ಅವಿಮುಕ್ತೇಶ್ವರಸ್ವಾಮಿ ರಥೋತ್ಸವ ಅದ್ದೂರಿ

ಹೊಸಕೋಟೆ : ನಗರದ ಐತಿಹಾಸಿಕ ಶ್ರಿ ಅವಿಮುಕ್ತೇಶ್ವರ ಸ್ವಾಮಿ ಬ್ರಹ್ಮರಥೋತ್ಸವ ಸಹಸ್ರಾರು ಜನರ ಸಮ್ಮುಖದಲ್ಲಿ ಅದ್ದೂರಿಯಾಗಿ ನೆರವೇರಿತು.

ಮುಂಜಾನೆ ದೇವಸ್ಥಾನದಿಂದ ಶ್ರೀ ಅವಿಮುಕ್ತೇಶ್ವರಸ್ವಾಮಿ ದೇವರ ಉತ್ಸವ ಮೂರ್ತಿಯನ್ನು ಮೆರವಣಿಗೆ ಮೂಲಕ ಬೃಹತ್​ ರಥದಲ್ಲಿ ಪ್ರತಿಷ್ಠಾಪಿಸಿ, ಮಡಿತೇರಿನ ಉತ್ಸವಕ್ಕೆ ಶಾಸಕ ಶರತ್​ ಬಚ್ಚೇಗೌಡ ಪೂಜೆ ಸಲ್ಲಿಸಿ, ಚಾಲನೆ ನೀಡಿದರು. ಬಳಿಕ ಭಕ್ತರು ರಥ ಎಳೆದು ಭಕ್ತಿ ಸಮರ್ಪಿಸಿದರು. ಇದೇವೇಳೆ ರಥಕ್ಕೆ ಕಲ್ಲುಪ್ಪು, ಕಾಳುಮೆಣಸು ಹಾಗೂ ಬಾಳೆಹಣ್ಣು ಎಸೆದು ಇಷ್ಟಾರ್ಥ ಸಿದ್ಧಿಗೆ ಪ್ರಾರ್ಥಿಸಿದರು.

ರಥವು ಗಾಣಿಗರ ಪೇಟೆ, ದರ್ಜಿಪೇಟೆ, ಕುರುಬರ ಪೇಟೆ, ಮೇಲಿನ ಪೇಟೆ, ಕೆಆರ್​ ವೃತ್ತದ ಮುಖಾಂತರ ಸಾಗಿ, ಸಂಜೆ 7.30ಕ್ಕೆ ಮೂಲಸ್ಥಾನಕ್ಕೆ ಮರಳಿತು. ಮೆರವಣಿಗೆಯುದ್ದಕ್ಕೂ ಭಕ್ತರು ಹೆಜ್ಜೆ ಹಾಕಿದರು. ಹೊರ ರಾಜ್ಯದಿಂದಲೂ ಭಕ್ತರು ಆಗಮಿಸಿ, ಸ್ವಾಮಿಯ ದರ್ಶನ ಪಡೆದರು. ರಥೋತ್ಸವ ಹಿನ್ನೆಲೆಯಲ್ಲಿ ಮಕ್ಕಳ ಆಟದ ಸಾಮಗ್ರಿಗಳು, ಜಾಯಿಂಟ್​ ವೀಲ್​, ರಾಟೆಗಳು, ಮನರಂಜನಾ ಕಾರ್ಯಕ್ರಮಗಳು ಎಲ್ಲೆಲ್ಲೂ ಜೋರಾಗಿದ್ದವು. ಪೊಲೀಸ್​ ಇಲಾಖೆ ಬಂದೋಬಸ್ತ್​ ಒದಗಿಸಿತ್ತು. ಜನಸಂದಣಿ ಪ್ರದೇಶಗಳಲ್ಲಿ ಸಿಸಿ ಕ್ಯಾಮರಾ ಅಳವಡಿಸಲಾಗಿತ್ತು.

ನಾಡು ಸುಭಿಕ್ಷವಾಗಿರುವ ವಿಶ್ವಾಸ : ಬೆಳಗ್ಗೆ 11.30ರಲ್ಲಿ ಮಡಿ ತೇರಿಗೆ ಪೂಜೆ ಸಲ್ಲಿಸಿ ಮಾತನಾಡಿದ ಶಾಸಕ ಶರತ್​ ಬಚ್ಚೇಗೌಡ, ಐತಿಹಾಸಿಕ ಶ್ರೀ ಅವಿಮುಕ್ತೇಶ್ವರ ಸ್ವಾಮಿ ಬ್ರಹ್ಮರಥೋತ್ಸವ ಹಾಗೂ ಶ್ರೀ ದ್ರೌಪದಿ ದೇವಿ ಕರಗ ಮಹೋತ್ಸವದಲ್ಲಿ ಜಾತಿ ಜನಾಂಗ, ಧರ್ಮ ಭೇದವಿಲ್ಲದೆ ತಾಲೂಕು, ಜಿಲ್ಲೆ, ರಾಜ್ಯ ಹೊರ ರಾಜ್ಯ, ವಿದೇಶಗಳಿಂದ ಭಕ್ತರು ಆಗಮಿಸುತ್ತಾರೆ. ಈ ಬಾರಿಯ ಹಬ್ಬದ ಸೂಚನೆ ತಾಲೂಕಿನಲ್ಲಿ ಹಾಗೂ ರಾಜ್ಯದಲ್ಲಿ ಉತ್ತಮ ಮಳೆ ಬೆಳೆಯಿಂದ ಸುಭಿಕ್ಷವಾಗಿರುವ ಸೂಚನೆಯಿದ್ದು, ಶ್ರದ್ಧೆಯಿಂದ ಪ್ರಕೃತಿಯನ್ನು ಆರಾಧಿಸಿದರೆ ದೇವರ ಆಶೀರ್ವಾದ ನಮ್ಮೆಲ್ಲರ ಮೇಲಿರಲಿದೆ ಎಂದರು. ಮಾಜಿ ಸಂಸದ ಬಿ.ಎನ್​.ಬಚ್ಚೇಗೌಡ, ರಥೋತ್ಸವ ಸಮಿಪಿಯ ಕೇಶವ್​ ಮೂರ್ತಿ, ಸದಸ್ಯ ತಹಸೀಲ್ದಾರ್​ ಸೋಮಶೇಖರ್​ ಇದ್ದರು.

ಪೌರಕಾರ್ಮಿಕರಿಂದ ಸ್ವಚ್ಛತೆಗೆ ಆದ್ಯತೆ : ರಥ ಸಾಗುವ ಮಾರ್ಗದಲ್ಲಿ ನಗರಸಭೆಯು ಸ್ವಚ್ಛತೆಗೆ ಆದ್ಯತೆ ನೀಡಿತ್ತು. ಸ್ವಚ್ಛತೆ ಕಾಪಾಡಲು ಪೌರ ಕಾರ್ಮಿಕರುಅವಿರತ ಶ್ರಮಿಸಿದರು.