ಬೆಂಗಳೂರು ಉತ್ತರ ವ್ಯಾಪ್ತಿಯಲ್ಲಿ 2023ರ ವಿಧಾನಸಭಾ ಚುನಾವಣೆ ಗುಂಗು ಶುರುವಾಗಿ ಹಲವು ತಿಂಗಳೇ ಸರಿದಿವೆ. ಸ್ಪರ್ಧಾಕಾಂಕ್ಷಿಗಳು ಹೆಜ್ಜೆಯ ಸಪ್ಪಳವನ್ನು ಜನರಿಗೆ ಕೇಳಿಸಲು ಶತಪಥ ಸುತ್ತುತ್ತಿದ್ದರೆ, ಹಾಲಿ ಶಾಸಕರು ಇನ್ನೊಂದು ಅವಧಿಗೆ ಆಯ್ಕೆಗಾಗಿ ಜನರ ಮನದಲ್ಲಿಳಿಯಲು ಕಸರತ್ತು ಆರಂಭಿಸಿದ್ದಾರೆ. ಒಟ್ಟಾರೆ ಮತದಾರನ ಕಿವಿಯಲ್ಲಿ ರಾಜಕೀಯ ಚರ್ಚೆ ಗುಂಯ್ಗುಟ್ಟಲು ಶುರುವಾಗಿದೆ. ಬೆಂಗಳೂರಿನ 28 ವಿಧಾನಸಭಾ ಕ್ಷೇತ್ರಗಳ ಪೈಕಿ ಬೆಂಗಳೂರು ಉತ್ತರ ಲೋಕಸಭಾ ವ್ಯಾಪ್ತಿಯಲ್ಲಿ ಎಂಟು ಕ್ಷೇತ್ರಗಳಿವೆ. ಕೆ.ಆರ್.ಪುರ, ಯಶವಂತಪುರ, ಬ್ಯಾಟರಾಯನಪುರ, ದಾಸರಹಳ್ಳಿ, ಮಹಾಲಕ್ಷ್ಮೀ ಲೇಔಟ್, ಮಲ್ಲೇಶ್ವರ, ಹೆಬ್ಬಾಳ, ಪುಲಕೇಶಿನಗರ ಕ್ಷೇತ್ರಗಳ ಸದ್ಯದ ರಾಜಕೀಯ ಚಿತ್ರಣ ಗಮನಿಸಿದರೆ, ವಲಸಿಗರ ನಡೆ ಏನಾಗುತ್ತದೆಂಬುದು ಕುತೂಹಲ. ಪಕ್ಷದ ಹೊರತು ವೈಯಕ್ತಿಕವಾಗಿ ಗೆಲ್ಲುವ ಛಾತಿ ಇರುವ ಮತ್ತು ಗೆದ್ದು ತೋರಿಸಿರುವ ಉದಾಹರಣೆ ಎದುರಿಗಿದ್ದು, ಇವರ ನಡೆ ಮೇಲೆಯೇ ಇಡೀ ಕಣದ ಚಿತ್ರಣವೇ ಬದಲಾಗಬಹುದು.
