ಸಿಐಡಿ ತಂಡದಿಂದ ಸ್ಥಳ ಮಹಜರು

2020 ನವೆಂಬರ್ 9ರಂದು ಘಟನೆ ನಡೆದಿತ್ತು, ಹೀಗಾಗಿ ಬೆಂಗಳೂರು ಸಿಐಡಿ ವಿಚಾರಣೆಗಳ ವಿಭಾಗದ ಪೊಲೀಸ್ ಉಪಾಧೀಕ್ಷಕಿ ಪ್ರಭಾವತಿ ಪಾಂಡುರಂಗ ನೇತೃತ್ವದ ತಂಡ ಪುರಸಭೆ ಸದಸ್ಯೆ ಚಾಂದನಿ ನಾಯಕ ಅವರಿಂದ ಅಗತ್ಯ ದಾಖಲೆಗಳನ್ನು ಪಡೆದುಕೊಂಡು ಪುರಸಭೆ ಆವರಣ ಮತ್ತು ಪುರಸಭೆಯ ಸಭಾಂಗಣದಲ್ಲಿ ಘಟನಾ ಸ್ಥಳದ ಮಹಜರು ನಡೆಸಿತು.

ತಮ್ಮ ಪ್ರಕರಣಕ್ಕೆ ‘ಬಿ’ ರಿಪೋಟ್ ಹಾಕಿದ್ದನ್ನು ಪ್ರಶ್ನಿಸಿ ಪುರಸಭೆ ಸದಸ್ಯೆ ಚಾಂದನಿ ನಾಯಕ ಅವರು ನ್ಯಾಯಾಲಯದ ಮೊರೆ ಹೋಗಿದ್ದರು. ಅವರು ಸಲ್ಲಿಸಿದ್ದ ಸಂಪೂರ್ಣ ಸಾಕ್ಷಾಧಾರಗಳನ್ನು ಪರಿಶೀಲಿಸಿದ ಬನಹಟ್ಟಿ ಜೆಎಂಎ್ಸಿ ನ್ಯಾಯಾಲಯವು ದೂರುದಾರರ ಸಾಕ್ಷಿಗಳನ್ನು ಎತ್ತಿಹಿಡಿದು, ಸಿಐಡಿ ಅಧಿಕಾರಿಗಳು ಹಾಕಿರುವ ‘ಬಿ’ ರಿಪೋಟ್ ವಜಾಗೊಳಿಸಿ, ಸಿಆರ್‌ಪಿಸಿ ಸೆಕ್ಷನ್ 153(3) ಅಡಿಯಲ್ಲಿ ನೀಡಲಾದ ಅಧಿಕಾರ ಚಲಾಯಿಸಿ ಪ್ರಕರಣದ ಹೆಚ್ಚಿನ ಮರು ತನಿಖೆ ನಡೆಸಿ, ಸಮಗ್ರ ವರದಿ ನೀಡಬೇಕೆಂದು 2024 ಅಕ್ಟೋಬರ್‌ನಲ್ಲಿ ತನಿಖಾಧಿಕಾರಿಗಳಿಗೆ ಆದೇಶಿಸಿತ್ತು.

ನ್ಯಾಯಾಲಯದ ಆದೇಶದ ಹಿನ್ನೆಲೆ ಸಿಐಡಿ ಅಧಿಕಾರಿಗಳು ಕಳೆದ ಏಪ್ರಿಲ್ ತಿಂಗಳಿನಿಂದ ಮರು ವಿಚಾರಣೆ ನಡೆಸುತ್ತಿದ್ದಾರೆ. ಗಲಾಟೆ ಪ್ರಕರಣದ ಕುರಿತು ಇದು ಸಿಐಡಿ ತಂಡದ 3ನೇ ವಿಚಾರಣೆಯಾಗಿದೆ. ಕಳೆದ ಮೇ ತಿಂಗಳಿನಿಂದ ಅಕ್ಟೋಬರ್‌ವರೆಗೆ ಪುರಸಭೆ ಸದಸ್ಯರು, ಶಾಸಕರು, ಪೊಲೀಸ್ ಸಿಬ್ಬಂದಿ, ವೈದ್ಯರು, ಛಾಯಾಗ್ರಾಹಕರು, ಉಭಯ ಪಕ್ಷಗಳು ಮುಖಂಡರು ಸೇರಿ ಹಲವರ ವಿಚಾರಣೆ ನಡೆಸಿದ್ದಾರೆ. ಪ್ರಕರಣ ಅಂತಿಮ ಹಂತದ ವಿಚಾರಣೆಗಾಗಿ ಸಿಐಡಿ ಅಧಿಕಾರಿಗಳು ಗುರುವಾರ ಪುರಸಭೆಗೆ ಆಗಮಿಸಿ ಸದಸ್ಯ ಚಾಂದನಿ ನಾಯಕ ಅವರಿಂದ ಘಟನಾ ಸ್ಥಳದ ಮಹಜರು ನಡೆಸಿದರು.