ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (ಎಸ್‌ಐಆರ್) ಗಣತಿ ನಮೂನೆ ವಿತರಣೆ ಮತ್ತು ಭರ್ತಿ ಮಾಡುವ ವಿಚಾರವಾಗಿ ಬಿಎಲ್‌ಒಗಳ ಮೇಲೆ ಸಾಕಷ್ಟು ದೂರುಗಳು ಅಲ್ಲಲ್ಲಿ ಕೇಳಿ ಬರುತ್ತಿವೆ. ಜಿಲ್ಲೆಯ ಬಾದಾಮಿ ತಾಲೂಕಿನ ಅನಂತಗಿರಿ ಗ್ರಾಮದಲ್ಲಿ ನೆಟ್‌ವರ್ಕ್ ಸಮಸ್ಯೆ ಹಾಗೂ ಗ್ರಾಮದಲ್ಲಿ ಬಹುತೇಕರು ಗುಳೆ ಹೋಗಿರುವುದು ಎಸ್‌ಐಆರ್ ಪ್ರಕ್ರಿಯೆಗೆ ಸಮಸ್ಯೆಯಾಗುತ್ತಿದೆ.

ಅನಂತಗಿರಿ ಗ್ರಾಮ ಗುಡ್ಡದ ಮೇಲಿದೆ. ರಸ್ತೆಯಿಂದ ಅಂದಾಜು 2 ಕಿ.ಮೀ. ಕಲ್ಲಿನ ಪರಸೆ ರಸ್ತೆ ಮೂಲಕ ಗ್ರಾಮಕ್ಕೆ ತೆರಳಬೇಕು. ಅಲ್ಲಿ ನೆಟ್‌ವರ್ಕ್ ಸಮಸ್ಯೆ ತೀವ್ರವಾಗಿದೆ. ಗುಡ್ಡದ ಮೇಲೆ ಇರುವುದರಿಂದ ನೆಟ್‌ವರ್ಕ್ ಎಲ್ಲಿ ಸಿಗುತ್ತದೆ ಎಂದು ಎತ್ತರದ ಪ್ರದೇಶಕ್ಕೆ ಹೋಗುವ ಪ್ರಸಂಗವೂ ಇಲ್ಲವಾಗಿದೆ. ಹೀಗಾಗಿ ಕಳೆದ ಹತ್ತು ದಿನಗಳಲ್ಲಿ ಅಲ್ಲಿ -ರ‍್ಮ್ ವಿತರಿಸಿದ್ದಾಗಿದೆ ವಿನಃ ಅದಕ್ಕೆ ತಕ್ಕಂತೆ ನಮೂನೆ ಭರ್ತಿಮಾಡಿ, ಅವುಗಳನ್ನು ಅಪ್‌ಲೋಡ್ ಮಾಡುವುದು ನಿರೀಕ್ಷಿತ ಮಟ್ಟದಲ್ಲಿ ಆಗಿಲ್ಲ.

ಅಂದಾಜು 190 ಕುಟುಂಬಗಳು ಇರುವ ಈ ಗುಡ್ಡದ ಮೇಲಿನ ಊರಿನಲ್ಲಿ 667 ಮತದಾರರು ಇದ್ದಾರೆ. ಎಸ್ಸಿ, ಎಸ್ಟಿ ಸಮುದಾಯದವರು ಹೆಚ್ಚಿರುವ ಹಿರಿಯರು, ಮಕ್ಕಳು ಹೊರತುಪಡಿಸಿದರೆ ಶೇ. 50ರಷ್ಟು ಜನರು ದುಡಿಯಲು ದೂರದೂರುಗಳಿಗೆ ಗುಳೆ ಹೋಗಿರುತ್ತಾರೆ.

ಸದ್ಯ ಅಲ್ಲಿ ಜೂನ್ 29ರಿಂದ ಎಸ್‌ಐಆರ್ ಪ್ರಕ್ರಿಯೆ ಆರಂಭವಾಗಿದ್ದು, ಗ್ರಾಮದ ಸರ್ಕಾರಿ ಶಾಲೆಯ ಶಿಕ್ಷಕರೊಬ್ಬರನ್ನು ಬಿಎಲ್‌ಒ ಎಂದು ನೇಮಕ ಮಾಡಲಾಗಿದೆ. ಸದ್ಯ ಅಲ್ಲಿನ 640 ಮತದಾರರಿಗೆ ನಮೂನೆಗಳನ್ನು ವಿತರಿಸಲಾಗಿದೆ. ಗುಳೆ ಹೋಗಿರುವ ಮತದಾರರ ಸಂಬಂಧಿಕರಿಗೆ ನಮೂನೆಗಳನ್ನು ತಲುಪಿಸಿದ್ದಾರೆ.

ಗ್ರಾಮದಲ್ಲಿ ಬಹುತೇಕರು ಅನಕ್ಷರಸ್ಥರಾಗಿದ್ದರಿಂದ ಬಿಎಲ್‌ಒ ಅವರೇ ಜನರಿಂದ ಮಾಹಿತಿ ಪಡೆದು ನಮೂನೆ ಭರ್ತಿ ಮಾಡಬೇಕು. ಭರ್ತಿ ಮಾಡಿದ ನಮೂನೆಗಳನ್ನು ಅಪ್‌ಲೋಡ್ ಮಾಡಬೇಕೆಂದರೆ ನೆಟ್‌ವರ್ಕ್ ಸಮಸ್ಯೆ ಆಗುತ್ತಿದೆ. ಇನ್ನು ಗುಳೆ ಹೋದವರು ತಮ್ಮ ಜೊತೆಗೆ ಆಧಾರ ಕಾರ್ಡ್ಗಳನ್ನು ಸಹ ತೆಗೆದುಕೊಂಡು ಹೋಗಿರುತ್ತಾರೆ. ಸಂಬಂಧಿಕರು ಮಾಹಿತಿ ನೀಡಿದರೂ ಅವರ ಹೊಸದಾಗಿನ ಭಾವಚಿತ್ರ ಸಿಗುತ್ತಿಲ್ಲ. ಅಲ್ಲದೇ ಗುಳೆ ಸಮಸ್ಯೆ ಇರುವುದರಿಂದ 2002ರ ನಂತರದಲ್ಲಿ ಮತದಾರರ ಪಟ್ಟಿ ಸೇರಿರುವವರ ಮಾಹಿತಿ ಸಂಗ್ರಹಿಸಬೇಕಾಗಿದೆ.

ಸದ್ಯ ಅನಂತಗಿರಿ ಗ್ರಾಮದಲ್ಲಿ ಕಳೆದ ಹತ್ತು ದಿನಗಳಲ್ಲಿ 31 ನಮೂನೆಗಳನ್ನು ಮಾತ್ರ ಡಿಜಿಟಲೀಕರಿಸಲಾಗಿದೆ. ಇದೇ ರೀತಿ ಆದರೆ ಚುನಾವಣಾ ಆಯೋಗ ನಿಗದಿ ಪಡಿಸಿದ ಅವಽಯಲ್ಲಿ ಅಲ್ಲಿನ 667 ಮತದಾರರ ನಮೂನೆಗಳನ್ನು ಭರ್ತಿ ಮಾಡಿ, ಡಿಜಿಟಲೀಕರಿಸುವುದು ಸಾಧ್ಯವಾಗಲಿಕ್ಕಿಲ್ಲ ಎಂದು ಹೇಳಲಾಗುತ್ತಿದೆ. ಇದರಿಂದ ಅರ್ಹ ಮತದಾರರು ಮತಪಟ್ಟಿಯಿಂದ ಹೊರಗುಳಿಯುವ ಆತಂಕವೂ ಎದುರಾಗಿದೆ.

ಅನಂತಗಿರಿ ಗ್ರಾಮದಲ್ಲಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಇದ್ದು, 115 ವಿದ್ಯಾರ್ಥಿಗಳು ಓದುತ್ತಿದ್ದಾರೆ. ಐವರು ಶಿಕ್ಷಕರು ಸೇವೆ ಸಲ್ಲಿಸುತ್ತಿದ್ದಾರೆ. ಶಿಕ್ಷಕರು ಬೆಳಗ್ಗೆ ಚೆಕ್ ಇನ್ ಮತ್ತು ಸಂಜೆ ಚೆಕ್ ಔಟ್ ಕಾಮ್ಸ್ ಆಪ್‌ನಲ್ಲಿ ನಮೂದಿಸಬೇಕು. ಹಾಗೆಯೇ ವಿದ್ಯಾರ್ಥಿಗಳ ಹಾಜರಾತಿಯ ನಿರಂತರ ಆಪ್‌ನಲ್ಲಿ ಅಪ್‌ಲೋಡ್ ಮಾಡಲು ನಿತ್ಯ ಪರದಾಡುವ ಸ್ಥಿತಿ ಇದೆ. ನೆಟ್‌ವರ್ಕ್ ಸಿಕ್ಕರೆ ಸಿಕ್ಕಿತು, ಇಲ್ಲವಾದರೆ ಇಲ್ಲ ಎನ್ನುವ ಸ್ಥಿತಿ ಇದೆ ಎಂದು ಅಲ್ಲಿನ ಶಿಕ್ಷಕರು ಹೇಳುತ್ತಾರೆ.

"

ಬಾಗಲಕೋಟೆ ಜಿಲ್ಲೆಯಲ್ಲಿ ನಿಗದಿತ ಅವಧಿಯಲ್ಲಿ ಎಸ್‌ಐಆರ್‌ನ ಗಣತಿ ನಮೂನೆ ವಿತರಣೆ, ಭರ್ತಿ ಮಾಡುವುದು, ಡಿಜಿಟಲೀಕರಿಸುವುದು ಸುಗಮವಾಗಿ ಮುಗಿಸಲಾಗುವುದು. ಅನಂತಗಿರಿ ಗ್ರಾಮದಲ್ಲೂ ಸಹ ಯಾವೊಬ್ಬ ಅರ್ಹ ಮತದಾರರು ಮತಪಟ್ಟಿಯಿಂದ ಹೊರಗುಳಿಯದಂತೆ ನೋಡಿಕೊಳ್ಳಲಾಗುವುದು. ಯಾವುದೇ ಪ್ರದೇಶದಲ್ಲಿ ನೆಟ್ ವರ್ಕ್ ಸಮಸ್ಯೆ ಇದ್ದರೆ ಬಿಎಲ್‌ಒ ಅವರು ಮಾಹಿತಿ ಸಂಗ್ರಹಿಸಿ ನಮೂನೆಗಳನ್ನು ಸರ್ಕಾರಿ ಕಚೇರಿಗಳಿಗೆ ಬಂದು ಅಪ್‌ಲೋಡ್ ಮಾಡುತ್ತಿದ್ದಾರೆ.

— | ಸಂಗಪ್ಪ, ಜಿಲ್ಲಾ ಚುನಾವಣಾಧಿಕಾರಿ, ಬಾಗಲಕೋಟೆ