ಭಕ್ತರ ಸೇವೆಯೇ ಆದ್ಯತೆ ಆಗಿರಲಿ

ನಗರದ ಟೀಕಿನಮಠದ ಮಲ್ಲಿಕಾರ್ಜುನ ದೇಶಿಕರ ನಿರಂಜನ ಚರಪಟ್ಟಾಧಿಕಾರ ಮಹೋತ್ಸವ ನಿಮಿತ್ಯ ಚರಂತಿಮಠದ ಆವರಣದಲ್ಲಿ ಶನಿವಾರ ರಾತ್ರಿ ನಡೆದ ‘ಸಂಸ್ಕೃತಿ ಚಿಂತನ’ ಸಮಾರಂಭದ ಸಾನ್ನಿಧ್ಯ ವಹಿಸಿ ಅವರು ಮಾತನಾಡಿದರು.

ಆಧುನಿಕ ಸಮಾಜದಲ್ಲಿ ಪ್ರಶ್ನೆಮಾಡುವ ಕಾಲದಲ್ಲಿ ಭಕ್ತರ ಸೇವೆಯೇ ನಮ್ಮ ಆದ್ಯತೆಯಾಗಲಿ. ಟೀಕಿನಮಠ ನೂತನ ಶ್ರೀಗಳಾದ ಮಲ್ಲಿಕಾರ್ಜುನ ದೇಶಿಕರ್ ಸ್ವಾಮಿಗಳಿಗೆ ಬಾಗಲಕೋಟೆ ಜನರೆ ತಂದೆ ತಾಯಿಗಳು, ಸಮಾಜ ಸೇವೆ ಹಾಗೂ ಭಕ್ತರ ಸೇವೆಯೇ ಅವರ ಆದ್ಯತೆಯಾಗಿದ್ದು, ಟೀಕಿನಮಠದ ಗುರುಪರಂಪರೆಯಲ್ಲಿ ಅವರ ಸಾಧನೆ ಸಾಗಲಿ ಎಂದರು.

ಸಂಸದ ಪಿ.ಸಿ. ಗದ್ದಿಗೌಡರ ಮಾತನಾಡಿ, ಬಾಗಲಕೋಟೆ ಶೈಕ್ಷಣಿಕ. ಔದ್ಯೋಗಿಕ. ಧಾರ್ಮಿಕ, ಸಾಂಸ್ಕೃತಿಕವಾಗಿ ಶ್ರೀಮಂತವಾಗಲು ಟೀಕಿನಮಠದ ಕೊಡುಗೆ ಅಪಾರ. ಸಂಸ್ಕಾರ ಸಂಸ್ಕೃತಿ, ಮಾನವಿಯ ಮೌಲ್ಯಗಳ ಅರಿವು ಬಹಳ ಮುಖ್ಯ. ಸ್ವಾರ್ಥದ ಬದುಕಿಗಿಂತ ಆತ್ಮತೃಪ್ತಿಯ ಶ್ರಮದ ಬದುಕಿನ ಅಗತ್ಯತೆ ಇದೆ ಎಂದರು.

ಜಮಖಂಡಿ ಶಾಸಕ ಜಗದೀಶ ಗುಡುಗುಂಟಿ ಮಾತನಾಡಿ, ಮಾನವನನ್ನು ದೇವನಾಗಿ ಮಾಡುವ ಧರ್ಮ ಅದು ವೀರಶೈವ ಧರ್ಮ. ಎಲ್ಲರನ್ನು ಜೊತೆಗೂಡಿ ಊಟಮಾಡುವ ಸಂಸ್ಕೃತಿ ನಮ್ಮದು. ವೀರಶೈವ ಲಿಂಗಾಯತ ಸಮಾಜದ ಸಂಸ್ಕೃತಿ ಸಂಸ್ಕಾರ ಉಳಿದು ಬೆಳೆಯಬೇಕು ಎಂದರು.

ಜಿಪಂ ಸಿಇಒ ಶಶಿಧರ ಕುರೇರ ಮಾತನಾಡಿ, ಸಂಸ್ಕೃತಿ ಎಂದರೆ ಆಡಂಬರದ ಜೀವನವಲ್ಲ, ಮಾನವೀಯ ಮೌಲ್ಯಗಳನ್ನು ಮತ್ತು ಧನಾತ್ಮಕ ಚಿಂತನೆಗಳನ್ನು ಬೆಳಸಿಕೊಳ್ಳುವುದಾಗಿದೆ. ಶಿಕ್ಷಣದಿಂದ ಜ್ಞಾನಿಯಾಗುತ್ತಿದ್ದೇವೆ. ಆದರೆ ಸಂಸ್ಕೃತಿ ಕಡಿಮೆಯಾಗುತ್ತಿದೆ. ಹುಟ್ಟಿನಿಂದಲೇ ಮಕ್ಕಳಲ್ಲಿ ಸಂಸ್ಕತಿಯ ಕಲಿಕೆ ಮುಖ್ಯವಾಗಿದ್ದು, ಶಿಕ್ಷಣದ ಜೊತೆಗೆ ಸಂಸ್ಕೃತಿಯನ್ನು ಮಕ್ಕಳಲ್ಲಿ ಬೆಳೆಸುವ ಕಾರ್ಯವನ್ನು ಪಾಲಕರು ಮತ್ತು ಗುರುಗಳು ಮಾಡಬೇಕು ಎಂದರು.

ಬೆಳಗಾವಿ ವಿಶ್ರಾಂತ ಪ್ರಾಧ್ಯಾಪಕ ಡಾ.ಗುರುದೇವಿ ಹುಲೆಪ್ಪನವರಮಠ, ಸಾಹಿತಿ ಸುನಂದಾ ಎಮ್ಮಿ, ಅಪರ ಜಿಲ್ಲಾಧಿಕಾರಿ ಅಶೋಕ ತೇಲಿ, ಬಿವಿವಿ ಸಂಘದ ಮೇಡಿಕಲ್ ಕಾಲೇಜು ಆಡಳಿತ ಮಂಡಳಿ ಕಾರ್ಯಾಧ್ಯಕ್ಷ ಅಶೋಕ ಸಜ್ಜನ ಮಾತನಾಡಿದರು. ಹುಬ್ಬಳ್ಳಿಯ ಎರಡೆತ್ತಿನಮಠದ ಸಿದ್ಧಲಿಂಗ ಮಹಾಸ್ವಾಮಿಗಳು, ಹುಬ್ಬಳ್ಳಿಯ ರುದ್ರಾಕ್ಷಿಮಠದ ಬಸವಲಿಂಗ ಮಹಾಸ್ವಾಮಿಗಳು, ಶೇಗುಣಸಿಯ ವಿರಕ್ತಮಠದ ಡಾ.ಮಹಾಂತಪ್ರಭು ಮಹಾಸ್ವಾಮಿಗಳು, ಬಸವನ ಬಾಗೇವಾಡಿಯ ವಿರಕ್ತಮಠದ ಸಿದ್ಧಲಿಂಗ ಮಹಾಸ್ವಾಮಿಗಳು, ಬೀಳಗಿ-ಹಲಗಲಿ ಕಲ್ಮಠದ ಗುರುಪಾದ ಶಿವಾಚಾರ್ಯ ಸ್ವಾಮಿಗಳು, ಕುಂದರಗಿಯ ಚರಂತಿಮಠದ ವೀರಸಂಗಮೇಶ್ವರ ಶಿವಾಚಾರ್ಯ ಸ್ವಾಮಿಗಳು, ಬಿವಿವಿ ಸಂಘದ ಕಾರ್ಯಾಧ್ಯಕ್ಷ ವೀರಣ್ಣ ಚರಂತಿಮಠ, ಗೌರವ ಕಾರ್ಯದರ್ಶಿ ಮಹೇಶ ಅಥಣಿ, ಪರಮೇಶ್ವರ ಮೂದೂರ, ವಿಶ್ವಾನಾಥ ಕಳಸ, ಪ್ರಶಾಂತ ಉಗರಗೋಳ ಮತ್ತಿತರರು ಇದ್ದರು.