ಬುದ್ಧವಿಹಾರದಲ್ಲಿ ‘ಪ್ರಿಗಾಬಾಲಿನ್’ ಮಾತ್ರೆಗಳ ನೂರಾರು ಖಾಲಿ ಪ್ಯಾಕೆಟ್ಸ್...!

ಜಮಖಂಡಿ ನಗರದ ಬುಧ ವಿಹಾರದಲ್ಲಿ ಬಳಸಿ ಬಿಸಾಡಿರುವ ಮಾತ್ರೆಗಳ ಖಾಲಿ ಪ್ಯಾಕೆಟ್‌ಗಳು.

Published on:

07 Sep 2026, 1:16 pm

ಪ್ರಮುಖ ಮುಖ್ಯಾಂಶಗಳು

ಸ್ಥಳೀಯ ನಿವಾಸಿಗಳಿಂದ ದುರುಪಯೋಗದ ಆರೋಪ
ಅಧಿಕಾರಿಗಳ ನಿರ್ಲಕ್ಷ್ಯದ ವಿರುದ್ಧ ಆಕ್ರೋಶ
ಸಂಜೆ ಕತ್ತಲಾಗುತ್ತಿದ್ದಂತೆ ಕೆಲ ಯುವಕರು ಉದ್ಯಾನವನಕ್ಕೆ ಬರುತ್ತಾರೆ. ಅಲ್ಲಿ ಮದ್ಯ ಸೇವನೆ ಸೇರಿ ಅನುಮಾನಾಸ್ಪದ ಚಟುವಟಿಕೆಗಳಲ್ಲಿ ತೊಡಗುತ್ತಾರೆ ಎನ್ನಲಾಗಿದೆ.

ಜಮಖಂಡಿ: ಮನುಷ್ಯನ ಕಾಯಿಲೆ ಗುಣಪಡಿಸಲು ವೈದ್ಯರ ಸಲಹೆ ಮೇರೆಗೆ ಬಳಸಬೇಕಾದ ಔಷಧಗಳೇ ದುರ್ಬಳಕೆಯಾಗುತ್ತಿವೆಯೇ? ಎಂಬ ಸಂಶಯ ಮೂಡುತ್ತಿದೆ.

ಇದಕ್ಕೆ ಪ್ರಮುಖ ಕಾರಣ ಜಮಖಂಡಿ ನಗರದ ಕುಂಚನೂರ ರಸ್ತೆ ಪಕ್ಕದಲ್ಲಿರುವ ಬುಧ ವಿಹಾರ ಉದ್ಯಾನವನದ ವಿವಿಧೆಡೆ ನರ ರೋಗ ಸೇರಿ ಹಲವು ಚಿಕಿತ್ಸಾ ಸಂದರ್ಭಗಳಲ್ಲಿ ಬಳಸಲಾಗುವ ಪ್ರಿಗಾಬಾಲಿನ್ 75 ಎಂಜಿ ಮಾತ್ರೆಗಳ ಖಾಲಿ ಪ್ಯಾಕೆಟ್‌ಗಳು ಕಂಡು ಬಂದಿವೆ.

ಅದರ ಜೊತೆಗೆ ಮದ್ಯದ ಖಾಲಿ ಬಾಟಲ್‌ಗಳೂ ಪತ್ತೆಯಾಗಿರುವುದು ಸ್ಥಳೀಯರ ಆತಂಕವನ್ನು ಮತ್ತಷ್ಟು ಹೆಚ್ಚಿಸಿದೆ. ಉದ್ಯಾನವನದಲ್ಲಿ ಯುವಕರ ಗುಂಪುಗಳು ಮಾತ್ರೆಗಳನ್ನು ದುರ್ಬಳಕೆ ಮಾಡುತ್ತಿದ್ದಾರೆ ಎಂಬುದು ನಿವಾಸಿಗಳು ಆರೋಪಿಸಿದ್ದಾರೆ.

ಕತ್ತಲಾಗುತ್ತಿದ್ದಂತೆ ಯುವಕರ ಲಗ್ಗೆ

ಸ್ಥಳೀಯರ ಪ್ರಕಾರ, ಸಂಜೆ ಕತ್ತಲಾಗುತ್ತಿದ್ದಂತೆ ಕೆಲ ಯುವಕರು ಉದ್ಯಾನವನಕ್ಕೆ ಬರುತ್ತಾರೆ. ಅಲ್ಲಿ ಮದ್ಯ ಸೇವನೆ ಸೇರಿ ಅನುಮಾನಾಸ್ಪದ ಚಟುವಟಿಕೆಗಳಲ್ಲಿ ತೊಡಗುತ್ತಾರೆ ಎನ್ನಲಾಗಿದೆ. ಬಳಸಿ ಬಿಸಾಡಿರುವ ಮಾತ್ರೆಗಳ ಪ್ಯಾಕೆಟ್‌ಗಳು, ಖಾಲಿ ಬಾಟಲ್‌ಗಳು ಸೇರಿ ವಿವಿಧ ತ್ಯಾಜ್ಯಗಳು ಉದ್ಯಾನವನದ ಆವರಣದಲ್ಲಿ ಕಂಡು ಬರುತ್ತಿರುವುದು ಇದಕ್ಕೆ ಪುಷ್ಟಿ ನೀಡುವಂತಿವೆ.

ಇಂತಹ ಚಟುವಟಿಕೆಗಳಿಂದ ಉದ್ಯಾನವನದ ವಾತಾವರಣ ಹದಗೆಡುತ್ತಿದ್ದು, ಕುಟುಂಬ ಸಮೇತ ವಾಯು ವಿಹಾರಕ್ಕೆ ಬರುವ ಸಾರ್ವಜನಿಕರು ಮುಜುಗರ ಅನುಭವಿಸುವಂತಾಗಿದೆ. ಮಹಿಳೆಯರು ಮತ್ತು ಮಕ್ಕಳು ಸಂಜೆ ವೇಳೆ ಉದ್ಯಾನವನಕ್ಕೆ ಬರಲು ಹಿಂದೇಟು ಹಾಕುವ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂಬುದು ಸ್ಥಳೀಯರ ಅಳಲು.

ಶಾಲಾ ಮಕ್ಕಳ ಸುರಕ್ಷತೆಯ ಕಳವಳ

ಬುಧ ವಿಹಾರಕ್ಕೆ ಹೊಂದಿಕೊಂಡಂತೆ ಸರ್ಕಾರಿ ಆರ್‌ಎಂಎಸ್‌ಎ ಹೈಸ್ಕೂಲ್ ಇರುವುದರಿಂದ. ಶಾಲಾ ಮಕ್ಕಳು ಓಡಾಡುವ ಪ್ರದೇಶದಲ್ಲೇ ಮಾತ್ರೆಗಳ ಖಾಲಿ ಪ್ಯಾಕೆಟ್‌ಗಳು ಮತ್ತು ಮದ್ಯದ ಬಾಟಲ್‌ಗಳು ಕಂಡು ಬರುತ್ತಿರುವುದು ಆತಂಕಕಾರಿ ಬೆಳವಣಿಗೆ. ಔಷಧಗಳ ದುರ್ಬಳಕೆ ಅಥವಾ ನಶೆಯಂತಹ ಚಟುವಟಿಕೆಗಳು ವಿದ್ಯಾರ್ಥಿಗಳ ಮೇಲೆ ನಕಾರಾತ್ಮಕ ಪರಿಣಾಮ ಬೀರುವ ಸಾಧ್ಯತೆ ಇರುವುದರಿಂದ, ಸಂಬಂಧಿಸಿದ ಇಲಾಖೆಗಳು ಈ ಕುರಿತು ಪರಿಶೀಲನೆ ನಡೆಸಿ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ನಾಗರಿಕರು ಒತ್ತಾಯಿಸಿದ್ದಾರೆ.

ವೈದ್ಯರು ಏನನ್ನುತ್ತಾರೆ?

ಪ್ರಿಗಾಬಾಲಿನ್ ಮಾತ್ರೆಗಳನ್ನು ವೈದ್ಯರ ಸಲಹೆಯಿಲ್ಲದೆ ಸೇವಿಸುವುದು ಅಪಾಯಕಾರಿ. ಇಂತಹ ಔಷಧಗಳ ಬಳಕೆಯಿಂದ ನಿದ್ರೆ, ಮಂಪರು ಬರುತ್ತದೆ. ಮುಂದೆ ಅದರಿಂದ ಅಡ್ಡ ಪರಿಣಾಮ ಉಂಟಾಗುತ್ತದೆ. ಯಾವುದೇ ಔಷಧವನ್ನು ವೈದ್ಯರ ಸಲಹೆಯಿಲ್ಲದೆ ಸೇವಿಸಬಾರದು. ವಿಶೇಷವಾಗಿ ವೈದ್ಯಕೀಯ ಬಳಕೆಗೆ ಇರುವ ಮಾತ್ರೆಗಳನ್ನು ನಶೆಗಾಗಿ ಬಳಸುವುದು ಅಪಾಯಕಾರಿ. ಯುವಕರು ಇಂತಹ ಮಾತ್ರೆಗಳಿಂದ ದೂರವಿರಬೇಕು ಎಂದು ವೈದ್ಯ ಡಾ. ಕೃಷ್ಣಾ ಬಣ್ಣದ ಎಚ್ಚರಿಸಿದ್ದಾರೆ.

ಮಾತ್ರೆಗಳು ಎಲ್ಲಿಂದ ಬರುತ್ತಿವೆ ?

ಉದ್ಯಾನವನದಲ್ಲಿ ಇಷ್ಟೊಂದು ಪ್ರಮಾಣದಲ್ಲಿ ಔಷಧಗಳ ಖಾಲಿ ಪ್ಯಾಕೆಟ್‌ಗಳು ಪತ್ತೆಯಾಗಿರುವುದು ಔಷಧಗಳ ಮಾರಾಟ ಮತ್ತು ದುರ್ಬಳಕೆಯ ಕುರಿತು ಹಲವು ಪ್ರಶ್ನೆಗಳನ್ನು ಹುಟ್ಟು ಹಾಕಿದೆ. ಈ ಮಾತ್ರೆಗಳು ಎಲ್ಲಿಂದ ಖರೀದಿಯಾಗುತ್ತಿವೆ? ವೈದ್ಯರ ಚೀಟಿ ಇಲ್ಲದೆ ಮಾರಾಟವಾಗುತ್ತಿವೆಯೇ? ಔಷಧ ಅಂಗಡಿಗಳಿಂದ ಅಕ್ರಮವಾಗಿ ಪೂರೈಕೆಯಾಗುತ್ತಿದೆಯೇ? ಎಂಬುದರ ಕುರಿತು ಅಧಿಕಾರಿಗಳು ತನಿಖೆ ನಡೆಸಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.

ಸಿಸಿ ಟಿವಿ ಅಳವಡಿಕೆಗೆ ಆಗ್ರಹ

ಉದ್ಯಾನವನದಲ್ಲಿ ಸಿಸಿ ಟಿವಿ ಕ್ಯಾಮರಾಗಳನ್ನು ಅಳವಡಿಸಿ, ರಾತ್ರಿ ವೇಳೆಯಲ್ಲಿ ಪೊಲೀಸ್ ಗಸ್ತು ಹೆಚ್ಚಿಸಬೇಕು. ಅನುಮಾನಾಸ್ಪದ ಚಟುವಟಿಕೆಗಳ ಮೇಲೆ ನಿಗಾ ಇಡಬೇಕು. ಉದ್ಯಾನವನವನ್ನು ಸಾರ್ವಜನಿಕರು, ವಿಶೇಷವಾಗಿ ಮಹಿಳೆಯರು ಮತ್ತು ಮಕ್ಕಳು ಸುರಕ್ಷಿತವಾಗಿ ಬಳಸುವಂತಹ ವಾತಾವರಣ ನಿರ್ಮಿಸಬೇಕು ಎಂದು ನಾಗರಿಕರು ಆಗ್ರಹಿಸಿದ್ದಾರೆ.

ಉದ್ಯಾನವನದಲ್ಲಿ ನಶೆಗಾಗಿ ಮಾತ್ರೆಗಳನ್ನು ಬಳಸುತ್ತಿರುವುದು ಮೇಲ್ನೋಟಕ್ಕೆ ಕಂಡು ಬರುತ್ತಿದೆ. ಮದ್ಯ ಸೇವಿಸಿ ಖಾಲಿ ಬಾಟಲ್‌ಗಳನ್ನು ಎಸೆದು ಹೋಗುತ್ತಿದ್ದಾರೆ. ಇಷ್ಟೆಲ್ಲ ನಡೆಯುತ್ತಿದ್ದರೂ ಅಧಿಕಾರಿಗಳು ಗಮನ ಹರಿಸುತ್ತಿಲ್ಲ. ತಕ್ಷಣ ಕ್ರಮ ಕೈಗೊಂಡು ಉದ್ಯಾನವನವನ್ನು ಸಾರ್ವಜನಿಕರಿಗೆ ಸುರಕ್ಷಿತವಾಗಿಸಬೇಕು.
- ಶಶಿಧರ ಮೀಶಿ ಸ್ಥಳೀಯ ನಿವಾಸಿ

negligence of officials