ಅಮೀನಗಡದಲ್ಲಿ ಚಾಲುಕ್ಯರ ರಾಜ ಲಾಂಛನ ಪತ್ತೆ...!

ಚಾಲುಕ್ಯರ ವೈಷ್ಣವ ಧರ್ಮದ ನಂಬಿಕೆ, ರಾಜಕೀಯ ಶಕ್ತಿ, ಧಾರ್ಮಿಕ ನಂಬಿಕೆ ಮತ್ತು ಆರ್ಥಿಕ ಸಮೃದ್ಧಿಯನ್ನು ತಂದುಕೊಟ್ಟ ಅತ್ಯಂತ ಪವಿತ್ರವಾದ ರಾಜ ಲಾಂಛನ ಐಹೊಳೆಯಲ್ಲಿ ಮಾತ್ರ ಇದ್ದು, ಇಲ್ಲಿ ಪತ್ತೆಯಾಗಿದ್ದು ವಿಶೇಷ ಸಂಗತಿ.

ಪಟ್ಟಣದಲ್ಲಿರುವ ಸಂಗಮೇಶ್ವರ ದೇವಾಲಯ ಪತ್ತೆಯಾಗಿರುವ ಈ ಲಾಂಛನವನ್ನು ಹವ್ಯಾಸಿ ಸಂಶೋಧಕ ಮಲ್ಲಿಕಾರ್ಜುನ ಸಜ್ಜನ ಪತ್ತೆ ಹಚ್ಚಿದ್ದು, ಇದನ್ನು ವೀಕ್ಷಿಸಲು ಭಾನುವಾರ ಭಾರತ ಪುರಾತತ್ವ ಇಲಾಖೆಯ ಹೈದ್ರಾಬಾದ್ ವಿಭಾಗದ ಅಧೀಕ್ಷಕ ಡಾ. ಎಚ್.ಆರ್. ದೇಸಾಯಿ ಭೇಟಿ ನೀಡಿದ್ದರು.

ಸಂಗಮನಾಥ ದೇವಾಲಯ ಪುರಾತನವಾಗಿದ್ದು, ಚಾಲುಕ್ಯರ ಕಾಲದ ನಾಲ್ಕು ಕಂಬಗಳು, ಅದರಲ್ಲಿ ಎರಡು ಕಂಬಗಳನ್ನು ಭಾರವಾಹಕರು ಕಂಬದ ಮೇಲ್ಭಾಗದಲ್ಲಿ ಛಾವಣಿಯ ಭಾರವನ್ನು ತಮ್ಮ ಕೈಗಳಿಂದ ಎತ್ತಿ ಹಿಡಿದಿರುವ ಕೆತ್ತನೆ, ಬಾದಾಮಿಯ ಗುಹಾಂತರ ದೇವಾಲಯ, ಪಟ್ಟದಕಲ್ಲಿನ ದೇವಾಲಯಗಳಲ್ಲಿ ಕಾಣಬಹುದು.

ವಿಶೇಷವಾಗಿ ಚಾಲುಕ್ಯರ ಕಾಲದ ರಾಜ ಲಾಂಛನ ಪತ್ತೆಯಾಗಿದ್ದು ಮಹತ್ತರ ಅಂಶವಾಗಿದೆ. ಐಹೊಳೆ ಬಿಟ್ಟರೆ ಚಾಲುಕ್ಯರ ರಾಜ ಲಾಂಛನ ವರಾಹ ಕಾಣ ಸಿಗುವುದಿಲ್ಲ. ಅಂತಹ ಅಪರೂಪದ ಕುರುಹು ಅಮೀನಗಡದ ದೇವಾಲಯದ ಮುಖ್ಯದ್ವಾರದ ಕಂಬದಲ್ಲಿದೆ. ಇತಿಹಾಸದ ಕುತೂಹಲಕಾರಿ ಅಂಶವಾಗಿದೆ.

ನಾಲ್ಕು ಕಂಬಗಳು, ಉಬ್ಬು ಚಿತ್ರಗಳು, ಪೂರ್ವದಲ್ಲಿ ಗರುಡು ಲಾಂಛನ, ಕಾರ್ತಿಕೇಯ ನವಿಲು ಮೇಲೆ ಕುಳಿತಿರುವ ಚಿತ್ರ ಸೇರಿ ಅನೇಕ ಚಿತ್ರಗಳನ್ನು ಇಲ್ಲಿ ಕಾಣಬಹುದು. 25 ಮೀಟರ್ ಇರುವ ಈ ದೇವಾಲಯದ ಮುಖ ಮಂಟಪ ಮಾತ್ರ ಬಾದಾಮಿ ಚಾಲುಕ್ಯರ ಕಾಲಕ್ಕೆ ಸೇರಿದ್ದು, ಕಾಲಾಂತರದಲ್ಲಿ ಮರಾಠರ ಕಾಲದಲ್ಲಿ ಜೀರ್ಣೋದ್ಧಾರ ಆಗಿರುವ ಕುರುಹು ಕಾಣಸಿಗುತ್ತವೆ.

ಸಂಶೋಧಕ ಶಿಕ್ಷಕ ಮಲ್ಲಿಕಾರ್ಜುನ ಸಜ್ಜನ, ಡಾ. ಪ್ರಮೋದ ಮಠಪತಿ, ಮಲ್ಲಿಕಾರ್ಜುನ ಜಿಗಳೂರ, ವೀರಣ್ಣ ಹಿರೇಮಠ ಇದ್ದರು.