ಕೊತಬಾಳದ ಅರುಣೋದಯ ಕಲಾ ತಂಡದ ಸಂಸ್ಥಾಪಕ ಶಂಕ್ರಣ್ಣ ಸಂಕಣ್ಣವರ ಮಾತನಾಡಿ, ‘ಜನಪದರಿಗೆ ತಮ್ಮ ಸುತ್ತಲಿನ ಸೃಷ್ಟಿಯೇ ಎಲ್ಲವೂ ಆಗಿತ್ತು. ಅವರು ಗಾಳಿ, ನೀರು, ವಾಯು, ಗಿಡಮರಗಳೆಲ್ಲವನ್ನೂ ದೇವರೆಂದೆ ಪೂಜಿಸುತ್ತಿದ್ದರು. ಜತೆಗೆ ತಮಗೆ ಅನ್ನ ನೀಡುವ ಭೂಮಿ ಮತ್ತು ಎತ್ತುಗಳಿಗೂ ಅವರು ದೇವರ ಸ್ಥಾನ ಕೊಟ್ಟು ಅವುಗಳ ಪೂಜೆಯನ್ನೇ ತಮ್ಮ ಹಬ್ಬದ ಮುಖ್ಯ ಸಂಗತಿಯನ್ನಾಗಿಸಿಕೊಂಡಿದ್ದರು. ಕಲಿಯುಗವು ಇದೇ ಯುಗಾದಿಯಂದು ಪ್ರಾರಂಭಗೊಂಡಿತು ಎಂದು ಅವರು ನಂಬಿದ್ದರು. ಆದ್ದರಿಂದಲೆ ಈ ಹಬ್ಬವನ್ನು ಯುಗದ ಆದಿ ಅಂದರೆ ಯುಗದ ಪ್ರಾರಂಭವೆಂದು ಯುಗಾದಿಯೆಂದು ಕರೆದರು. ಉಳಿದೆಲ್ಲ ಹಬ್ಬಗಳಿಗಿಂತ ಜನಪದರು ಈ ಹಬ್ಬಕ್ಕೆ ವಿಶೇಷ ಮಹತ್ವ ನೀಡಿ, ಇದನ್ನು ಹಿಂದುಗಳಿಗೆ ಹೊಸ ವರ್ಷದ ಪ್ರಾರಂಭವೆಂದು ಆಚರಿಸುತ್ತ ಬರಲಾಗಿದೆ. ಬೇವು-ಬೆಲ್ಲ ಎರಡೂ ಎಲ್ಲರ ಜೀವನದಲ್ಲಿಯೂ ಇರುತ್ತವೆ. ಬರೀ ಬೆಲ್ಲ ಬೇಕು, ಬೇವು ಬೇಡವೆಂದರೆ ಜೀವನ ನಡೆಯುವುದಿಲ್ಲ. ಆದ್ದರಿಂದ ಎರಡನ್ನೂ ಸಮಾನವಾಗಿ ಸ್ವೀಕರಿಸಿದಾಗ ಮಾತ್ರ ಜೀವನ ಅತ್ಯಂತ ಸುಖಮಯವಾಗಿ ಸಾಗುತ್ತದೆ. ನಮ್ಮ ಪ್ರಕೃತಿ ಮಾತೆಯನ್ನು ನಾವುಗಳು ಕಾಪಾಡಿಕೊಂಡಾಗ ಮಾತ್ರ ನಾವು ಸುಖದಿಂದ ಬಾಳಬಹುದು ಎಂದರು.
