ಇಂದು ತುಳಸಿಗೇರಿ ಮಾರುತೇಶ್ವರ ಓಕುಳಿ

ಹರಿಸೇವೆ ಪ್ರಸಾದಕ್ಕೆ ಬೇಕಾಗುವ ಎಂಟು-ಹತ್ತು ಕ್ವಿಂಟಾಲ್ ಕಡಲೆಬೇಳೆ ಹಿಟ್ಟಿನ ಕಡುಬುಗಳನ್ನು ಸಿದ್ಧಪಡಿಸಲು ಊರಿನ ನೂರಾರು ಮಹಿಳೆಯರು, ಪುರುಷರು ಸೇವೆ ಸಲ್ಲಿಸಿದರು. ಮುಂಜಾನೆ ಪ್ರಾರಂಭವಾದ ಕಡುಬು ತಯಾರಿಕೆ ಕೆಲಸ ಸಂಜೆಯವರೆಗೂ ಮುಂದುವರಿದಿತ್ತು. ನೂರಾರು ಸಂಖ್ಯೆಯಲ್ಲಿ ಊರಿನ ಹೆಂಗಳೆಯರು, ಹಿರಿಯರು, ಮಕ್ಕಳು ಕಡುಬಿನ ಹಿಟ್ಟನ್ನು ಲಟ್ಟಿಸಿಕೊಡುವಲ್ಲಿ ಪಾಲ್ಗೊಂಡಿದ್ದರೆ, ಊರಿನ ಗಂಡು ಮಕ್ಕಳು ಕಡುಬನ್ನು ಕರಿಯುವ ಕೆಲಸದಲ್ಲಿ ಪಾಲ್ಗೊಂಡಿದ್ದರು.

ಸಂಜೆ ಮಾರುತೇಶ್ವರನಿಗೆ, ಬೆಣ್ಣಪ್ಪ ದೇವರಿಗೆ ದೊಡ್ಡದಾದ ಐದು ಕಡುಬುಗಳ ನೈವೇದ್ಯ ಮಾಡಲಾಯಿತು. ಬಾಬುದಾರರಾದ ಐದು ಮನೆಗಳ ಗಂಡು ಮುತೈದೆಯರಿಗೆ ಗೌರವಾಚರಣೆಗಳು ನಡೆದು, ಸಾವಿರಾರು ಭಕ್ತರು ಕಡುಬಿನ ಪ್ರಸಾದ ಸವಿದರು.

ಸೋಮವಾರ ಸಂಜೆ ಮಾರುತೇಶ್ವರ ದೇವರ ಓಕುಳಿ ಸಂಭ್ರಮದಿಂದ ನಡೆಯಲಿದ್ದು, ದೇವಾಲಯದ ಆವರಣದಲ್ಲಿರುವ ಪುಟ್ಟದಾದ ಓಕುಳಿಯ ಹೊಂಡದಲ್ಲಿ ಸಾವಿರಾರು ಭಕ್ತರು ಜಿಗಿದು ಮೇಲೇಳುವ ಚೇತೋಹಾರಿ ದೃಶ್ಯಕ್ಕೆ ಓಕುಳಿ ಸಾಕ್ಷಿಯಾಗಲಿದೆ.