ಬಾಗಲಕೋಟೆ

ಬೈಕ್‌ನಲ್ಲಿ ಏಳು ಸಾವಿರ ಕಿ.ಮೀ. ಸಾಹಸಯಾತ್ರೆ..!

ಬೈಕ್ ಮೂಲಕ ದೇಶ ಸುತ್ತಿದ ವಜ್ಜರಮಟ್ಟಿಯ ಯುವಕರು.
ಬೈಕ್ ಮೂಲಕ ದೇಶ ಸುತ್ತಿದ ವಜ್ಜರಮಟ್ಟಿಯ ಯುವಕರು.
ದತ್ತಾತ್ರೇಯ ಪಿ ಕುಲಕರ್ಣಿ
Published on: 

ಪ್ರಮುಖ ಮುಖ್ಯಾಂಶಗಳು

  • ವಜ್ಜರಮಟ್ಟಿ ಗ್ರಾಮದ ಯುವಕರ ಅಪರೂಪದ ಸಾಧನೆ
  • 22 ದಿನಗಳಲ್ಲಿ ನೇಪಾಳದವರೆಗೆ ಪ್ರಯಾಣ
  • ಈ ಪ್ರಯಾಣಕ್ಕೆ ಅಂದಾಜು 65 ಸಾವಿರ ರೂ. ವೆಚ್ಚವಾಗಿದೆ
ಮುಧೋಳ : ತಾಲೂಕಿನ ವಜ್ಜರಮಟ್ಟಿ ಗ್ರಾಮದ ಇಬ್ಬರು ಯುವಕರು ಬೈಕ್ ಮೂಲಕ ಸುಮಾರು 7,000 ಕಿಲೋ ಮೀಟರ್ ದೂರವನ್ನು ಕೇವಲ 22 ದಿನಗಳಲ್ಲಿ ಕ್ರಮಿಸಿ ನೇಪಾಳದವರೆಗೆ ಸಾಹಸ ಯಾತ್ರೆ ಪೂರ್ಣಗೊಳಿಸಿ ಗಮನ ಸೆಳೆದಿದ್ದಾರೆ. ಬಸವರಾಜ ಹಂಚಿನಾಳ (36) ಮತ್ತು ಭೀಮಶಿ ಕುಟೇರ (26) ಈ ಸಾಹಸದ ರೂವಾರಿಗಳು.
ಕಷಿಕರಾಗಿರುವ ಬಸವರಾಜ ಹಾಗೂ ಖಾಸಗಿ ಕಾರ್ಖಾನೆಯಲ್ಲಿ ಕೆಲಸ ಮಾಡುತ್ತಿರುವ ಭೀಮಶಿ, ಏಪ್ರಿಲ್ 15ರಂದು ವಜ್ಜರಮಟ್ಟಿಯಿಂದ ಯಾತ್ರೆ ಆರಂಭಿಸಿದರು. ಮಹಾರಾಷ್ಟ್ರ, ಮಧ್ಯಪ್ರದೇಶ ಹಾಗೂ ಉತ್ತರ ಪ್ರದೇಶಗಳ ಮೂಲಕ ನೇಪಾಳ ತಲುಪಿದ ಅವರು ದಾರಿಯುದ್ದಕ್ಕೂ ತುಳಜಾಪುರ ಅಂಬಾಭವಾನಿ, ನರ್ಮದಾ ಘಾಟ್, ಪ್ರಯಾಗರಾಜ್, ಅಯೋಧ್ಯೆ ಸೇರಿ ಹಲವು ಧಾರ್ಮಿಕ- ಐತಿಹಾಸಿಕ ಸ್ಥಳಗಳಿಗೆ ಭೇಟಿ ನೀಡಿದರು.
ನೇಪಾಳದಲ್ಲಿ ಲುಂಬಿನಿ, ಕಠ್ಮಂಡು, ಮುಕ್ತಿನಾಥ ಹಾಗೂ ಭಾರತ-ಚೀನಾ ಗಡಿ ಭಾಗದ ಹಿಮಾಲಯ ಶ್ರೇಣಿಗಳವರೆಗೆ ಬೈಕ್ ಸವಾರಿ ನಡೆಸಿದ ಅವರು, ಬಿಸಿಲು, ಚಳಿ ಮತ್ತು ಮಳೆಯಂತಹ ವೈವಿಧ್ಯಮಯ ಹವಾಮಾನ ಸವಾಲುಗಳನ್ನು ಎದುರಿಸಿ ಯಾತ್ರೆಯನ್ನು ಯಶಸ್ವಿಯಾಗಿ ಮುಗಿಸಿದ್ದಾರೆ. ಈ ಪ್ರಯಾಣಕ್ಕೆ ಅಂದಾಜು 65 ಸಾವಿರ ರೂ. ವೆಚ್ಚವಾಗಿದೆ ಎಂದು ಮಾಹಿತಿ ನೀಡಿದರು.
ಹಿಂದಿನಿಂದಲೇ ಪ್ರವಾಸ ಹವ್ಯಾಸ ಬೆಳೆಸಿಕೊಂಡಿದ್ದ ಬಸವರಾಜ, ವಿಭಿನ್ನ ಸಾಧನೆ ಮಾಡುವ ಉದ್ದೇಶದಿಂದ ಈ ಯಾತ್ರೆ ಕೈಗೊಂಡಿದ್ದರು. ಯಾವುದೇ ಅಡೆತಡೆಗಳಿಲ್ಲದೆ ಸುರಕ್ಷಿತವಾಗಿ ಮರಳಿದ ಯುವಕರನ್ನು ಗ್ರಾಮಸ್ಥರು ಅಭಿನಂದಿಸಿದ್ದಾರೆ.
"

ಐತಿಹಾಸಿಕ ಸ್ಥಳಗಳನ್ನು ಬೈಕ್ ಮೂಲಕ ಸಂಚರಿಸುವುದು ನಮ್ಮ ಕನಸಾಗಿತ್ತು. ಹಿಮಾಲಯದ ಸೌಂದರ್ಯ ಮತ್ತು ಅಲ್ಲಿನ ವಾತಾವರಣ ನಮಗೆ ಮರೆಯಲಾಗದ ಅನುಭವ ನೀಡಿದೆ. ಕರ್ನಾಟಕ ಮತ್ತು ಭಾರತದ ಧ್ವಜದೊಂದಿಗೆ ಈ ಯಾತ್ರೆ ನಡೆಸಿದ್ದು ಅಪಾರ ಹೆಮ್ಮೆ ತಂದಿದೆ.
-ಬಸವರಾಜ ಹಂಚಿನಾಳ, ಸಾಹಸಿ ಬೈಕ್ ಸವಾರ

ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net