ಅಸಲಿ ತೋರಿಸಿ ನಕಲಿ ಚಿನ್ನ ಕೊಟ್ಟು 3 ಲಕ್ಷ ರೂ. ವಂಚನೆ

ಹಾವೇರಿ: ಬೆಂಗಳೂರಿನ ಗುತ್ತಿಗೆದಾರರೊಬ್ಬರಿಗೆ ಅಸಲಿ ಚಿನ್ನದ ನಾಣ್ಯ ತೋರಿಸಿ, ನಕಲಿ ಕೊಟ್ಟು 3 ಲಕ್ಷ ರೂ. ವಂಚಿಸಿದ ಕುರಿತು ಇಲ್ಲಿಯ ಗ್ರಾಮೀಣ ಪೊಲೀಸ್​ ಠಾಣೆಯಲ್ಲಿ ಮಂಗಳವಾರ ಪ್ರಕರಣ ದಾಖಲಾಗಿದೆ.

ಬೆಂಗಳೂರಿನ ಗುತ್ತಿಗೆದಾರ ಕಂಚರ್ಳ ಹರೀಶ ವೆಂಕಟೇಶ್ವರ ರಾವ್​ (48) ಮೋಸ ಹೋದವರು.

ಸುರೇಶ (42) ಹಾಗೂ ಇನ್ನೊಬ್ಬ ಆರೋಪಿ ಮೋಸ ಮಾಡಿದವರು.

ಇವರು ಹರೀಶಗೆ ಮೂರು ದಿನದ ಹಿಂದೆ ಕರೆ ಮಾಡಿ ನಮ್ಮ ಬಳಿ ಚಿನ್ನವಿದೆ, ಅದನ್ನು ಕಡಿಮೆ ಬೆಲೆಗೆ ಕೊಡುತ್ತೇವೆ ಎಂದು ಚಿತ್ರದುರ್ಗಕ್ಕೆ ಕರೆಯಿಸಿಕೊಂಡಿದ್ದಾರೆ. ಮೊದಲಿಗೆ 5 ಸಾವಿರ ರೂ. ಇಸಿದುಕೊಂಡು ಒಂದು ಅಸಲಿ ಚಿನ್ನದ ನಾಣ್ಯ ಕೊಟ್ಟು ಪರಿಶೀಲಿಸಿಕೊಂಡು ಬರಲು ಹೇಳಿದ್ದಾರೆ.

ಹರೀಶ ಅದನ್ನು ಪರಿಶೀಲಿಸಿದ ಬಳಿಕ ಅಸಲಿ ಎಂದು ತಿಳಿದ ಮೇಲೆ ಮಂಗಳವಾರ ವಾಪಸ್​ ಆತನನ್ನು ತಾಲೂಕಿನ ಸಂಗೂರ ಗ್ರಾಮದ ಬಳಿ ಕರೆಯಿಸಿಕೊಂಡ ಖದೀಮರು 3 ಲಕ್ಷ ರೂ. ಇಸಿದುಕೊಂಡು 800 ತಾಮ್ರದ ನಾಣ್ಯಗಳನ್ನು ಕೊಟ್ಟು ಮೋಸ ಮಾಡಿದ್ದಾರೆ ಎನ್ನಲಾಗಿದೆ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.