ಘಟನೆ ಹಿನ್ನೆಲೆ : ಅಪ್ಪು ಮದರಿ ಅವರ ಪುತ್ರಿ& ಸದ್ಯ ಬಾಗಲಕೋಟೆಯ ಬಿವಿಬಿ ಇಂಜಿನಿಯರಿಂಗ್ ಕಾಲೇಜಿನ ವಿದ್ಯಾರ್ಥಿನಿ ಐಶ್ವರ್ಯ ಮದರಿ ಮತ್ತು ಢವಳಗಿಯ ತಾಪಂ ಮಾಜಿ ಸದಸ್ಯ ರಾಮನಗೌಡ ಬಿರಾದಾರ ಅವರ ಪುತ್ರ ರಾಹುಲ್ ಬಿರಾದಾರ ನಡುವೆ ಕಳೆದ 5&6 ವರ್ಷಗಳಿಂದ ಪ್ರೀತಿ, ಪ್ರೇಮ ಇತ್ತು. ಇಬ್ಬರೂ ಜೊತೆಯಾಗಿ ಬಹಳಷ್ಟು ಕಡೆ ಸುತ್ತಾಡಿದ್ದರು. ಇದು ಬಹಿರಂಗಗೊಂಡಿದ್ದರಿಂದ ಮನೆಯವರ ಮಾತಿಗೆ ಸ್ಪಂದಿಸಿ ಐಶ್ವರ್ಯ ರಾಹುಲ್ ಜೊತೆಗಿನ ಪ್ರೇಮ ಸಂಬಂಧ ಕಡಿದುಕೊಂಡಿದ್ದಳು. ಇದನ್ನು ಸಹಿಸದ ರಾಹುಲ್ ಮೇಲಿಂದ ಮೇಲೆ ಐಶ್ವರ್ಯ ಮತ್ತವಳ ಕುಟುಂಬದವರಿಗೆ ತೊಂದರೆ ಕೊಡುತ್ತಿದ್ದ. ಒಂದೆರಡು ಬಾರಿ ಎರಡೂ ಕುಟುಂಬದ ಹಿರಿಯರು ಮತ್ತು ಮಧ್ಯಸ್ಥಿಕೆದಾರರ ನಡುವೆ ಈ ವಿಚಾರ ಚರ್ಚೆಗೆ ಬಂದು ಬುದ್ಧಿವಾದ ಹೇಳಿದ್ದರು. ಆದರೂ ರಾಹುಲ್ ಏಕಮುಖ ಪ್ರೀತಿ ಮುಂದುವರಿಸಿದ್ದ. 2&3 ದಿನಗಳ ಹಿಂದೆ ಮದರಿ ಕುಟುಂಬದವರು ಐಶ್ವರ್ಯಳೊಂದಿಗೆ ಗದಗ ಜಿಲ್ಲೆ ಶಿರಹಟ್ಟಿಯಲ್ಲಿರುವ ಕೀರೇಶ್ವರ ಜಾತ್ರೆಗೆ ಹೋಗಿದ್ದನ್ನೇ ನೆಪ ಮಾಡಿಕೊಂಡ ರಾಹುಲ್ ಇದೇ ಕಾರಣಕ್ಕಾಗಿ ಐಶ್ವರ್ಯ ಪಾಲಕರ ಮೇಲೆ ಹರಿಹಾಯ್ದಿದ್ದ. ಇದೇ ಹಿನ್ನೆಲೆಯಲ್ಲಿ ನಡೆದಿದ್ದ ಮಾತಿನ ಚಕಮಕಿಯಿಂದಾಗಿ ಭಾನುವಾರ ಸಂಜೆ ರಾಹುಲ್ ಮದರಿಯವರ ಮನೆಗೆ ಒಬ್ಬನೇ ಬಂದಿದ್ದ. ಆಗ ಮಾತಿಗೆ ಮಾತು ಬೆಳೆದಿದೆ. ಈ ಸಂದರ್ಭ ಪೆಟ್ರೋಲ್ ಎರಚಿ, ಬೆಂಕಿ ಕಡ್ಡಿ ಗೀರಿದ್ದರಿಂದ ಬೆಂಕಿ ಹೊತ್ತಿಕೊಂಡು ರಾಹುಲ್, ಮುತ್ತು, ಸೀಮಾ, ನೀಲಕಂಠ ಇವರೆಲ್ಲರೂ ಗಾಯಗೊಂಡರು. ಮೈಪೂರ್ತಿ ಬೆಂದು ಹೋಗಿದ್ದ ರಾಹುಲ್ ಚೀರಾಡುತ್ತಲೇ ಮನೆಯಿಂದ ಹೊರಗೆ ಓಡಿ ಬಂದು ಪಟ್ಟಣದ ಒಂದೆರಡು ಖಾಸಗಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯಲು ಯತ್ನಿಸಿದರೂ ಸೂಕ್ಷ$್ಮ ಪ್ರಕರಣವಾಗಿದ್ದರಿಂದ ಸ್ಪಂದನೆ ಸಿಕ್ಕಿರಲಿಲ್ಲ. ಕೊನೆಗೆ ರಾಹುಲ್ ಸರ್ಕಾರಿ ಆಸ್ಪತ್ರೆಗೆ ದಾಖಲಾಗಿದ್ದ. ಇದೇ ವೇಳೆ ಸುಟ್ಟ ಗಾಯಗಳಾಗಿದ್ದ ಮುತ್ತು, ಸೀಮಾ, ನೀಲಕಂಠ ಅವರು ಕೂಡ ಸರ್ಕಾರಿ ಆಸ್ಪತ್ರೆಗೆ ಚಿಕಿತ್ಸೆಗೆ ದಾಖಲಾದರು. ಎಲ್ಲರಿಗೂ ಪ್ರಾಥಮಿಕ ಚಿಕಿತ್ಸೆ ನೀಡಿ ಹೆಚ್ಚಿನ ಚಿಕಿತ್ಸೆಗೆ ಜಿಲ್ಲಾಸ್ಪತ್ರೆಗೆ ಕಳಿಸಿಕೊಡಲಾಯಿತು. ಸದ್ಯ ಜಿಲ್ಲಾಸ್ಪತ್ರೆಯಲ್ಲಿರುವ ರಾಹುಲ್, ಮುತ್ತು, ನೀಲಕಂಠ ಅವರ ಸ್ಥಿತಿ ಗಂಭೀರವಾಗಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ಸೀಮಾ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
