ಕೃಷ್ಣಾ ನದಿಯಲ್ಲಿ ಮಕ್ಕಳ ಸುರಕ್ಷತೆ ಎಚ್ಚರಿಕೆ

ಇತ್ತೀಚೆಗೆ ಹುಬ್ಬಳ್ಳಿಯಿಂದ ಅಜ್ಜಿಮನೆಗೆ ಬಂದಿದ್ದ 13 ವರ್ಷದ ಬಾಲಕನೊಬ್ಬ ನದಿಯಲ್ಲಿ ಮುಳುಗಿ ಮೃತಪಟ್ಟ ಘಟನೆ ಎಲ್ಲರಲ್ಲೂ ಆತಂಕ ಮೂಡಿಸಿದೆ. ಈ ಹಿನ್ನೆಲೆಯಲ್ಲಿ ಈಜು ಬಾರದ ಮಕ್ಕಳನ್ನು ನದಿಗೆ ಇಳಿಸದಂತೆ ನೋಡಿಕೊಳ್ಳಬೇಕು. ಈಜು ಪರಿಣಿತರ ಮೇಲ್ವಿಚಾರಣೆಯಲ್ಲಿ ಮಾತ್ರ ಈಜು ಕಲಿಸುವುದು ಸುರಕ್ಷಿತ ಎಂಬ ಸಲಹೆ ನೀಡಲಾಗಿದೆ.

ನಗರಸಭೆ ಪೌರಾಯುಕ್ತ ರಮೇಶ್ ಜಾಧವ ಮಾತನಾಡಿ, ನದಿದಡದಲ್ಲಿ ಇರುವ ಕಲ್ಲುಗಳು ತೀವ್ರವಾಗಿ ಚೂಪಾಗಿರುವುದರಿಂದ ಗಾಯಗಳ ಅಪಾಯ ಹೆಚ್ಚಿದೆ. ಎತ್ತರ ಪ್ರದೇಶಗಳಿಂದ ಜಿಗಿಯುವುದು ಅಥವಾ ತಲೆ ಕೆಳಗಾಗಿ ನೀರಿಗೆ ಧುಮುಕುವುದು ಅಪಾಯಕಾರಿ ಕ್ರಮಗಳಾಗಿದ್ದು, ಇವುಗಳನ್ನು ತಪ್ಪಿಸುವಂತೆ ಸೂಚಿಸಲಾಗಿದೆ ಎಂದು ತಿಳಿಸಿದ್ದಾರೆ.

ಇನ್ನೊಂದೆಡೆ, ನದಿಯಲ್ಲಿ ನಿಂತಿರುವ ನೀರು ಕುಡಿಯುವ ನೀರಿನ ಮೂಲವಾಗಿರುವುದರಿಂದ ಸಾರ್ವಜನಿಕರು ಸ್ವಚ್ಛತೆ ಕಾಪಾಡಬೇಕು. ನದಿಯಲ್ಲಿ ಈಜುವುದು, ಬಟ್ಟೆ ತೊಳೆಯುವುದು ಮುಂತಾದ ಚಟುವಟಿಕೆಗಳಿಂದ ನೀರು ಮಲೀನವಾಗುವ ಸಾಧ್ಯತೆ ಇದೆ ಎಂದು ನಾಗರಿಕರಿಗೆ ಮನವಿ ಮಾಡಿದ್ದಾರೆ.