿ ಬೂದಿ ಮುಚ್ಚಿದ ಕೆಂಡದಂತಿದೆ. ಹೆಚ್ಚಿನ ಅನಾಹುತ ಸಂಭವಿಸದಂತೆ ಜಿಲ್ಲಾಧಿಕಾರಿಗಳು ಈಗ ಮೂರು ದಿನ ನಿಷೇಧಾಜ್ಞೆ ಜಾರಿ ಮಾಡಿದ್ದಾರೆ. ಪರಿಸ್ಥಿತಿ ಇನ್ನಷ್ಟು ಬಿಗಡಾಯಿಸುವ ಮುನ್ನ ಕಬ್ಬು ಬೆಳೆಗಾರರ ಮುಖಂಡರು ಹಾಗೂ ಸಕ್ಕರೆ ಕಾರ್ಖಾನೆ ಮಾಲೀಕರ ನಡುವೆ ಸೌಹಾರ್ದತೆ ಮೂಡುವಂತೆ ಮಾಡಿ, ಸಮಸ್ಯೆ ಬಗೆಹರಿಸಲು ಮುಂದಾಗಬೇಕಿದೆ. ಇದು ಜಿಲ್ಲಾಡಳಿತದ ಮುಂದಿರುವ ಸವಾಲ್.