ಮಕ್ಕಳನ್ನು ಸರ್ಕಾರಿ ಶಾಲೆಗೆ ದಾಖಲಿಸಿ ಸಹಕರಿಸಿ

ಕೂಡಲಸಂಗಮ ಕರ್ನಾಟಕ ಪಬ್ಲಿಕ್ ಶಾಲೆಯಲ್ಲಿ ಸೋಮವಾರ ಶಾಲಾ ಪ್ರಾರಂಭೋತ್ಸವ, ಶಾಲಾ ದಾಖಲಾತಿ ಆಂದೋಲನಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ಶಿಕ್ಷಕರ ನಿರಂತರ ಪರಿಶ್ರಮದ ಲವಾಗಿ ಸರ್ಕಾರಿ ಪ್ರೌಢ ಶಾಲೆಯ ದಾಖಲಾತಿ ವರ್ಷದಿಂದ ವರ್ಷಕ್ಕೆ ಅಧಿಕಗೊಂಡು ಇಂದು ಕರ್ನಾಟಕ ಪಬ್ಲಿಕ್ ಶಾಲೆಯಾಗಿ ಮಾರ್ಪಟ್ಟಿದೆ. ಕಳೆದ ವರ್ಷ ಈ ಶಾಲೆಯಲ್ಲಿ 609 ವಿದ್ಯಾರ್ಥಿಗಳು ದಾಖಲಾಗಿದ್ದರು. ಶಾಲಾ ಆರಂಭದ ದಿನವೇ 100 ವಿದ್ಯಾರ್ಥಿಗಳು ಪ್ರವೇಶ ಪಡೆದಿರುವುದು ಗುಣಮಟ್ಟಕ್ಕೆ ಹಿಡಿದ ಕೈಗಕನ್ನಡಿಯಾಗಿದೆ ಎಂದರು.

ಈ ವರ್ಷ ಎಲ್‌ಕೆಜಿ, ಯುಕೆಜಿ ಆರಂಭ ಮಾಡಲಾಡಿದೆ. ಮುಂದಿನ ವರ್ಷ ಉಳಿದ ತರಗತಿಗಳು ಆಂಗ್ಲ, ಕನ್ನಡ ಮಾಧ್ಯಮಗಳಲ್ಲಿ ಆರಂಭವಾಗುವುದು. ಇದರ ಸದುಪಯೋಗವನ್ನು ವಿದ್ಯಾರ್ಥಿಗಳು ಪಡೆಯಬೇಕು. ಉತ್ತಮ ಶಿಕ್ಷಕರು ಸರ್ಕಾರಿ ಶಾಲೆಯಲ್ಲಿ ಇದ್ದಾರೆ, ಪಾಲಕರು ತಮ್ಮ ಮಕ್ಕಳನ್ನು ಸರ್ಕಾರಿ ಶಾಲೆಗೆ ದಾಖಲಿಸಬೇಕು ಎಂದರು.

ಎಸ್‌ಡಿಎಂಸಿ ಅಧ್ಯಕ್ಷ ಮುತ್ತಣ್ಣ ಕುರಿ ಮಾತನಾಡಿ, ಸರ್ಕಾರ ನಮ್ಮ ಪ್ರೌಢ ಶಾಲೆಯನ್ನು ಕರ್ನಾಟಕ ಪಬ್ಲಿಕ್ ಶಾಲೆಯಾಗಿ ಪರಿವರ್ತಿಸಿದ್ದು, ಇದರ ಸದುಪಯೋಗವನ್ನು ಪಾಲಕರು ಪಡೆಯಬೇಕು ಎಂದು ತಿಳಿಸಿದರು.

ಕೂಡಲಸಂಗಮ ಕರ್ನಾಟಕ ಪಬ್ಲಿಕ್ ಶಾಲೆ ಮುಖ್ಯಗುರು ಮಾತೆ ಎಸ್.ಬಿ.ಈಟಿ ಅಧ್ಯಕ್ಷತೆ ವಹಿಸಿದ್ದರು. ಕ್ಷೇತ್ರ ಸಮನ್ವಯಾಧಿಕಾರಿ ಸದಾಶಿವ ಗುಡಗುಂಟಿ, ಬಿಆರ್‌ಪಿ ವಿನೋದಕುಮಾರ ಭೋವಿ, ಶಿಕ್ಷಣ ಸಂಯೋಜಕ ಎಂ.ಎಚ್.ಮೂಲಿಮನಿ, ಸಿಆರ್‌ಪಿ ಜಿ.ಎಚ್.ಗೌಡರ, ಮುಖಂಡ ಪ್ರಭು ಹಿರೇಮಠ, ಶೇಖರಗೌಡ ಗೌಡರ, ಲಕ್ಷ್ಮೀಕಾಂತ ಮೇಲಿನಮನಿ, ಮುತ್ತಪ್ಪ ಭಜಂತ್ರಿ, ಸಂಗಣ್ಣ ಬಾಗೇವಾಡಿ, ಕರಸಂಗಯ್ಯ ಖಾತೇದಾರ, ಎಸ್‌ಡಿಎಂಸಿ ಸದಸ್ಯರು ಇದ್ದರು. ಆರ್.ಎ.ತಂಬಾಕ ಪ್ರಾರ್ಥಿಸಿದರು, ಡಿ.ಬಿ.ನದಾಪ ಸ್ವಾಗತಿಸಿದರು. ಎಸ್.ಎಲ್.ಪಾಟೀಲ ನಿರೂಪಿಸಿ, ವಂದಿಸಿದರು.

ಸಮಾರಂಭದಲ್ಲಿ ನಿವೃತ್ತಿ ಹೊಂದಿದ ಹಿಂದಿ ಭಾಷಾ ಶಿಕ್ಷಕ ಎಸ್.ಎಸ್.ಕಟ್ಟಿಮನಿ, ವರ್ಗಾವಣೆಗೊಂಡು ಬಂದ ಶಿಕ್ಷಕಿ ಎಂ.ಎಸ್.ಕೋಟಿ, ಸಂಗೀತ ಶಿಕ್ಷಕ ಬಸವರಾಜ ಗುಡಿಮನಿ, ಎಸ್ಸೆಸ್ಸೆಲ್ಸಿ ಪರೀಕ್ಷೆಯಲ್ಲಿ ಪ್ರಥಮ ಸ್ಥಾನ ಪಡೆದ ನಾಗರಾಜ ಕುಂಬಾರ, ದ್ವಿತೀಯ ಸ್ಥಾನ ಪಡೆದ ಅರ್ಪಿತಾ ಕಬ್ಬಲಗೇರಿ, ಸಂಗಮೇಶ ಕುಂಬಾರ, ತೃತೀಯ ಸ್ಥಾನ ಪಡೆದ ಕಾರ್ತಿಕ ಹೋಕ್ರಾಣಿ ಅವರಿಗೆ ಸನ್ಮಾನಿಸಿದರು.

ಎತ್ತಿನ ಬಂಡಿ, ಟ್ರಾಕ್ಟರನಲ್ಲಿ ವಿದ್ಯಾರ್ಥಿಗಳು, ಅಧಿಕಾರಿಗಳು, ಶಿಕ್ಷಣ ಪ್ರೇಮಿಗಳು, ಶಿಕ್ಷಕರನ್ನು ಮೆರವಣಿಗೆಯ ಮೂಲಕ ಗ್ರಾಮದ ವಿವಿಧ ರಸ್ತೆಯಲ್ಲಿ ದಾಖಲಾತಿ ಆಂದೋಲನ ಮಾಡಿದರು. ಡೊಳ್ಳು ಕುಣಿತ, ಕರಡಿ ಮಜಲು, ಶಹನಾಯಿ ಮೆರಗು ಕೊಟ್ಟಿತು. ಶಾಲಾ ಆರಂಭದ ದಿನ ಎಲ್ಲ ವಿದ್ಯಾರ್ಥಿಗಳು ಹೋಳಿಗೆ, ಅನ್ನಸಾಂಬರ ಸವಿದು ಸಂಭ್ರಮಿಸಿದರು. ಪಠ್ಯಪುಸ್ತಕ ವಿತರಿಸಲಾಯಿತು. ಶಾಲೆಯ ಆವರಣ ತಳಿರು ತೋರಣಗಳಿಂದ ಶೃಂಗಾರಗೊಂಡಿತ್ತು.