ಜನರಲ್ಲಿ ದ್ವೇಷದ ಭಾವನೆ ಬಿತ್ತುವುದು ಸಲ್ಲ

ರಬಕವಿಯಲ್ಲಿ ಬುಧವಾರ ನಡೆದ ಧುರೀಣರ ಸಭೆಯಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, ಸನ್-1942ರ ಬಾಂಬೆ ಆಕ್ಟ್ ಪ್ರಕಾರ ಬನಹಟ್ಟಿ ಜಮಖಂಡಿ ಸಂಸ್ಥಾನದಲ್ಲಿದ್ದರೆ, ರಬಕವಿ ಸಾಂಗ್ಲಿ ಸಂಸ್ಥಾನದ ವ್ಯಾಪ್ತಿಯಲ್ಲಿತ್ತು. ಆಗಿನ ಜನಸಂಖ್ಯೆ ಆಧರಿಸಿ ಮಸಣವಾಟಕ್ಕಾಗಿ ಸರ್ವೇ ನಂ.12ರಲ್ಲಿ 16 ಎಕರೆ ಜಮೀನನ್ನು ಬನಹಟ್ಟಿಯ ಪ್ರಮುಖ ಸಮಾಜಗಳಿಗೆ ಸಂಸ್ಥಾನಗಳು ಇನಾಂ ನೀಡಿದ್ದವು. ಇನಾಂ ಜಾಗೆಯನ್ನು ನಿಗದಿತ ಉದ್ದೇಶಕ್ಕೆ ಮಾತ್ರ ಬಳಸಬೇಕೆಂಬ ಕಾನೂನು ಇದ್ದರೂ, ಅದರ ದುರುಪಯೋಗವಾಗುತ್ತಿರುವ ಬಗ್ಗೆ ಪ್ರಶ್ನೆಗಳು ಉದ್ಭವಿಸಿವೆ ಎಂದರು.

ರಬಕವಿ-ಮಹಾಲಿಂಗಪುರ ನಾಕಾ ಬಳಿಯ ಸರ್ವೇ ನಂ. 3ರಲ್ಲಿ 10 ಎಕರೆ 13 ಗುಂಟೆ ಜಾಗೆಯನ್ನು ಕುರುಹಿನಶೆಟ್ಟಿ ಸಮಾಜದ ಮಠದ ಹೆಸರಿನಲ್ಲಿ ಇನಾಂ ನೀಡಲಾಗಿದೆ. ಈ ಜಾಗೆಯನ್ನು ಸಮಾಜದ ಇತರೆ ಕಾರ್ಯಗಳಿಗೆ ಬಳಸಲು ಅವಕಾಶವಿಲ್ಲ. ಆದರೆ ಕೆಲವರು ಮಸಣವಾಟದ ಜಾಗೆಯನ್ನೇ ಸಂಪೂರ್ಣವಾಗಿ ಅದೇ ಉದ್ದೇಶಕ್ಕಾಗಿ ಇನಾಂ ನೀಡಲಾಗಿದೆ ಎಂಬಂತೆ ಬಿಂಬಿಸುತ್ತಿದ್ದಾರೆ ಎಂದು ಅವರು ಆಕ್ಷೇಪಿಸಿದರು.

ಮಸಣವಾಟದ ಜಾಗೆಯನ್ನು ಬೇರೆ ಉದ್ದೇಶಕ್ಕೆ ಬಳಸಬಾರದು ಎಂಬ ಕುರಿತು ಸುಪ್ರೀಂ ಕೋರ್ಟ್ ಹಾಗೂ ಹೈಕೋರ್ಟ್ಗಳ ಆದೇಶಗಳಿದ್ದು, 2023-24ರಲ್ಲಿ ಸಿದ್ದರಾಮಯ್ಯ ಸರ್ಕಾರದ ಅವಽಯಲ್ಲಿ ಅಂದಿನ ಕಂದಾಯ ಸಚಿವ ಕೃಷ್ಣ ಬೈರೇಗೌಡ ಅವರ ನೇತೃತ್ವದ ಸಂಪುಟ ಸಭೆಯಲ್ಲಿಯೂ ಮಸಣದ ಭೂಮಿಯನ್ನು ಯಾವುದೇ ಕಾರಣಕ್ಕೂ ಅನ್ಯ ಉದ್ದೇಶಕ್ಕೆ ಬಳಸಬಾರದು ಎಂದು ತೀರ್ಮಾನಿಸಲಾಗಿದೆ ಎಂದು ತಿಳಿಸಿದರು.

ಸಾರ್ವಜನಿಕ ಸಭೆಗಳಲ್ಲಿ ಜವಾಬ್ದಾರಿಯುತವಾಗಿ ಮಾತನಾಡಬೇಕು. ವೈಯಕ್ತಿಕವಾಗಿ ರಬಕವಿ ಧುರೀಣರ ಹೆಸರು ಬಳಸಿಕೊಂಡು ಮಾತನಾಡುವ ಮುನ್ನ ವಾಸ್ತವಾಂಶ ಅರಿತುಕೊಳ್ಳಬೇಕು. ಸತ್ಯಾಸತ್ಯತೆ ಮರೆಮಾಚಿ ನಾಗರಿಕರಲ್ಲಿ ಸಂಘರ್ಷದ ವಾತಾವರಣ ನಿರ್ಮಿಸುವ ಪ್ರಯತ್ನ ನಡೆಯಬಾರದು ಎಂದು ಸೊಲ್ಲಾಪುರ ಹೇಳಿದರು.

ಮಾರುತಿ ನಾಯಕ್ ಮಾತನಾಡಿ, ರಬಕವಿ ನಗರಸಭೆಯಲ್ಲಿ 9 ಸದಸ್ಯರು ಹಾಗೂ ಬನಹಟ್ಟಿಯಲ್ಲಿ 16 ಸದಸ್ಯರಿದ್ದಾರೆ. ರಬಕವಿ-ರಾಮಪುರ ಹಾಗೂ ಹೊಸೂರ ಪ್ರದೇಶಗಳಿಗೆ ಒಂದೇ ಪಿನ್‌ಕೋಡ್ ಇದ್ದು, ಒಟ್ಟು 15 ವಾರ್ಡ್ಗಳಿವೆ. ಬನಹಟ್ಟಿಯ ಕೆಲವು ವಾರ್ಡ್ಗಳಲ್ಲಿ ಕೇವಲ 600 ಜನರಿದ್ದರೆ, ರಬಕವಿಯ ಕೆಲವು ವಾರ್ಡ್ಗಳಲ್ಲಿ ಕನಿಷ್ಠ 3 ಸಾವಿರ ಜನರಿದ್ದಾರೆ. ಹೀಗಾಗಿ ಜನಸಂಖ್ಯೆಯ ಆಧಾರದ ಮೇಲೆ ವಾರ್ಡ್ಗಳ ಮರುವಿಂಗಡಣೆ ಅಗತ್ಯವಾಗಿದೆ ಎಂದು ಹೇಳಿದರು.

ಬನಹಟ್ಟಿಯ ಕೆಲವು ಪ್ರದೇಶಗಳು ಹೊಸೂರ ಕಂದಾಯ ಗ್ರಾಮಕ್ಕೆ ಹಾಗೂ ಅರಣ್ಯ ಪ್ರದೇಶದ ಕೆಲವು ಭಾಗಗಳು ಪ್ರತ್ಯೇಕ ವ್ಯಾಪ್ತಿಗೆ ಸೇರಿರುವುದರಿಂದ, ನಗರಸಭೆಯ ವಾರ್ಡ್ಗಳ ನೈಜ ಸ್ಥಿತಿಯನ್ನು ಪರಿಶೀಲಿಸಿ ವೈಜ್ಞಾನಿಕವಾಗಿ ಮರುವಿಂಗಡಣೆ ಮಾಡಬೇಕು ಎಂದರು.

ತಹಸೀಲ್ದಾರ್ ಕಚೇರಿ, ನ್ಯಾಯಾಲಯ, ಜನತಾ ಶಿಕ್ಷಣ ಸಂಘದಿಂದ ಬನಹಟ್ಟಿ ಬಸ್ ನಿಲ್ದಾಣದವರೆಗಿನ ಪ್ರದೇಶ ಹೊಸೂರ ಕಂದಾಯ ಗ್ರಾಮಕ್ಕೆ ಸೇರಿದ್ದರೆ, ವೃತ್ತ ನಿರೀಕ್ಷಕರ ಕಚೇರಿ ಹಾಗೂ ಪೊಲೀಸ್ ಠಾಣೆ ರಾಮಪುರ ವ್ಯಾಪ್ತಿಯಲ್ಲಿವೆ. ಹೀಗಾಗಿ ನಾಗರಿಕರಲ್ಲಿ ಗೊಂದಲ ಸೃಷ್ಟಿಯಾಗದಂತೆ ಕಚೇರಿಗಳ ನಾಮಫಲಕಗಳಲ್ಲಿ ಸಂಬಂಧಿಸಿದ ವ್ಯಾಪ್ತಿಯ ಹೆಸರುಗಳನ್ನು ಸ್ಪಷ್ಟವಾಗಿ ನಮೂದಿಸಬೇಕು ಎಂದು ಒತ್ತಾಯಿಸಿದರು.

ರಬಕವಿಯಲ್ಲಿ ಗುರುತಿಸಲಾದ ಪ್ರಜಾಸೌಧದ ಜಾಗೆ ನೀರಾವರಿ ನಿಗಮಕ್ಕೆ ಸೇರಿದ್ದು, ಇದೀಗ ಕಂದಾಯ ಇಲಾಖೆಗೆ ವರ್ಗಾವಣೆಯಾಗುತ್ತಿದೆ. ಪೂರ್ವಕ್ಕೆ 30 ಅಡಿ ರಸ್ತೆ, ಪಶ್ಚಿಮಕ್ಕೆ ರಾಜ್ಯ ಹೆದ್ದಾರಿ, ದಕ್ಷಿಣಕ್ಕೆ 30 ಅಡಿ ರಸ್ತೆ ಹಾಗೂ ಉತ್ತರಕ್ಕೆ ರಾಜ್ಯ ಹೆದ್ದಾರಿ ಇರುವ ಈ ಜಾಗೆಯ ಕುರಿತು ಜಿಲ್ಲಾಧಿಕಾರಿಗಳ ಇನಾಂ ಪತ್ರಗಳನ್ನು ಪರಿಶೀಲಿಸಿ, ಯಾವುದೇ ವಿಳಂಬ ಮಾಡದೆ ಪ್ರಜಾಸೌಧ ಕಾಮಗಾರಿಗೆ ಚಾಲನೆ ನೀಡಬೇಕು ಎಂದು ಸೊಲ್ಲಾಪುರ ಅವರು ಒತ್ತಾಯಿಸಿದರು.

ರಾಮಣ್ಣ ಹುಲಕುಂದ, ಸಂಜೀವ ಜೋತಾವರ, ಭೀಮಶಿ ಪಾಟೀಲ, ಸದಾಶಿವ ಖವಾಸಿ ಸೇರಿ ಹಲವರು ಉಪಸ್ಥಿತರಿದ್ದರು.