ಕಂಪ್ಯೂಟರ್ ಉತಾರ ನೀಡಲು ಒತ್ತಾಯಿಸಿ ಪ್ರತಿಭಟನೆ

ಪುರಸಭೆ ಮಾಜಿ ಅಧ್ಯಕ್ಷ ಹನಮಂತ ರೋಡನ್ನವರ ಮಾತನಾಡಿ, ಗುಡ್ಡದ ಪ್ರದೇಶದಲ್ಲಿ ವಾಸಿಸುತ್ತಿರುವ ನಿವಾಸಿಗಳಿಗಾಗಿ ಅಂದಿನ ಮುಖ್ಯಮಂತ್ರಿ ದಿ. ದೇವರಾಜ ಅರಸು 50 ಎಕರೆ ಭೂಮಿಯನ್ನು ನೀಡಿದ್ದಾರೆ. ಆದರೆ ಅದನ್ನು ಇದುವರೆಗೆ ಗುರುತಿಸುವ ಕೆಲಸ ಆಗಿಲ್ಲ. ದೇವರಾಜ ನಗರದಲ್ಲಿ ಪುರಸಭೆ ಆರು ವಾರ್ಡ್‌ಗಳಿವೆ. ಆಸ್ತಿ ತೆರಿಗೆ ಪಾವತಿಸುತ್ತಾರೆ. ಆದರೆ ಅಲ್ಲಿನ ನಿವಾಸಿಗಳ ಆಸ್ತಿ ಉತಾರಗಳನ್ನು ಇ-ಉತಾರ ಮಾಡುತ್ತಿಲ್ಲ. ಆದರೆ ಮಹಾವೀರ ವೃತ್ತದಲ್ಲಿನ ಸಾಕಷ್ಟು ಸಮಸ್ಯೆ ಹಾಗೂ ಗೊಂದಲ ಇರುವ 6 ಗುಂಟೆ ಜಾಗದ ಉತಾರವನ್ನು ಪುರಸಭೆ ಅಧಿಕಾರಿಗಳು ಕಂಪ್ಯೂಟರ್ ಉತಾರ ಮಾಡಿ ನೀಡಿದ್ದಾರೆ. ಇದೆಂಥಾ ನ್ಯಾಯ. ನಮ್ಮ ಆಸ್ತಿಗಳನ್ನು ಇ-ಉತಾರ ಮಾಡಿಕೊಡಿ ಎಂದು ಆಗ್ರಹಿಸಿದರು.

ಶಾಸಕ ಸಿದ್ದು ಸವದಿ ಮಾತನಾಡಿ, ಈ ಹಿಂದೆ 2012-13ನೇ ಸಾಲಿನಲ್ಲಿಯೇ ದೇವರಾಜ ನಗರದ ನಿವಾಸಿಗಳಿಗೆ ಹಕ್ಕು ಪತ್ರ ಒದಗಿಸಿ ಶಾಶ್ವತ ಪರಿಹಾರ ಒದಗಿಸಲು ಮುಂದಾದೆ. ಆದರೆ, ಅದಕ್ಕೆ ತಕರಾರು ಮಾಡಿದ್ದರಿಂದ ಅಲ್ಲಿಗೆ ನಿಂತಿತು. ಈಗಲೂ ನಿಮ್ಮ ಬೇಡಿಕೆ ಕುರಿತು ಸರ್ಕಾರ ಮಟ್ಟದಲ್ಲಿ ಚರ್ಚಿಸಲಾಗುವುದು. ಕಂದಾಯ ಸಚಿವರಿಗೆ ಸಮಸ್ಯೆ ಕುರಿತು ಮನವರಿಕೆ ಮಾಡಿಕೊಡುವ ಭರವಸೆ ನೀಡಿದರು.

ಸಮಸ್ಯೆ ಇರುವ 6 ಗುಂಟೆ ಜಾಗದ ಕಂಪ್ಯೂಟರ್ ಉತಾರ ಮಾಡಬೇಡಿ ಎಂದು ಸಾಕಷ್ಟು ಹೇಳಿದರು ಇ-ಉತಾರ ಮಾಡಿದ್ದೀರಿ. ಮೊದಲು ಅದನ್ನು ರದ್ದುಗೊಳಿಸಿ ಎಂದು ಮುಖ್ಯಾಧಿಕಾರಿ ರ್ಇಾನ್ ಝಾರೆ ಅವರಿಗೆ ಶಾಸಕ ಸಿದ್ದು ಸವದಿ ಹೇಳಿದರು. ನಿಮಗೆ ಮನಬಂದತೆ ವರ್ತಿಸುತ್ತಿದ್ದೀರಿ. ನೀವು ಮಾಡಿದ ತಪ್ಪಿನಿಂದ ಇಂದು ಇವರು ಧರಣಿ ಮಾಡುವಂತಾಗಿದೆ ಎಂದು ಅಧಿಕಾರಿಗೆ ಚಾಟಿ ಬೀಸಿದರು.

ಪುರಸಭೆ ಮಾಜಿ ಸದಸ್ಯ ಪ್ರಭು ಗಸ್ತಿ, ದೇವರಾಜ ನಗರ ಹಿತರಕ್ಷಣಾ ಸಮಿತಿ ಅಧ್ಯಕ್ಷ ಸುನೀಲ ತುಬಚಿ ಹಾಗೂ ಪದಾಧಿಕಾರಿಗಳು ಧರಣಿಯಲ್ಲಿ ಪಾಲ್ಗೊಂಡಿದ್ದರು.