ಸಮಾಜ ಸೇವೆಯಲ್ಲಿ ಬಿಸ್ವಾಗರ ಕೊಡುಗೆ ಅಪಾರ

ಮಹಾಲಿಂಗಪುರದ ಕೆ.ಸಿ. ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ಕಾರ್ಯನಿರತ ಪತ್ರಕರ್ತರ ಸಂಘ ಹಾಗೂ ರನ್ನ ವಿಚಾರ ವೇದಿಕೆ ಸಂಯುಕ್ತ ಆಶ್ರಯದಲ್ಲಿ ಆಯೋಜಿಸಿದ್ದ ಪತ್ರಕರ್ತ ಪ್ರೊ. ದೇವೇಂದ್ರ ಬಿಸ್ವಾಗರ ಅವರ ಸ್ಮರಣೆ ಕಾರ್ಯಕ್ರಮದಲ್ಲಿ ಉದ್ಯಮಿ ಜಯರಾಮಶೆಟ್ಟಿ ಮಾತನಾಡಿದರು. ಶಿವಾನಂದ ತಿಪ್ಪಾ, ಚೇತನ ಪಾಟೀಲ ಇತರರಿದ್ದರು.

Published on:

11 Aug 2026, 10:38 am

ಪ್ರಮುಖ ಮುಖ್ಯಾಂಶಗಳು

ಉಪಾಧ್ಯಕ್ಷ ಶಿವಾನಂದ ತಿಪ್ಪಾ ಅಭಿಮತ
ಉಪಾಧ್ಯಕ್ಷ ಶಿವಾನಂದ ತಿಪ್ಪಾ ಅಭಿಮತ

ಮಹಾಲಿಂಗಪುರ : ಪ್ರಾಧ್ಯಾಪಕ, ಪತ್ರಕರ್ತ, ಹೋರಾಟಗಾರ, ರನ್ನ ವಿಚಾರ ವೇದಿಕೆ ಸಂಸ್ಥಾಪಕ ಅಧ್ಯಕ್ಷ ಹಾಗೂ ಸಮಾಜ ಸೇವಕರಾಗಿ ಪ್ರೊ. ಡಿ.ಬಿ. ಬಿಸ್ವಾಗರ ಅವರು ಸಲ್ಲಿಸಿದ ಸೇವೆ ವಿಶಿಷ್ಟವಾಗಿತ್ತು. ಅವರು ಕೇವಲ ಒಬ್ಬ ವ್ಯಕ್ತಿಯಾಗಿರಲಿಲ್ಲ, ಸಮಾಜಮುಖಿ ಚಿಂತನೆಗಳನ್ನು ಮುನ್ನಡೆಸಿದ ಶಕ್ತಿಯಾಗಿದ್ದರು ಎಂದು ನವಚೇತನ ಶಿಕ್ಷಣ ಸಂಸ್ಥೆಯ ಜಿ.ಸಿ. ಆಂಗ್ಲ ಮಾಧ್ಯಮ ಶಾಲೆಯ ಉಪಾಧ್ಯಕ್ಷ ಶಿವಾನಂದ ತಿಪ್ಪಾ ಹೇಳಿದರು.

ಪಟ್ಟಣದ ಕೆ.ಸಿ. ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ಕಾರ್ಯನಿರತ ಪತ್ರಕರ್ತರ ಸಂಘ ಹಾಗೂ ರನ್ನ ವಿಚಾರ ವೇದಿಕೆ ಸಹಯೋಗದಲ್ಲಿ ಸೋಮವಾರ ಆಯೋಜಿಸಿದ್ದ ಪ್ರೊ. ದೇವೇಂದ್ರ ಬಿಸ್ವಾಗರ ಸ್ಮರಣಾ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಬಿಸ್ವಾಗರ ಅವರು ಶಿಕ್ಷಣ, ಪತ್ರಿಕೋದ್ಯಮ ಹಾಗೂ ಸಾಮಾಜಿಕ ಹೋರಾಟದ ಮೂಲಕ ಜನಪರ ವಿಚಾರಗಳಿಗೆ ಧ್ವನಿಯಾಗಿದ್ದರು. ಅವರ ಹೆಸರಿನಲ್ಲಿ ಸ್ಮರಣಾ ಕಾರ್ಯಕ್ರಮ ಆಯೋಜಿಸಿರುವುದು ಅವರ ಸೇವೆ ಹಾಗೂ ಚಿಂತನೆಗಳನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವ ಉತ್ತಮ ಪ್ರಯತ್ನವಾಗಿದೆ ಎಂದರು.

ಉದ್ಯಮಿ ಜಯರಾಮ ಶೆಟ್ಟಿ ಮಾತನಾಡಿ, ಬಿಸ್ವಾಗರ ಅವರ ಸಾಮಾಜಿಕ ಕಾಳಜಿ ಕೇವಲ ಮಾತಿಗಷ್ಟೇ ಸೀಮಿತವಾಗಿರಲಿಲ್ಲ. ಮಹಾಲಿಂಗಪುರ ಪ್ರತ್ಯೇಕ ಮತಕ್ಷೇತ್ರ ರಚನೆಗಾಗಿ ಕುಲದೀಪ್ ಸಿಂಗ್ ಆಯೋಗದ ಮುಂದೆ ಬೇಡಿಕೆ ಸಲ್ಲಿಸುವ ಪ್ರಯತ್ನಕ್ಕೆ ಅವರು ಪ್ರೇರಣೆಯಾಗಿದ್ದರು. ಕುಡಚಿ- ಬಾಗಲಕೋಟೆ ರೈಲು ಸಂಪರ್ಕದ ಸಂದರ್ಭದಲ್ಲಿ ರಾಯಬಾಗ- ಮಹಾಲಿಂಗಪುರ- ಬಾಗಲಕೋಟೆ ಸಂಪರ್ಕ ಕಲ್ಪಿಸುವ ಲಿಂಕ್ ರಸ್ತೆಯ ಕನಸು ಕಂಡಿದ್ದರು. ಇಂತಹ ಅಭಿವೃದ್ಧಿ ಚಿಂತನೆಗಳು ಅವರ ದೂರದೃಷ್ಟಿಗೆ ಸಾಕ್ಷಿಯಾಗಿವೆ ಎಂದು ಹೇಳಿದರು.

ಬಿಸ್ವಾಗರ ಅವರ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಿ ಪುಷ್ಪನಮನ ಸಲ್ಲಿಸಲಾಯಿತು. ರನ್ನ ವಿಚಾರ ವೇದಿಕೆ ಅಧ್ಯಕ್ಷ ಜಿ.ಬಿ. ಖಾಸನೀಸ್, ಸಾಹಿತಿ ಡಾ. ಅಶೋಕ ನರೋಡೆ, ನಿವೃತ್ತ ಶಿಕ್ಷಕ ಎಂ.ಐ. ಡಾಂಗೆ, ಎಸ್.ಪಿ. ಬಿರಾದಾರ, ಚಿದಾನಂದ ಪಾಟೀಲ, ಕಾನಿಪ ಜಿಲ್ಲಾ ಸದಸ್ಯ ಚಂದ್ರಶೇಖರ ಮೋರೆ ಮಾತನಾಡಿದರು.

ಕಾನಿಪ ಅಧ್ಯಕ್ಷ ಮಹೇಶ ಮನ್ನಯ್ಯನವರಮಠ, ರನ್ನ ವಿಚಾರ ವೇದಿಕೆ ಕಾರ್ಯದರ್ಶಿ ಬಕ್ಷಿಸಾಬ ಯಾದವಾಡ, ಶಾಲೆಯ ಮುಖ್ಯೋಪಾಧ್ಯಾಯ ಎಸ್.ಜಿ. ಕೌಜಲಗಿ, ಶಂಭು ಬಿಸ್ವಾಗರ, ಕುಮದಾ ಬಿಸ್ವಾಗರ ಸೇರಿ ಗಣ್ಯರು ಉಪಸ್ಥಿತರಿದ್ದರು.

ಜಿ.ಎಸ್. ಗೊಂಬಿ ಸ್ವಾಗತಿಸಿದರು. ನಾರನಗೌಡ ಉತ್ತಂಗಿ ನಿರೂಪಿಸಿದರು. ರಾಜೇಂದ್ರ ನಾವಿ ವಂದಿಸಿದರು.

ಚಿಂತನೆ