ಮಹಾಂತ ಶಿವಯೋಗಿಗಳ ರಥೋತ್ಸವ ಅದ್ದೂರಿ

ಶ್ರಾವಣ ಮಾಸದ ಕೊನೆಯ ಸೋಮವಾರ ವಿಜಯ ಮಹಾಂತ ಶಿವಯೋಗಿಗಳ ಕರ್ತೃ ಗದ್ದುಗೆಗೆ ಅಪಾರ ಸಂಖ್ಯೆಯಲ್ಲಿ ಆಗಮಿಸಿದ ಭಕ್ತರು ವಿಶೇಷ ದರ್ಶನ ಪಡೆದು ಪುನೀತರಾದರು.

ಸಚಿವ ವಿಜಯಾನಂದ ಕಾಶಪ್ಪನವರ ಕುಟುಂಬ ಹಾಗೂ ಮಾಜಿ ಶಾಸಕ ದೊಡ್ಡನಗೌಡ ಪಾಟೀಲ ಕುಟುಂಬಸ್ಥರು ಆಗಮಿಸಿ ಗದ್ದುಗೆಗೆ ವಿಶೇಷ ಪೂಜೆ ಸಲ್ಲಿಸಿದರು. ವಿವಿಧ ಬಗೆಯ ಪುಷ್ಪಗಳಿಂದ ಕಣ್ಮನ ಸೆಳೆಯುವಂತೆ ಅಲಂಕಾರಗೊಂಡಿದ್ದ ಮಹಾರಥೋತ್ಸವಕ್ಕೆ ಹೇರೂರು ಗ್ರಾಮದಿಂದ ಒಂದು ತೇರಿನ ಹಗ್ಗ ಹಾಗೂ ಕಿಲ್ಲಾ ಓಣಿಯಿಂದ ಮತ್ತೊಂದು ತೇರಿನ ಹಗ್ಗವನ್ನು ವಾದ್ಯ ಮೇಳದೊಂದಿಗೆ ತರಲಾಯಿತು. ವಿಶ್ವಗುರು ಬಸವಣ್ಣ ಹಾಗೂ ವಿಜಯ ಮಹಾಂತ ಶಿವಯೋಗಿಗಳಿಗೆ ಲಕ್ಷಾಂತರ ಭಕ್ತರು ಜಯಘೋಷಗಳನ್ನು ಕೂಗುತ್ತಾ ಮಹಾರಥವನ್ನು ಭಕ್ತಿಪೂರ್ವಕವಾಗಿ ಎಳೆದು ಸಂಭ್ರಮಿಸಿದರು. ಉತ್ಸವದ ಹಿನ್ನೆಲೆಯಲ್ಲಿ ನಗರದಲ್ಲಿ ಬಿಗಿ ಪೊಲೀಸ್ ಬಂದೋಬಸ್ತ್ ವ್ಯವಸ್ಥೆಯನ್ನು ನಿಯೋಜಿಸಲಾಗಿತ್ತು

ಡಾ. ಗುರುಮಹಾಂತ ಶ್ರೀಗಳು, ಬಾಗಲಕೋಟೆ ಇಮ್ಮುಡಿ ಸಿದ್ಧರಾಮೇಶ್ವರ ಸ್ವಾಮೀಜಿ, ಲಿಂಗಸಗೂರು ಚಿತ್ತರಗಿ ವಿಜಯ ಮಹಾಂತೇಶ ಶಾಖಾಮಠದ ಸಿದ್ಧಲಿಂಗ ಮಹಾಸ್ವಾಮೀಜಿ, ಪಾಂಡೋಮಟ್ಟಿ ವಿರಕ್ತಮಠದ ಗುರುಬಸವ ಮಹಾಸ್ವಾಮೀಜಿ, ಬೆಳ್ಳೇರಿ ಬಸವಾನಂದ ಮಹಾಸ್ವಾಮೀಜಿ, ಹರನಾಳ ಬ್ರಹನ್ಮಠದ ಸಂಗನಬಸವ ಮಹಾಸ್ವಾಮೀಜಿ ಇತರರಿದ್ದರು.