ಚಿಕ್ಕಬಳ್ಳಾಪುರ: ಮಂಚೇನಹಳ್ಳಿ ಪೊಲೀಸ್ ಠಾಣೆಯ ನಾಮಗೊಂಡ್ಲು ಗ್ರಾಮದ ಸೇತುವೆಯ ಬಳಿ ಅಪರಿಚಿತ ಮಹಿಳೆಯ ಶವ ಪತ್ತೆಯ ಪ್ರಕರಣವನ್ನು ಖಾಕಿ ಪಡೆ ಭೇದಿಸಿದ್ದು ಕೊಲೆಗೆ ಇವಿಎಂ ಹಣವನ್ನು ಪಾವತಿಸಲು ಆರ್ಥಿಕ ಸಮಸ್ಯೆ ಉಂಟಾದಾಗ ಪರಿಹಾರಕ್ಕೆ ಗೆಳೆಯನೇ ಇತರ ಇಬ್ಬರು ಸ್ನೇಹಿತರೊಂದಿಗೆ ಸೇರಿಕೊಂಡು ಕೊಲೆ ಮಾಡಿರುವುದು ತನಿಖೆಯಿಂದ ತಿಳಿದು ಬಂದಿದೆ.
ಗೌರಿಬಿದನೂರಿನ ವಿರೂಪಸಂದ್ರದ ನಿವಾಸಿ, ಬೆಂಗಳೂರಿನ ಆಟೋ ಚಾಲಕ ರಾಕೇಶ್ (೩೮), ಅಂಜಲಿ (೩೪), ನವೀನ್ ಹಾಗೂ ನಿಹಾರಿಕಾ ಆರೋಪಿಗಳು. ಕೊಲೆಯಾದ ಮಹಿಳೆಯು ಆಂಧ್ರದ ಹಿಂದೂಪುರದ ಅರ್ಚನಾ. ಗೌರಿಬಿದನೂರು ಸಿಪಿಐ ಸತ್ಯನಾರಾಯಣ್ ನೇತೃತ್ವದ ಪೊಲೀಸ್ ತಂಡವು ಆರೋಪಿ ರಾಕೇಶ್ ಮೃತಳಿಗೆ ಹಲವು ಬಾರಿ ಮೊಬೈಲ್ ಕರೆ ಮಾಡಿರುವ ಮಾಹಿತಿಯನ್ನಾಧಾರಿಸಿ ಪ್ರಕರಣವನ್ನು ಭೇದಿಸಿದ್ದು ಈತನನ್ನು ವಶಪಡಿಸಿಕೊಂಡು ವಿಚಾರಣೆ ನಡೆಸಿದಾಗ ಸತ್ಯಾಂಶವು ಹೊರ ಬಿದ್ದಿದೆ. ಅಂಜಲಿಯನ್ನು ಬಂಧಿಸಲಾಗಿದೆ. ಉಳಿದ ಆರೋಪಿಗಳಾದ ನವೀನ್ ಹಾಗೂ ನಿಹಾರಿಕಾ ಬಂಧನಕ್ಕೆ ಬಲೆ ಬೀಸಲಾಗಿದೆ.
