ಕೃಷ್ಣಾ ತೀರದ ಜನರ ಕಣ್ಣೀರಿಗೆ ಯಾರು ದಿಕ್ಕು ?

ನದಿ ತೀರದ ಗ್ರಾಮಸ್ಥರು ಕುಡಿಯುವ ನೀರಿಗಾಗಿ ನದಿಯ ಪಾತ್ರದಲ್ಲಿ ಗುಂಡಿಗಳನ್ನು ತೋಡಿ, ಬಸಿಗಾಲುವೆಗಳನ್ನು ನಿರ್ಮಿಸಿಕೊಂಡು ಪರದಾಡುತ್ತಿದ್ದಾರೆ. ಆದರೆ, ಇದರ ಬಗ್ಗೆ ಯಾವುದೇ ಚಕಾರ ಎತ್ತದ ಜಿಲ್ಲಾ ಉಸ್ತುವಾರಿ ಸಚಿವರು ಕೇವಲ ಮುಧೋಳ ಕ್ಷೇತ್ರಕ್ಕೆ ಮಾತ್ರ ಸೀಮಿತವಾಗಿದ್ದಾರೆ. ನಮ್ಮ ಸಂಕಷ್ಟ ಅವರಿಗೆ ಕಾಣಿಸುತ್ತಿಲ್ಲ ಎಂದು ನದಿ ತೀರದ ನಿವಾಸಿಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಮುಧೋಳ ತಾಲೂಕಿನಲ್ಲಿ ನದಿಯ ನೀರು ಕಡಿಮೆಯಾದ ತಕ್ಷಣ ಮರುದಿನವೇ ನೀರು ಬಿಡಿಸಲು ಮುತುವರ್ಜಿ ವಹಿಸುವ ಸಚಿವ ಆರ್. ಬಿ. ತಿಮ್ಮಾಪುರ ಅವರು, ಜಮಖಂಡಿ ಭಾಗದ ಕೃಷ್ಣಾ ನದಿಗೆ ನೀರು ಹರಿಸುವಲ್ಲಿ ಅಷ್ಟೆ ಆಸಕ್ತಿ ತೋರಿಸುತ್ತಿಲ್ಲ. ಇನ್ನು ನಮಗೆ ಯಾರೂ ದಿಕ್ಕಿಲ್ಲ, ನಮ್ಮ ಹಣೆಬರಹವೇ ಇಷ್ಟೇ ಎಂದು ನದಿ ನೀರನ್ನೇ ನಂಬಿಕೊಂಡಿರುವ ರೈತರು ಬೇಸರ ತೋಡಿಕೊಂಡಿದ್ದಾರೆ.

ನಮ್ಮೂರಿನ ಕಡೆಗೆ ನೀರು ಬಿಡಿಸಲು ಉಸ್ತುವಾರಿ ಸಚಿವರಿಗೆ ಪುರುಸೊತ್ತಿಲ್ಲ. ಅವರು ಜಮಖಂಡಿಗೆ ಮದುವೆ, ಮುಂಜಿಗಳಂತಹ ಖಾಸಗಿ ಕಾರ್ಯಕ್ರಮಗಳಿಗೆ ಬರಲು ಸಮಯ ಮಾಡಿಕೊಳ್ಳುತ್ತಾರೆ. ಆದರೆ ನಮ್ಮೂರಲ್ಲಿ ಉಂಟಾಗಿರುವ ನೀರಿನ ಸಮಸ್ಯೆಯನ್ನು ಕಣ್ಣಾರೆ ನೋಡಲು ಬರುವುದಿಲ್ಲ ಎನ್ನುವುದು ನಮ್ಮ ದುರ್ದೈವ ಎಂದು ಮೈಗೂರು ಗ್ರಾಮದ ರೈತ ಮಲ್ಲು ಪಾಟೀಲ ತೀವ್ರ ಬೇಸರ ವ್ಯಕ್ತಪಡಿಸಿದರು.

ನದಿಯಲ್ಲಿ ನೀರಿಲ್ಲದೆ ಜಾನುವಾರು ಅಲ್ಲಿನ ಉಪ್ಪು ನೀರನ್ನೇ ಕುಡಿಯುವಂತಾಗಿದೆ. ಇದರಿಂದಾಗಿ ದನಕರುಗಳಿಗೆ ಚರ್ಮರೋಗ ಬರುವ ಸಾಧ್ಯತೆ ಹೆಚ್ಚಾಗಿದೆ. ಇಷ್ಟಾಗಿದ್ದರೂ ತಾಲೂಕು ಮಟ್ಟದ ಅಧಿಕಾರಿಗಳು ಯಾವುದೇ ಮುಂಜಾಗ್ರತಾ ಕ್ರಮ ಕೈ ಗೊಳ್ಳದಿರುವುದು ರೈತರಲ್ಲಿ ಆತಂಕ ಮೂಡಿಸಿದೆ.

ಪ್ರತಿ ವರ್ಷ ಬೇಸಿಗೆ ಕಾಲ ಪ್ರಾರಂಭವಾಗುತ್ತಿದ್ದಂತೆ ಕೃಷ್ಣಾ ನದಿಯ ಒಡಲು ಸಂಪೂರ್ಣ ಖಾಲಿಯಾಗಿ ರಾಜಸ್ಥಾನದ ಮರುಭೂಮಿಯಂತಾಗುತ್ತದೆ. ಇದರಿಂದ ನದಿ ತೀರದ ಗ್ರಾಮಸ್ಥರು ಹನಿ ನೀರಿಗೂ ಪರದಾಡಬೇಕಾಗುತ್ತದೆ. ಆದರೆ ಮಳೆಗಾಲ ಪ್ರಾರಂಭವಾದರೆ ಸಾಕು, ಇದೇ ನದಿ ಉಕ್ಕಿ ಹರಿದು ಇಡೀ ಊರನ್ನೇ ಬಿಟ್ಟು ಓಡುವಂತಹ ಪ್ರವಾಹದ ಸ್ಥಿತಿ ನಿರ್ಮಾಣವಾಗುತ್ತದೆ. ಇದು ಇಲ್ಲಿನ ಜನರ ಕಾಯಂ ಕಷ್ಟವಾಗಿದೆ.

ಆಲಮಟ್ಟಿ ಜಲಾಶಯ ನಿರ್ಮಾಣವಾದರೆ ನಮ್ಮ ದನಕರುಗಳು ಸುಖವಾಗಿ ಇರುತ್ತವೆ ಎಂದು ನಮ್ಮ ಹಿರಿಯರು ಭೂಮಿ ಕೊಟ್ಟರು. ಆದರೆ ನಮಗೆ ನೀರಿಗಾಗಿ ಪರಿತಪಿಸುವುದು ಮಾತ್ರ ತಪ್ಪುತ್ತಿಲ್ಲ. ನದಿಯಲ್ಲಿ ಸಿಹಿ ನೀರು ಕುಡಿದು ರೂಢಿಯಾಗಿದ್ದ ನಮ್ಮ ದನಕರುಗಳಿಗೆ ಈಗ ಉಪ್ಪು ನೀರು ಕುಡಿಸಬೇಕಾಗಿದೆ. ಇದನ್ನು ನೋಡಿದರೆ ನಮ್ಮ ಹೊಟ್ಟೆಗೆ ಕಾರು ಸವರಿದ ಹಾಗೆ ಆಗುತ್ತದೆ. ನಮಗೆ ಯಾರೂ ದಿಕ್ಕಿಲ್ಲದಂತಾಗಿದೆ ಎಂದು ನದಿ ತೀರದ ರೈತ ಮಹಿಳೆಯರು ಕಣ್ಣೀರು ಹಾಕಿದರು.

ಕೃಷ್ಣಾ ನದಿಯಲ್ಲಿ ಯಾವಾಗ ನೀರು ಖಾಲಿಯಾಗುತ್ತದೆ ಯಾವ ಯಾವ ಗ್ರಾಮಗಳಲ್ಲಿ ನೀರಿಗಾಗಿ ಹಾಹಾಕಾರ ಉಂಟಾಗಬಹುದು? ಎಂಬ ಬಗ್ಗೆ ಅಧಿಕಾರಿಗಳು ಇದುವರೆಗೆ ಯಾವುದೇ ಪೂರ್ವಭಾವಿ ಸಭೆ ನಡೆಸಿಲ್ಲ. ಈ ಭೀಕರ ಪರಿಸ್ಥಿತಿಯ ಬಗ್ಗೆ ಸರ್ಕಾರಕ್ಕೂ ಯಾವುದೇ ಮಾಹಿತಿ ನೀಡಿಲ್ಲ. ಅಧಿಕಾರಿಗಳು ಒಮ್ಮೆಯೂ ನದಿ ಪಾತ್ರಕ್ಕೆ ಬಂದು ನಮ್ಮ ಕಷ್ಟ ಕೇಳುವ ಪುರುಸೊತ್ತು ಮಾಡಿಕೊಂಡಿಲ್ಲ ಎಂದು ಗ್ರಾಮಸ್ಥರು ದೂರಿದ್ದಾರೆ.