ಅಧಿಕಾರಿಗಳು ಮಾತು ಕೇಳುತ್ತಿಲ್ಲ ಎನ್ನುವುದು ಸುಳ್ಳು

ನಗರದಲ್ಲಿ ಶನಿವಾರ ಸುದ್ದಿಗಾರರ ಜೊತೆ ಮಾತನಾಡುವ ವೇಳೆ ಎದುರಾದ ಪ್ರಶ್ನೆಗೆ ಉತ್ತರಿಸಿದ ಅವರು, ಫೈಲ್‌ಗಳಿಗೆ ಸಹಿ ಆಗುತ್ತಿವೆ. ಅಭಿವೃದ್ಧಿ ಕೆಲಸಗಳು ನಡೆದಿವೆ. ನಾವು ಕೆಲಸ ಮಾಡಿದರೆ ಅವು ಕ್ಲಿಯರ್ ಆಗಿ ಮುಂದೆ ಹೋಗುತ್ತವೆ. ಫೈಲ್‌ಗಳನ್ನು ತರಿಸಿ, ಸಹಿ ಮಾಡಿ ಕಳುಹಿಸುತ್ತಿದ್ದೇವೆ ಎಂದು ತಿಳಿಸಿದರು.

ಸಿಎಂ ಸ್ಥಾನದ ಕಗ್ಗಂಟಿನ ಬಗ್ಗೆ ಪ್ರಶ್ನಿಸಿದಾಗ, ಅದನ್ನೆಲ್ಲ ನಾವು ಹೇಳುವುದಿಲ್ಲ. ಅದು ಯಾವಾಗ ಎಂದು ಅವರೇ ಹೇಳಬೇಕು. ಅದು ನಮ್ಮ ವ್ಯಾಪ್ತಿಯಲ್ಲಿ ಬರುವುದಿಲ್ಲ. ಸರಿ ಆಗಬೇಕು ಎನ್ನುವುದಷ್ಟೆ ನಮ್ಮ ಮನವಿ. ಹೇಗೆ ಮಾಡುತ್ತಾರೋ, ಬಿಡುತ್ತಾರೋ ದೆಹಲಿ ಅವರಿಗೆ ಬಿಟ್ಟಿದ್ದು. ನಾನು ಡಿಸಿಎಂ, ಕೆಪಿಸಿಸಿ ಅಧ್ಯಕ್ಷ ಯಾವುದಕ್ಕೂ ಆಕಾಂಕ್ಷಿ ಅಲ್ಲ ಎಂದು ಪದೇ ಪದೇ ಹೇಳಿದ್ದೇನೆ. ಅದನ್ನೆ ಮತ್ತೆ ಮತ್ತೆ ಹೇಳುವ ಅಗತ್ಯ ಇಲ್ಲ ಎಂದರು.

ಸಿಎಂ ಸ್ಥಾನದಲ್ಲಿ ತಮ್ಮ ಹೆಸರು ಓಡಾಡುತ್ತಿದೆ ಎಂದರೆ ಅದು ನಮ್ಮ ಅಭಿಮಾನಿಗಳು, ನಮಗೆ ಬೇಕಾದವರು ಹೇಳಿಯೇ ಹೇಳುತ್ತಾರೆ. ಅವರ ನಾಯಕರು ಸಿಎಂ ಆಗಬೇಕು ಎಂದು ಆಸೆ ಪಟ್ಟಿರುತ್ತಾರೆ. ನಮ್ಮ ಕೈಯಲ್ಲಿ ಯಾವುದೂ ಇಲ್ಲ. ಪಕ್ಷ ಏನು ತೀರ್ಮಾನ ತೆಗೆದುಕೊಳ್ಳುತ್ತದೆಯೋ ಅವರಿಗೆ ಯಾವುದು ಒಳ್ಳೆಯದು ಅನ್ನಿಸುತ್ತೋ ಅದನ್ನು ಮಾಡುತ್ತಾರೆ ಎಂದು ಹೇಳಿದ ಅವರು, ಸಂಪುಟ ವಿಸ್ತರಣೆ, ಪುನಾರಚನೆ ಯಾವುದೂ ನಮ್ಮ ವ್ಯಾಪ್ತಿಗೆ ಬರಲ್ಲ. ವರಿಷ್ಠರಿಗೆ ಬಿಟ್ಟಿದ್ದು. ಅದಕ್ಕೇನು ಮಾನದಂಡ ಇದೆ ಅವರಿಗೆ ಬಿಟ್ಟಿದ್ದು ಎಂದು ತಿಳಿಸಿದರು.