ಮಾನವೀಯತೆಯೇ ಸಾಹಿತ್ಯದ ಜೀವಾಳ

ನಗರದ ಕಸಾಪ ಭವನದಲ್ಲಿ ಮೇಘಮೈತ್ರಿ ಸಾಹಿತ್ಯ ಸಂಘದ ಆಶ್ರಯದಲ್ಲಿ ಸೋಮವಾರ ಆಯೋಜಿಸಿದ್ದ ರಾಜ್ಯ ಮಟ್ಟದ ದ್ವಿತೀಯ ಯುವ ಸಾಹಿತ್ಯ ಸಮ್ಮೇಳನವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಪಂಪನಿಂದ ಲಂಕೇಶರವರೆಗೆ ಕನ್ನಡ ಸಾಹಿತ್ಯದಲ್ಲಿ ಮಾನವೀಯತೆಯ ಧಾರೆ ನಿರಂತರವಾಗಿ ಹರಿದಿದೆ. ಇಂದಿನ ತಂತ್ರಜ್ಞಾನ ಯುಗದಲ್ಲಿಯೂ ಮಾನವ ಸಂವೇದನೆ ಹಾಗೂ ನೋವನ್ನು ಅನುಭವಿಸಿ ಬರೆಯುವ ಸೃಜನಶೀಲತೆಯ ಜವಾಬ್ದಾರಿ ಹೆಚ್ಚಾಗಿದೆ ಎಂದು ಹೇಳಿದರು.

ಸಮ್ಮೇಳನದ ಸರ್ವಾಧ್ಯಕ್ಷರಾದ ಡಾ. ವೆಂಕಟೇಶ ಗುಡೆಪ್ಪನವರ ಮಾತನಾಡಿ, ಕನ್ನಡ ಭಾಷೆ ಕೇವಲ ಭಾವನಾತ್ಮಕ ವಲಯಕ್ಕೆ ಸೀಮಿತವಾಗದೆ ವೈದ್ಯಕೀಯ, ಇಂಜಿನಿಯರಿಂಗ್ ಹಾಗೂ ಕೃಷಿ ವಿಜ್ಞಾನ ಸೇರಿ ತಾಂತ್ರಿಕ ಕ್ಷೇತ್ರಗಳಲ್ಲಿಯೂ ಬಳಕೆಯಾಗಬೇಕು. ಕನ್ನಡ ಬದುಕಿನ ಭಾಷೆಯಾಗಿ ಬೆಳೆಯಬೇಕಿದೆ ಎಂದು ಹೇಳಿದರು.

ಬೆಂಗಳೂರಿನ ಪತ್ರಕರ್ತೆ ರಶ್ಮಿ ಎಸ್. ಮಾತನಾಡಿ, ಕೃತಕ ಬುದ್ಧಿಮತ್ತೆಗಿಂತ ನೈಸರ್ಗಿಕ ಬುದ್ಧಿಮತ್ತೆ ಕೊರತೆ ಸಮಾಜದಲ್ಲಿ ಕಾಣಿಸುತ್ತಿದೆ. ಉತ್ತಮ ಸಾಹಿತ್ಯ ಸೃಷ್ಟಿಗೆ ಆಳವಾದ ಅನುಭವ ಮತ್ತು ನಿಜವಾದ ಭಾವನೆ ಅಗತ್ಯವಿದೆ ಎಂದರು.

ಹಿರಿಯ ಸಂಶೋಧಕ ಡಾ. ಪ್ರಕಾಶ ಖಾಡೆ ಮಾತನಾಡಿ, ಬರಹಗಾರನಿಗೆ ಓದು ಒಂದು ತಪಸ್ಸಿನಂತಿರಬೇಕು. ತಂತ್ರಜ್ಞಾನವು ನಮ್ಮ ಒಳಜಗತ್ತಿನ ಸ್ವಂತಿಕೆಯನ್ನು ಕದಡದಂತೆ ಎಚ್ಚರಿಕೆಯಿಂದ ಬಳಸಬೇಕು ಎಂದರು.

ಹಿರಿಯ ಸಾಹಿತಿ ಡಾ. ಶಿವಾನಂದ ಕುಬಸದ ಸಾಹಿತ್ಯವು ರಂಜನೆ, ಚಿಂತನೆ ಹಾಗೂ ಪರಿವರ್ತನೆ ನೀಡುವ ಶಕ್ತಿಯಾಗಿದೆ ಎಂದು ತಿಳಿಸಿದರು.

ಆರಂಭದಲ್ಲಿ ರನ್ನ ಪ್ರತಿಷ್ಠಾನದ ಸದಸ್ಯ ಡಾ. ಕೆ.ಎಲ್‌. ಉದಪುಡಿ ಧ್ವಜಾರೋಹಣ ನೆರವೇರಿಸಿದರು. ಸರ್ಕಾರಿ ನೌಕರರ ಸಂಘದ ಅಧ್ಯಕ್ಷ ಪ್ರಕಾಶ ಹೊಸಮನಿ ಪುಸ್ತಕ ಮಳಿಗೆಗಳನ್ನು ಉದ್ಘಾಟಿಸಿದರು. ಡಾ. ವೆಂಕಟೇಶ ಗುಡೆಪ್ಪನವರ ಅವರ ಶೋಧ ಮಕ್ಕಳ ಸಾಹಸ ಕಾದಂಬರಿ ಸೇರಿ ಹಲವು ಕೃತಿಗಳನ್ನು ಲೋಕಾರ್ಪಣೆ ಮಾಡಲಾಯಿತು.

ಸಂಘದ ಅಧ್ಯಕ್ಷ ಎಂ. ರಮೇಶ ಕಮತಗಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಕಸಾಪ ತಾಲೂಕು ಅಧ್ಯಕ್ಷ ಆನಂದ ಪೂಜಾರಿ ಆಶಯ ನುಡಿ ನುಡಿದರು. ಚಂದ್ರಶೇಖರ ದೇಸಾಯಿ, ಬಿ. ರತ್ನಾಕರ ಶೆಟ್ಟಿ, ಇಂದಿರಾ ಸಾತನೂರ, ಆರ್.ಜಿ. ಪಾಟೀಲ, ಡಾ. ನ. ಗಂಗಾಧರಪ್ಪ, ಹುಸೇನ ಪತ್ತೇಖಾನ, ಸಂಗೀತಾ ದಾಸ್ಯಾಳ, ಹೇಮಾ ಬಡಿಗೇರ, ಶ್ರೀದೇವಿ ಬಾಡಗಿ ಸೇರಿ ಅನೇಕರು ಉಪಸ್ಥಿತರಿದ್ದರು.

ಸಮ್ಮೇಳನದ ಅಂಗವಾಗಿ ನಡೆದ ಚರ್ಚಾಗೋಷ್ಠಿಯಲ್ಲಿ ಹಿರಿಯ ಅಂಕಣಕಾರ ಪ್ರಕಾಶ ವಸöದ ಅವರು ಡಾ. ವೆಂಕಟೇಶ ಗುಡೆಪ್ಪನವರ ಅವರ ಬದುಕು ಮತ್ತು ಬರಹಗಳ ಕುರಿತು ಮಾತನಾಡಿದರು. ಪುಸ್ತಕ ಓದು ಸಂಸ್ಕೃತಿ ಮತ್ತು ಯುವಜನತೆ ವಿಷಯದ ಮೇಲೆ ಸಾಹಿತಿ ದ್ರಾಕ್ಷಾಯಣಿ ಮಂಡಿ ವಿಚಾರ ಮಂಡಿಸಿದರು. ಹಿರಿಯ ಪತ್ರಕರ್ತ ಅಶೋಕ ಕುಲಕರ್ಣಿ ಅಧ್ಯಕ್ಷತೆಯಲ್ಲಿ ನಡೆದ ಚರ್ಚೆಯಲ್ಲಿ ಇಂದಿನ ಕಾಲಘಟ್ಟದಲ್ಲಿ ಸಾಹಿತ್ಯದ ಅಗತ್ಯತೆಯ ಕುರಿತು ಅಭಿಪ್ರಾಯಗಳು ವ್ಯಕ್ತವಾದವು.

ನಂತರ ನಡೆದ ಕವಿಗೋಷ್ಠಿಯಲ್ಲಿ ಜಿಲ್ಲೆಯ ವಿವಿಧ ಭಾಗಗಳಿಂದ ಬಂದ ಸುಮಾರು 16ಕ್ಕೂ ಹೆಚ್ಚು ಯುವ ಕವಿಗಳು ತಮ್ಮ ಕವನಗಳನ್ನು ವಾಚಿಸಿದರು. ಅನೀತಾ ಪಾಟೀಲ ಆಶಯ ನುಡಿ ನುಡಿದರು. ವಿರೇಶ ಅಗಸರ, ಗುರುನಾಥ ಬೇವಿನಗಿಡದ, ರಮೇಶ ಅರಕೇರಿ ಇತರರಿದ್ದರು.

ಈ ಅಕ್ಷರ ಹಬ್ಬಕ್ಕೆ ಬಸಯ್ಯಜ್ಜನವರ ಹಂತಿ ಮೇಳ ಹಾಗೂ ದುರ್ಗಾದೇವಿ ಕಲಾ ಸಂಘದಿಂದ ಜಾನಪದ ಗಾಯನ, ಹಂತಿ ಹಾಡುಗಳು ಹಾಗೂ ಭಜನಾ ಪದಗಳ ಪ್ರದರ್ಶನ ಸಾಂಸ್ಕೃತಿಕ ಕಳೆ ನೀಡಿತು.

ಸಮಾರೋಪ ಸಮಾರಂಭದಲ್ಲಿ ಸಾಹಿತಿ ಡಾ. ಸಿದ್ದಣ್ಣ ಬಾಡಗಿ ಮಾತನಾಡಿ, ಇಂತಹ ಸಾಹಿತ್ಯ ಸಮಾರಂಭಗಳು ಯುವಕರಲ್ಲಿ ಸಾಹಿತ್ಯಾಸಕ್ತಿಯನ್ನು ಬೆಳೆಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತವೆ ಎಂದು ಹೇಳಿದರು. ಅಧ್ಯಕ್ಷ ಕಲ್ಲಪ್ಪಣ್ಣ ಸಬರದ ಅಧ್ಯಕ್ಷತೆ ವಹಿಸಿದ್ದರು.

ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದವರಿಗೆ ಪ್ರಶಸ್ತಿಗಳನ್ನು ಪ್ರದಾನ ಮಾಡಲಾಯಿತು. ಕಲೆ ಮತ್ತು ಸಾಹಿತ್ಯ ಕ್ಷೇತ್ರದಲ್ಲಿ ಮಿಂಚುತ್ತಿರುವ ಕೃತಿ ದೇಶಪಾಂಡೆ ಹಾಗೂ ಗ್ರೀಷ್ಮಾ ದೇಶಪಾಂಡೆ ಅವರಿಗೆ ಪ್ರತಿಭಾ ಕಲಾರತ್ನ ಪ್ರಶಸ್ತಿ, ಕನ್ನಡ ನಾಡು-ನುಡಿ ಸೇವೆಗೆ ಪವಿತ್ರ ಬಿ.ಸಿ. ಹಾಗೂ ಅಕ್ಕಮ್ಮ ಶಿವಪ್ಪ ನುಗ್ಲಿ ಅವರಿಗೆ ಕನ್ನಡ ಸೇವಾರತ್ನ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.

ಶಿಕ್ಷಣ ಕ್ಷೇತ್ರದಲ್ಲಿ ಸಾಧನೆ ಮಾಡಿದ ಎಸ್.ಎಚ್. ದಾಸರೆಡ್ಡಿ ಹಾಗೂ ರೇಣುಕಾ ಯಡಹಳ್ಳಿ ಅವರಿಗೆ ಶಿಕ್ಷಣರತ್ನ ಪ್ರಶಸ್ತಿ ಪ್ರದಾನಿಸಲಾಯಿತು. ಸಮಾಜಕ್ಕೆ ಮಾದರಿಯಾಗಿ ಬದುಕುತ್ತಿರುವ ದಂಪತಿ ಸಂಗಮೇಶನಂದಾ ನೀಲಗುಂದ ಮತ್ತು ಪಿ.ಬಿ. ಹಿರೇಮಠ ಅನುಸೂಯ ಹಿರೇಮಠ ಅವರಿಗೆ ಆದರ್ಶ ದಂಪತಿ ಪ್ರಶಸ್ತಿ ನೀಡಿ ಅಭಿನಂದಿಸಲಾಯಿತು.