ಕಬ್ಬಿನ ಕಿಚ್ಚು ಪೂರ್ವನಿಯೋಜಿತ ಕೃತ್ಯವೇ?

ಪ್ರತಿಭಟನೆಯ ಕಾವು ವಿಕೋಪಕ್ಕೆ ತಿರುಗಿದಾಗ ಉದ್ರಿಕ್ತರ ಗುಂಪು ಇಂಥ ಹೀನಕೃತ್ಯ ಮಾಡಿರಬಹುದು ಎನ್ನಲು ಆಗಲ್ಲ. ಕಾರಣ ಪ್ರತಿಭಟನೆಯ ಮುಖಂಡತ್ವ ವಹಿಸಿದ್ದ ರೈತ ಮುಖಂಡರು ಇದು ರೈತರ ಮಾಡಿದ ಅವಘಡ ಅಲ್ಲ ಎಂದು ಸ್ಪಷ್ಟವಾಗಿ ಹೇಳಿದ್ದಾರೆ.

ಹೀಗಾಗಿ ಸಕ್ಕರೆ ಕಾರ್ಖಾನೆ ಆವರಣದಲ್ಲಿ ನಡೆದ ದುಷ್ಕೃತ್ಯದ ಹಿಂದೆ ಇರುವ ಕಿಡಿಗೇಡಿಗಳು ಯಾರು? ಇದೀಗ ಎಲ್ಲರನ್ನು ಕಾಡುತ್ತಿರುವ ಪ್ರಶ್ನೆ. ದೊಡ್ಡಮಟ್ಟದಲ್ಲಿ ಗಲಭೆ ಉಂಟುಮಾಡುವ ಉದ್ದೇಶದಿಂದಲೇ ಈ ಹೀನಕೃತ್ಯಕ್ಕೆ ಕಿಡಿಗೇಡಿಗಳು ಮುಂದಾಗಿದ್ದರು ಎನ್ನುವ ಅನುಮಾನ ಕಾಡತೊಡಗಿದೆ.

ಈ ಘಟನೆ ಆಕಸ್ಮಿಕ ಅಲ್ಲ, ಪೂರ್ವನಿಯೋಜಿತ ಕೃತ್ಯ ಎನ್ನುವುದಕ್ಕೆ ಕಬ್ಬು ತುಂಬಿದ ಟ್ರಾೃಕ್ಟರ್‌ಗಳಿಗೆ ಬೆಂಕಿ ಹಚ್ಚಲೆಂದೇ ಕಿಡಿಗೇಡಿಗಳು ಪೆಟ್ರೋಲ್ ಸಮೇತ ಬಂದಿದ್ದರು ಎನ್ನುವುದು ಪೊಲೀಸರು ಕೆದಕಿರುವ ಪ್ರಾಥಮಿಕ ಮಾಹಿತಿ. ಅಲ್ಲದೇ ಟ್ರಾೃಕ್ಟರ್ ವಾಹನಗಳ ಟೈಯರ್‌ಗಳಿಗೆ ಮೊಳೆ ಹೊಡೆದಿದ್ದಾರೆ. ಮಚ್ಚುಗಳಿಂದಲೂ ಟೈಯರ್‌ಗಳಿಗೆ ಹೊಡೆದಿದ್ದಾರೆ ಎಂದು ಕಾರ್ಖಾನೆಗೆ ಕಬ್ಬು ಸಾಗಿಸಿದ್ದ ರೈತರು ಸಚಿವ ಶಿವಾನಂದ ಪಾಟೀಲ ಹಾಗೂ ಆರ್.ಬಿ. ತಿಮ್ಮಾಪೂರ ಅವರ ಬಳಿ ಹೇಳಿಕೊಂಡಿದ್ದಾರೆ. ಹೀಗಾಗಿ ಕಬ್ಬಿನ ಕಿಚ್ಚಿನಲ್ಲಿ ಕಿಡಿಗೇಡಿಗಳು ತಮ್ಮ ದುಷ್ಟತನ ಮೆರೆದಿರುವುದು ಕಂಡು ಬರುತ್ತಿದೆ. ಈ ಘಟನೆಯನ್ನು ಯಾವುದೇ ಕಾರಣಕ್ಕೆ ಸುಮ್ಮನೆ ಬಿಡಬಾರದು. ಆರೋಪಿಗಳಿಗೆ ಶಿಕ್ಷೆ ಆಗಲೇಬೇಕು ಎಂದು ಇದೀಗ ಕಬ್ಬು ಬೆಳೆಗಾರರು ಒತ್ತಾಯವಾಗಿದೆ.

ಗುರುವಾರ ಕಾರ್ಖಾನೆಗೆ ಕಬ್ಬು ಕಳುಹಿಸಿದ್ದ ರೈತರಿಗೆ ರಾತ್ರಿ ನಡೆದ ಘಟನೆ ಆತಂಕಕ್ಕೆ ದೂಡಿದೆ. ಕಬ್ಬಿಗೆ ಬೆಂಕಿ ಹಚ್ಚಿದ್ದಾರೆಂದು ಖಂಡಿತ ಅವರು ರೈತರು ಆಗಿರಲು ಸಾಧ್ಯವಿಲ್ಲ. ಹೊಲದಲ್ಲಿ ಕಷ್ಟಪಟ್ಟು ಕೆಲಸ ಮಾಡಿ, ಸಾಲಸೂಲ ಮಾಡಿ ಕಬ್ಬು ಬೆಳೆದವರು ಆಗಿದ್ದರೆ ಇಂಥ ಕೆಲಸ ಮಾಡಲು ಮನಸ್ಸು ಬರುತ್ತಾ? ಇದನ್ನು ಮಾಡಿದವರು ದುಷ್ಕರ್ಮಿಗಳೇ ಸರಿ. ನಾನು 15 ಎಕರೆ ಕಬ್ಬು ಬೆಳೆದಿದ್ದೇನೆ. ಮೊದಲ ಟ್ರಿಪ್ ಲೋಡ್ ಮಾಡಿಕೊಂಡು ನಮ್ಮಣ್ಣ ಟ್ರಾೃಕ್ಟರ್ ತೆಗೆದುಕೊಂಡು ಬಂದಿದ್ದ. ನೋಡ ನೋಡುತ್ತಿದ್ದಂತೆ ಯಾರೋ ಕಲ್ಲು ತೂರಲು ಆರಂಭಿಸಿದ್ದರಿಂದ ಗಾಯಗೊಂಡಿದ್ದಾರೆ. ಸಹೋದರ ಸಿದ್ಧಾರೂಢ ಒಡೆಯರ ಈಗ ಆಸ್ಪತ್ರೆಯಲ್ಲಿ ಇದ್ದಾರೆ. ಸೈದಾಪುರದ ಸಮೀರವಾಡಿ ಸಕ್ಕರೆ ಕಾರ್ಖಾನೆ ಎಲ್ಲರೂ ಯಾವ ದರ ಕೊಡುತ್ತಾರೆಯೋ ನಾವು ಕೊಡುತ್ತೇವೆ ಎಂದು ಹೇಳಿದ್ದರಿಂದ ನಾವು ಕಬ್ಬು ಕಳಿಸಿದ್ದೇವೆ. ಆದರೆ, ಯಾರೋ ಬಂದು ಇದಕ್ಕೆ ಅಡೆತಡೆ ಮಾಡುತ್ತಾರೆ ಎಂದರೆ ಇದನ್ನು ರೈತರಾದವರು ಸಹಿಸಿಕೊಳ್ಳಬೇಕಾ? ಎಂದು ಮುನ್ಯಾಳ ಗ್ರಾಮದ ರೈತ ಸಿದ್ಧಾರೂಢ ಮೇತ್ರಿ ನೋವು ಹೊರಹಾಕಿದರು.

ದುರಂತದ ಬಗ್ಗೆ ಆಕ್ರೋಶ ಹೊರ ಹಾಕಿದ ರೈತ ಕೌಜಲಗಿ ಗ್ರಾಮದ ಸಿದ್ದಪ್ಪ ಬಿಸಗುಪ್ಪಿ, ಕಾರ್ಖಾನೆಯವರು ಮೊದಲ ಕಂತಿನಲ್ಲಿ 3,200 ರೂ. ಕೊಡುತ್ತೇವೆ ಎಂದಿದ್ದರು. ಬಳಿಕ 100 ರೂ. ಸರ್ಕಾರ ಮತ್ತು ಕಾರ್ಖಾನೆ ಸೇರಿ ಕೊಡುತ್ತೇವೆ ಎಂದಿದ್ದಕ್ಕೆ ನಾವು ಕಬ್ಬು ಕಳುಹಿಸಿದ್ದೇವೆ. ನಮ್ಮ ಕಷ್ಟ ನಮಗೆ. 2006 ರಿಂದ ಈ ಕಾರ್ಖಾನೆಗೆ ಕಬ್ಬು ಕಳುಹಿಸುತ್ತಾ ಬಂದಿದ್ದೇವೆ. ಪ್ರತಿ ವರ್ಷ 1000 ಟನ್ ಕಬ್ಬು ಕಳಿಸಿದ್ದೇವೆ. ನಮ್ಮ ಕಬ್ಬು ಸಾಗಿಸಲೆಂದು ಟ್ರಾೃಕ್ಟರ್ ಮತ್ತು ಕಬ್ಬಿನ ಗ್ಯಾಂಗ್ ತಂದಿದ್ದೇವೆ. ಇದಕ್ಕೆಲ್ಲ ಲಕ್ಷಾಂತರ ರೂ. ಖರ್ಚು ಮಾಡಿದ್ದೇವೆ. ಯಾರೋ ಬಂದು ಕ್ರಷಿಂಗ್‌ಗೆ ಅಡ್ಡಿ ಪಡಿಸುವುದು, ಇನ್ನಾೃರೋ ಬಂದೋ ಈ ರೀತಿ ಬೆಂಕಿ ಹಚ್ಚಿದರೆ ನಾವೆಲ್ಲಿಗೆ ಹೋಗಬೇಕು? ನಾವು ರೈತರೇ ಸರ್, ಕ್ರಷಿಂಗ್ ವಿಳಂಬವಾದಷ್ಟು ರೈತರಿಗೆ ಲಾಸ್ ಆಗುತ್ತದೆ ಅಲ್ಲವೆ? ನಿಗದಿತ ಅವಧಿಗೆ ಕ್ರಷಿಂಗ್ ಆಗದೇ ಇದ್ದರೆ ಇಳುವರಿ ಕಬ್ಬಿನ ಇಳುವರಿ ಕಡಿಮೆ ಆಗುತ್ತದೆ. ಸಕ್ಕರೆ ಪ್ರಮಾಣವೂ ಕುಂಟಿತವಾಗುತ್ತದೆ. ಸಮೀರವಾಡಿ ಸಕ್ಕರೆ ಕಾರ್ಖಾನೆಯವರು ನಮಗೆ ಹಿಂದಿನ ಬಾಕಿ ಕೊಟ್ಟಿದ್ದಾರೆ. ಘೋಷಿಸಿದ ಬೆಲೆಗಿಂತ ಒಮ್ಮೆಯೂ ಕಡಿಮೆ ಕೊಟ್ಟಿಲ್ಲ. ಅದಾಗ್ಯೂ ಇದೇ ಕಾರ್ಖಾನೆ ಮೇಲೆ ದಾಳಿ ನಡೆದಿದೆ ಎಂದರೆ ಇಲ್ಲಿ ಏನೋ ಕುತಂತ್ರ ಇರಲೇಬೇಕು. ಇದನ್ನು ಸುಮ್ಮನೆ ಬಿಡಬಾರದು. ಪೊಲೀಸರಿಗೆ ಗಾಯ ಮಾಡಿದ್ದಾರೆ. ಹೀಗಾಗಿ ತಪ್ಪಿತಸ್ಥರು ಯಾರೇ ಇದ್ದರೂ ಅಂತ ಕಿಡಿಗೇಡಿಗಳಿಗೆ ಶಿಕ್ಷೆ ಆಗಲೇಬೇಕು ಎನ್ನುವ ಬಿಸಗುಪ್ಪಿ ಅವರ ಆಗ್ರಹಕ್ಕೆ ಪಕ್ಕದಲ್ಲೆ ಇದ್ದ ಕಾನಟ್ಟಿ ಗ್ರಾಮದಿಂದ ಕಬ್ಬು ತಂದಿದ್ದ ರೈತ ಮಹಾಂತೇಶ ಪೂಜೇರಿ ಧ್ವನಿಗೂಡಿಸಿದರು.