ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಉಮಾಕಾಂತ ಭಟ್ಟ , ಯಕ್ಷಗಾನದಿಂದ ಜೀವತೃಪ್ತಿ ನನಗೆ ಸಿಗುತ್ತಿತ್ತು. ಅದನ್ನು ಪರಿಗಣಿಸಿ ಹೊಸ್ತೋಟ ಪ್ರಶಸ್ತಿ ಕೊಟ್ಟಿದ್ದು ಸಾರ್ಥಕತೆ ನೀಡಿದೆ. ತಾಳಮದ್ದಲೆ ಸಪ್ತಾಹದಲ್ಲಿ ಎಲ್ಲ ದಿನ ಶ್ರೀರಾಮನ ಪಾತ್ರ ನಿರ್ವಹಣೆ ಸವಾಲಿನ ವಿಷಯವಾಗಿದೆ. ರಾವಣನಂತೆ ವರ್ತಿಸುವುದು ಸಾಧ್ಯವಾದರೂ ರಾಮನಂತೆ ವರ್ತಿಸುವುದು ತುಂಬ ಕಷ್ಟ. ಅವನಂತೆ ಬದುಕಲು, ಇರಲು ಶತಮಾನದ ಸಿದ್ಧತೆ ಬೇಕು ಎಂದರು. ಪ್ರೇಕ್ಷಕರಲ್ಲಿ ಪ್ರಾಮಾಣಿಕ ಪ್ರಶ್ನೆ ಮೂಡಿಸುವ ಕಾರ್ಯ ತಾಳಮದ್ದಲೆ ಅರ್ಥಧಾರಿಗಳಿಂದ ಆಗಬೇಕು, ಎಲ್ಲರೂ ರಾಮಾಯಣದ ಭಾವ, ಭಾಷೆ ಅನುಸರಿಸಿದರೆ ರಾಮನ ಅನುಭವ ಪಡೆಯಬಹುದು. ವಿಶ್ವವ್ಯಾಪಿಯಾಗಿ ರಾಮ ಶಿಕ್ಷಣ ಯೋಜನೆಗೆ ಇದು ನಾಂದಿಯಾಗಬೇಕು ಎಂದರು. ಯಕ್ಷಗಾನ ಅಕಾಡೆಮಿ ಅಧ್ಯಕ್ಷ ಪ್ರೊ. ಎಂ.ಎ. ಹೆಗಡೆ, ಕೆರೇಕೈ ಅವರ ಪತ್ನಿ ಸುನಂದ ಭಟ್ಟ ಅವರು ವೇದಿಕೆಯಲ್ಲಿ ಇದ್ದರು. ಯಕ್ಷ ಶಾಲ್ಮಲಾ ಸಂಘಟನೆ ಅಧ್ಯಕ್ಷ ಆರ್.ಎಸ್. ಹೆಗಡೆ ಭೈರುಂಬೆ ಸ್ವಾಗತಿಸಿದರು. ಪ್ರೇಕ್ಷಕಿ ಪ್ರಜ್ಞಾ ಹೆಗಡೆ ಸಪ್ತಾಹದ ಕುರಿತು ಅಭಿಪ್ರಾಯ ವ್ಯಕ್ತಪಡಿಸಿದರು. ಶಂಕರ ಭಟ್ಟ ಪ್ರಶಸ್ತಿ ಪತ್ರ ವಾಚಿಸಿದರು. ಸಂಘಟನೆ ಕಾರ್ಯದರ್ಶಿ ನಾಗರಾಜ ಜೋಶಿ ನಿರೂಪಿಸಿದರು. ನಂತರ ಅತಿಥಿ ಕಲಾವಿದರ ಕೂಡುವಿಕೆಯಲ್ಲಿ ರಾಮ ನಿರ್ಯಾಣ ಆಖ್ಯಾನ ಪ್ರದರ್ಶನಗೊಂಡಿತು.
