ಆಗಸ್ಟ್ ಹಾಗೂ ಸೆಪ್ಟಂಬರ್ ಅಂತ್ಯದ ವೇಳೆಗೆ ಅಲ್ಲಲ್ಲಿ ವಾಡಿಕೆ ಮಳೆಯಾಗಿದೆ. ಆದರೆ ಅಕ್ಟೋಬರ್ ಎರಡನೇ ವಾರಾಂತ್ಯದ ವೇಳೆಗೆ ನಿರೀಕ್ಷಿತ ಮಳೆ ಆಗಿಲ್ಲ.ಇದರಿಂದಾಗಿ ಬಾಣಾವರ, ಜಾವಗಲ್,ಕಣಕಟ್ಟೆ ಹಾಗೂ ಕಸಬಾ ಹೋಬಳಿ ವ್ಯಾಪ್ತಿಯ ಸಹಸ್ರಾರು ಎಕರೆ ಜಮೀನಿನಲ್ಲಿ ಬಿತ್ತನೆಯಾಗಿರುವ ಬೆಳೆಗಳು ಬತ್ತಿ ಬಡಗಲಾಗಿದ್ದು ಅನ್ನದಾತನ ಬದುಕು ಬಾಣಾಲೆಯಿಂದ ಬೆಂಕಿಗೆ ಬಿದ್ದಂತಾಗಿದೆ. ಕೃಷಿ ಇಲಾಖೆ ಅಧಿಕಾರಿಗಳು ನೀಡಿರುವ ಮಾಹಿತಿ ಅನುಸಾರ ಗಂಡಸಿ 6250 , ಬಾಣಾವರ 6300, ಕಸಬಾ 7000, ಜಾವಗಲ್ 8200 ಸೇರಿ ಕಣಕಟ್ಟೆ 7800 ಸೇರಿ 35,550 ಹೆಕ್ಟೇರ್ ರಾಗಿ ಇನ್ನುಳಿದಂತೆ ತೊಗರಿ 250 ಹಾಗೂ 8,800 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಮಾಡಲಾಗಿದೆ. ಇದೀಗ ಬಹುತೇಕ ಬೆಳೆಗಳು ಮಳೆಯಿಲ್ಲದೆ ಒಣಗಲಾರಂಭಿಸಿವೆ. ಇದರಿಂದಾಗಿ ಫಸಲು ಕೈಗೆ ಬಂದ ತುತ್ತು ಬಾಯಿಗಿಲ್ಲ ಎನ್ನುವಂತಾ ಗಿದೆ ರೈತರ ಸ್ಥಿತಿ. ಹಲವೆಡೆ ಈಗಾಗಲೇ ಜಾನುವಾರುಗಳ ಮೇವಿಗೂ ತತ್ವಾರ ಎದುರಾಗುವ ಲಕ್ಷಣಗಳು ಗೋಚರಿಸುತ್ತಿವೆ.
