ಜಮಖಂಡಿ ಕ್ಷೇತ್ರದಲ್ಲಿ 36,739 ಮತದಾರರ ಹೆಸರು ಕಡಿತ

ಜಮಖಂಡಿಯಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಎಸಿ ಶ್ವೇತಾ ಬೀಡಿಕರ ಮಾತನಾಡಿದರು. ತಹಸೀಲ್ದಾರ್ ಅನೀಲ ಬಡಿಗೇರ ಇದ್ದಾರೆ.

Published on:

26 Aug 2026, 11:43 am

ಪ್ರಮುಖ ಮುಖ್ಯಾಂಶಗಳು

ಉಪವಿಭಾಗಾಧಿಕಾರಿ ಶ್ವೇತಾ ಬೀಡಿಕರ ಮಾಹಿತಿ
ಪರಿಷ್ಕರಣೆಗೆ ಮುನ್ನ ಕ್ಷೇತ್ರದಲ್ಲಿ 2,30,006 ಮತದಾರರಿದ್ದರು.
ಮ್ಯಾಚಿಂಗ್ ಆಗದ ಹಾಗೂ ನೋ ಮ್ಯಾಪಿಂಗ್ ಆಗಿರುವ 1,822 ಮತದಾರರಿಗೆ ನೋಟಿಸ್ ನೀಡಲಾಗುವುದು.

ಜಮಖಂಡಿ:

ಮತದಾರರ ಪಟ್ಟಿಯ ಪರಿಷ್ಕರಣೆಯ ಬಳಿಕ ಜಮಖಂಡಿ ವಿಧಾನಸಭಾ ಕ್ಷೇತ್ರದಲ್ಲಿ 36,739 ಮತದಾರರ ಹೆಸರುಗಳನ್ನು ಪಟ್ಟಿಯಿಂದ ಕೈಬಿಡಲಾಗಿದ್ದು, ಅಂತಿಮ ಪಟ್ಟಿಯಲ್ಲಿ 1,93,267 ಮತದಾರರು ಉಳಿದಿದ್ದಾರೆ ಎಂದು ಉಪವಿಭಾಗಾಧಿಕಾರಿ ಶ್ವೇತಾ ಬೀಡಿಕರ ತಿಳಿಸಿದರು.

ನಗರದ ತಾಲೂಕು ಆಡಳಿತ ಸೌಧದಲ್ಲಿ ಮಂಗಳವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಪರಿಷ್ಕರಣೆಗೆ ಮುನ್ನ ಕ್ಷೇತ್ರದಲ್ಲಿ 2,30,006 ಮತದಾರರಿದ್ದರು. ಅವರಲ್ಲಿ 24,276 ಮಂದಿ ಸ್ಥಳಾಂತರಗೊಂಡಿರುವುದು, 7,542 ಜನರು ನಿಧನರಾಗಿರುವುದು, 2,244 ಡುಪ್ಲಿಕೇಟ್ ಮತದಾರರು, 2,533 ಜನರು ಗೈರು ಹಾಗೂ 142 ಮಂದಿ ಇತರೆ ಕಾರಣಗಳಿಂದ ಪಟ್ಟಿಯಿಂದ ಕೈಬಿಡಲಾಗಿದೆ ಎಂದು ವಿವರಿಸಿದರು.

ಅಂತಿಮ ಪಟ್ಟಿಯಲ್ಲಿ 96,586 ಪುರುಷರು, 96,673 ಮಹಿಳೆಯರು ಹಾಗೂ 8 ಇತರೆ ಮತದಾರರು ಇದ್ದಾರೆ.

ಒಂದೇ ಮತಗಟ್ಟೆಯಲ್ಲಿ 1,200ಕ್ಕಿಂತ ಹೆಚ್ಚು ಮತದಾರರು ಇರಬಾರದು ಎಂಬ ನಿಯಮದಂತೆ ಮತಗಟ್ಟೆಗಳ ಮರುವಿಂಗಡಣೆ ಮಾಡಲಾಗಿದ್ದು, 21 ಹೊಸ ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ. ಇದರಿಂದ ಕ್ಷೇತ್ರದ ಮತಗಟ್ಟೆಗಳ ಸಂಖ್ಯೆ 232ರಿಂದ 253ಕ್ಕೆ ಏರಿಕೆಯಾಗಿದೆ.

ಮ್ಯಾಚಿಂಗ್ ಆಗದ ಹಾಗೂ ನೋ ಮ್ಯಾಪಿಂಗ್ ಆಗಿರುವ 1,822 ಮತದಾರರಿಗೆ ನೋಟಿಸ್ ನೀಡಲಾಗುವುದು. ನಿಗದಿಪಡಿಸಿರುವ 11 ದಾಖಲೆಗಳ ಪೈಕಿ ಯಾವುದಾದರೂ ಒಂದು ದಾಖಲೆಯನ್ನು ಸಲ್ಲಿಸಿದಲ್ಲಿ ಪರಿಶೀಲನೆ ಬಳಿಕ ಮತದಾರರ ಪಟ್ಟಿಗೆ ಹೆಸರು ಸೇರ್ಪಡೆಗೊಳಿಸಲಾಗುವುದು ಎಂದು ಶ್ವೇತಾ ಬೀಡಿಕರ ಹೇಳಿದರು.

ಗ್ರಾಮೀಣ ಪ್ರದೇಶಗಳಲ್ಲಿ ಗ್ರಾಪಂ ಮಟ್ಟದಲ್ಲಿ ನಾಲ್ವರು ತಾಲೂಕು ಮಟ್ಟದ ಅಧಿಕಾರಿಗಳ ನೇತತ್ವದಲ್ಲಿ ಹಾಗೂ ನಗರ ಪ್ರದೇಶದಲ್ಲಿ ನಗರಸಭೆ ಪೌರಾಯುಕ್ತರು ಮತ್ತು ತಹಸೀಲ್ದಾರರ ನೇತತ್ವದಲ್ಲಿ ವಿಚಾರಣೆ ನಡೆಯಲಿದೆ. ಅಕ್ಟೋಬರ್ 27ರೊಳಗೆ ಈ ಎಲ್ಲ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಲಾಗುವುದು ಎಂದು ಅವರು ತಿಳಿಸಿದರು.

ತಹಸೀಲ್ದಾರ್ ಅನೀಲ ಬಡಿಗೇರ, ಶಿರಸ್ತೇದಾರ ಶಶಿಧರ ಛಲವಾದಿ ಉಪಸ್ಥಿತರಿದ್ದರು.

Voters